ʻEletā Scott D. Whiting

ʻO e Kau Fitungofulú

ʻOku tui ʻa ʻEletā Sikoti Tueini Uaitingi naʻe makatuʻunga hono ngaahi faingamālie ʻi he moʻuí ke tokoni ki he ʻOtuá ʻi ha ngaahi fili mahuʻinga siʻisiʻi.

Naʻe fāʻeleʻi ia ʻi ʻEpeleli kia Tueini mo Pevalī Uaitingi, pea tupu hake ʻa ʻEletā Uaitingi ʻi Sōleki Siti, ʻIutā ʻi he USA. ʻOkú ne ongoʻi ko ʻene ʻuluaki fili mahuʻinga tahá ʻa ʻene fili ke ngāue fakafaifekaú, pea hoko atu ai mo e lōloa ke ngāue aí. Tuʻunga ʻi he ngaahi tūkunga ʻo hono taimí, naʻe ʻi ai ai ha fili ʻa ʻEletā Uaitingi pe ʻe ngāue ʻi ha māhina ʻe 18 pe taʻu ʻe ua. Naʻá ne pehē, “Ko ʻeku fili ko ia ke ngāue ʻi ha māhina ʻe ono makehé naʻe fuʻu mahuʻinga ia ʻi hono teuteuʻi au ke ngāue ki mui ange ʻi he Siasí.”

Naʻe fetaulaki mo hono uaifi ʻi he kahaʻú, ʻa Seli ʻOlosoni ʻo tuʻunga ʻi hano kaungāmeʻa, hili ʻene ngāué ʻi he Misiona Siapani Tōkiō Noaté. Ko ha toe fili mahuʻinga foki ʻe taha ʻa ʻene fili ko ia ke mali mo iá. Naʻe silaʻi kinaua ʻi he Temipale Sōlekí ʻi ʻEpeleli 1984.

Hili hono maʻu ʻe ʻEletā Uaitingi hono mataʻitohi BA he lea faka-Siapaní mei he ʻUnivēsiti Pilikihami ʻIongí, naʻá ne toe maʻu ki mui ange hono mataʻitohi toketā laó mei he Akoʻanga Lao MekiSiaosí (McGeorge School of Law) ʻi he ʻUnivēsiti ʻo e Pasifikí.

Ko ha toe fili mahuʻinga ʻe taha naʻe pau ke fai ʻe ʻEletā Uaitingi ko e taimi naʻá ne tali ai ha ui, naʻe fakahoko ki ai ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, ke hoko ko ha pīsope. Naʻe ʻeke ange ʻe ʻEletā Pālati pe te ne fakahoko hono fatongiá ke ʻosi. Naʻe palōmesi ange ki he ʻAposetoló te ne fai ia, pea neongo ʻa e ngaahi faingamālie ngāue totongi lahi naʻe fie maʻu ai ke hikí, naʻe tauhi pē ʻe ʻEletā Uaitingi ʻa ʻene palōmesí.

Naʻe tokoniʻi ia ʻe heʻene ngāué ke ne maʻu ai ha loto vēkeveke ke “ʻalu ki he ngaahi ʻapi ʻo e kāingalotu māmālohí ʻo tokoniʻi kinautolu ke fakafoʻou pe fai ha ngaahi fuakava mo e ʻOtuá.”

ʻOku ʻi ai ha fānau ʻe toko nima ʻa e fāmili Uaitingí. Kimuʻa pea ui ia ki he Kōlomu ʻUluaki ʻo e Kau Fitungofulú, naʻá ne ngāue ki ha kautaha fakatau kelekele ʻi Hauaiʻi. Naʻe ʻosi hoko ʻa ʻEletā Uaitingi ko ha palesiteni ʻo e kōlomu ʻo e kaumātuʻá, pīsope, aleaʻanga māʻolunga, palesiteni ʻo e Kau Talavou he siteikí, palesiteni fakasiteiki, mo e Fitungofulu Fakaʻēlia.