Tānaki Atu ʻa e Ongo mo e Vitiō ki he ʻĀkaivi ʻo e Konifelenisí ʻo kamata mei he 1971.
Kuo tānaki ʻe he Siasí ha ʻākaivi ʻo e ongó mo e vitioó ki he konga ʻo e konifelenisi lahí ʻi he LDS.org. ʻi he feinga ke tokoniʻi e kāingalotú ke nau lava lelei ange ʻo maʻu e faleʻi ne fai ʻe he kau palōfita mo e kau ʻaposetolo ʻofeina ʻo e kuo hilí mo e lolotongá.
ʻI heʻene aʻu ki Sune 2012, ʻe maʻu ʻi he ʻākaivi he ʻInitanetí, ʻi he lea faka-Pilitāniá, ʻa e ongo pea mo e vitiō ʻo e konifelenisi lahi kotoa pē mei ʻEpeleli 1971 ki he lolotongá ni. Kimuʻa atú, ko e fakamatala pē ʻo e ngaahi konifelenisí ʻo kamata mei he 1971 naʻe maʻú; ko e vitiō he lea faka-Pilitāniá naʻe kamata pē mei he 2002. Pea ʻi Sune 2012 ai pē, ʻe tuku atu ʻe he Siasí ha ngaahi ongo mo e vitiō ʻo e ngaahi malanga konifelenisí ʻo kamata mei he 2008 ʻi ha ngaahi lea fakafonua kehe ʻe 70 tupu.
Naʻe pehē ʻe ʻEletā Petuliki Kealoni ʻo e Kau Fitungofulú, “Neongo ko e tokolahi taha ʻo e kāingalotu ʻo e Siasí ʻoku nau omi ki he konga ʻo e konifelenisi lahí he LDS.org ke lau, mamata, pea mo fanongo ki he ngaahi malanga konifelenisi fakamuimuitahá, ʻoku toe tokanga pē mo ha kāingalotu tokolahi ke maʻu e ngaahi konifelenisi he kuohilí. Ko e taumuʻa ʻo e ngāué ni ke lava ʻo maʻu ngofua ange ʻe he kāingalotu ʻo e Siasí he funga ʻo māmaní ʻa e ngaahi pōpoaki ʻo e konifelenisí.”
ʻOku toe tānaki foki ʻe he Siasí ha ngaahi hiva ki he ʻākaivi ʻo e konifelenisí. ʻI he lolotonga ní, ʻe lava ʻa e kāingalotú ʻo fanongo ki he hivaʻi ʻe he Kuaea ʻo e Tāpanekale Māmongá ha ngaahi hiva ʻo kamata mei he 2008 ʻaki haʻanau lomiʻi ʻi he Show Music ʻi ʻolunga ʻi he konga ki he konifelenisi takitaha ʻi he LDS.org. ʻOku ʻi ai ha ʻākaivi hiva foʻou (GCmusic.lds.org) ʻokú ne fakaʻatā ʻa e ngaahi fekumí ʻi ha ngaahi ʻākaivi mo ha ngaahi konifelenisi kehekehe.
Kuo ʻosi ʻi ai ha ngaahi palani ke ʻoua naʻa ngata pē hono fakaʻatā ʻo e ngaahi ʻākaiví ʻi he LDS.org ka ʻi he Churchʻs mobile apps foki, hangē ko e Gospel Library app, mo ha ngaahi fakafehokotakiʻanga kehe, kau ai ʻa e Mormon Channel ʻi he Roku mo e YouTube.
ʻE lava he taimí ni ʻo fai ha fanongo ki he ngaahi fasi ʻo e ʻū fakataha kotoa ʻo e ngaahi konifelenisí ʻo kamata mai mei he 2008 pe maʻu mei he GCmusic.lds.org.