Taekan te Onimaki 1:13

13 Ti kakoaua ae ti riai ni kokoaua, n eeti, n itiaki, n akoi ao n ibuobuoki, n rabakau ni kakaraoa ae raoiroi nakoia aomata ni kabaneia; ti na atongnga ma te koaua bwa ti a tia ni kakoaua n taua te mwioko are taetaekinna Bwauro—Ti kakoauai bwaai ni kabane, ti kantaningai bwaai ni kabane, ti a tia n ribuakon kangaangan bwaai ni kabane ao ti kantaningaia bwa ti na kakoroi bukin bwaai ni kabane. Ngkana iai te bwai ae raoiroi, ae kakateke, ke ae tamaroa rongorongona, ke e kamoamoaaki boni bwaai aikai aika ti ukoukori.”

Ti kakoauaa

“[Aio] taekan te onimaki bon teuana aan katanoataan ara rabakau. Ti na riai ni iangoia ma ni iangoia riki. Ngkanne, ngkana ti kaririaki bwa ti na karaoa ae aki raoiroi ke te kewe ke te katei ae aki riai, e na roko nakon ara iango ma korakora tabeua te korakora aei, e bon katabwanina taekan karaoan te bwai ae eti ao ae bure n ara katei.”

President Gordon B. Hinckley (1910–2008), “Tai maku ni Karaoa ae Tamaroa,” Riaona, Beberuare 2000, 5.

Itiaki

“Weneniburen te Aomata tiaki ti bwain te rabwata. Ni koauana, te itiaki ao te kakaonimaki e moanaki inanon te tamnei tiaki n te rabwata. Kabwarabwaraan aron tamneira. Ngkana e mena tamneira ni koauan te euangkerio, ti tangiria ni maiuakina ae rietata, ao ara mwakuri a kaota te nano anne. N te aro aei, te itiaki ao te kakaonimaki a bon rine nakon katokan te wenenibure imwaain te mare ao imwiin te mare. A kabwarabwara anuan maiura n tamnei.

Terrance D. Olson, “Koauan Itiakin te Aroaro,” Riaona, Okitobwa 1999, 31.

Iraorao

Te rikini iraorao bon te akoi ao te anganga, n te taeka—ni karaoan ae raoiroi. Inanon Ana mwakuri ni mitinare Iesu Kristo “e nakonako ni kakaraoa ae raoiroi … bwa E mena te Atua irouna” (Mwakuri 10:38). Ngkana ko maiuakina maium ma te akoi, E na kakorakorako ao n tabekikorake te Atua.

Ana Kauring Bauro

Taraa I-Biribi 4:8, are bon mwakoron te reta mairoun te abotoro are Bauro nakoia Aika Itiaki i Biribi.

Kakaei Bwaai Aikai

Wareka “Entertainment and Media” mwakoro inanon Ibukin Kakorakoraia Kairake (iteraniba 17). Te kakukurei are ko rineia e iri nanon katei aikai ao ma te katebwi ma teniua n taekan n te onimaki? Iangoia ni koreia inanon tienoo arom bwa ko kanga ni kakabwaiaki man karaoan rineakin rongorongo aika raraoi.

Te Raoiroi

“Raoiroi ‘bon tamnein te iango ao te katei are aanaki iaon katei aika rietata’ (Taekina Au Euangkerio, 118). E katabwanina te itiaki ao itiakin te katei. Te Raoiroi e moanaki n te nano ao te iango….Bon ikoikotan ngaa babaire aika uarereke ao mwakuri…. Aine ao mwane aika iai irouia te raoiroi ae rau ao te korakora n te nano. A bon rauaki bwa bukina bwa a tau ni karekea ao ni kairaki iroun te Tamnei ae Raoiroi.”

Elaine S. Dalton, Aia beretitenti ni kabuta Kairake n Ataeinaine, “Te Oki nakon te Raoiroi,” Riaona, Nobembwa 2008, 78–80.