Ko na riai n ira te Tieminari
Te katautau ae reke iroun te rao ae buoka bitakin maiu.
“Lisa, ko riai n ira te tieminari,” Ashley e taekina ae e na tii nooria. Imatara bon nnen beebwa ni kawakinaki aika kaoti tauan mwiin kiraati aika rineaki ibukin te reirei n te ririki are imwiina, ngkana ti a moana irakin te reirei ae rietata.
I taraia raou n akea au iango,n tokina I a matangare. I rawa n tuangnga, bwa te tieminari bon te bwai ngkoa n au iango. Bon te membwa ngai ngkoa ae I aki bati ni kakaonimaki n te Ekaretia, ae bon arou ngkoa ni mwaitin maiu. Inanon ririrki aika mwaiti, I a tia n ataa te euangkerio ma I tuai ni karekea korakoran kakoauakina ao koauana.
Ngke I a oki nakon mweengau imwiin te reirei n te bong anne, tamnein te tieminari e a moanna ni karika te kamimi nakoiu. Ashley, ao raou naba ake tabeman, a taraa n ae a ingainga n ni kan kaainna. Iai irou te nano ni kan karaoa are a karaoia raraou, e ngae ngke I aki oota n te bwai ae a karaoia. Imwiin maroroakinan au baire ma au karo ao ni karekean aia kariaia, I a motikia bwa N na ira te tieminari n au moan ririki n te reirei ae rietata.
I aki ataia bwa e na korakora te kairoro man te mwakuri ae bebete are na reke inanon maiu. Au moan ririki n tieminari e bita maiu n aron are I a kona n nooria ngai ma tabeman bwa natin te Atua, e tangiraki ao ni kakawakinaki. I a moana nakou nakon te taromauri ni katoa Taabati, n aki tabeakina aki kakaonimakiia au utu.
I a tia ni kabanea au reirei n ae rietata, ma N na bon kukurei n tainako ibukin te tieminari. Inanon te aoa anne ni katoa bong, a reke boon au tataro ao e a kamatoaki au koaua. E buokai te tieminari ni katauraoai ibukin au mare n te tembora ao ni kaungai ni kakorakoraai n riki bwa te aomata ae raoiroi.
I ataia bwa te Atua e tabeakiniira n tatabemanira nako. I ataia bwa te tieminari bon te kakabwaia are buokai ni kateai iaon te baa ae matoatoa inanon Iesu Kristo. N na kaungako bwa ko na ira te tieminari. E na bita naba maium.
Tamnei iroun Doug Fakkel