Pīsope Gary E. Stevenson

Pīsope Pulé

ʻOku pehē ʻe Pīsope Keuli ʻĒveni Sitīvenisoni kuó ne tuku ha konga lahi ʻo ʻene moʻuí ki hono siofi e ngāue mahuʻinga ʻoku fakahoko ʻe he kau pīsope ʻi he funga ʻo e māmaní. Naʻá ne pehē ko ʻene tamaí, ko e “pīsope ia heʻeku ʻi he toʻu tupú, pea naʻe tokoniʻi lahi moʻoni au ʻe heʻene ngāué.”

Naʻe faʻa fakaafeʻi ia ʻe heʻene tamaí ʻi ha ngaahi meʻa lahi ke na kaungā ʻaʻahi ki ha taha ʻo e kau uitou ʻe toko 60 tupu ʻi honau uōtí. Naʻe ako ʻe Pīsope Sitīvenisoni mei heʻene tamaí ha ngaahi meʻa mahuʻinga fekauʻaki mo e ngāue faka-Kalaisí pea mo hono tokangaʻi ʻo kinautolu ʻoku faingataʻaʻiá. Naʻá ne pehē ko e ngaahi meʻa mahuʻinga ko iá ʻe tokoni lelei ia kiate ia ʻi hono fatongia ko e Pīsope Pule ʻo e Siasí.

Naʻá ne pehē, “ʻOku hoko moʻoni ʻa e kau pīsope ʻo e Siasí ko hoku kau moʻungaʻi tangata. ʻOku nau tokoni ʻi he ʻaho kotoa pē ki he kāingalotu ʻo e Siasí, ʻo tautautefito ki he kau talavoú mo e kau finemuí.”

Naʻe fāʻeleʻi ʻa Pīsope Sitīvenisoni ʻi ʻAokosi 1955 kia ʻĒveni N. mo Viela Siini Sitīvenisoni, pea tupu hake ai ʻi ha fāmili ko ha hako ʻo e kau paioniá ʻi he Teleʻa Kesí ʻi ʻIutā.

Naʻá ne tali ʻi heʻene kei talavoú ha ui ke ngāue fakafaifekau ki Siapani. Naʻe fakatō ʻe he ngāue ko iá kia Pīsope Sitīvenisoni ha ʻofa ki ʻĒsia pea mo hono vahevahe ʻo e ongoongoleleí ʻi heʻene moʻuí kotoa.

Naʻe hū ki he ʻUnivēsiti ʻo e Siteiti ʻo ʻIutaá hili ʻene foki mai mei heʻene ngāue fakafaifekaú. Ko e feituʻu ʻeni naʻá ne fetaulaki ai (pea ʻofa) ʻia Lesa Seini Hikilī. Naʻe mali ʻa e ongo meʻá ni ʻi ʻEpeleli 1979 ʻi he Temipale ʻAitahō Folo ʻAitahoó. ʻOku ʻi ai ha fānau tangata ʻe toko fā ʻa e fāmili Sitīvenisoní.

Naʻe maʻu ʻe Pīsope Sitīvenisoni ha mataʻitohi ʻi hono puleʻi ʻo e meʻa fakapisinisí peá ne kaungā fokotuʻu kimui ai mo hoko ko e palesiteni ʻo ha kautaha ngaohi nāunau fakamālohisino.

Kuó ne ʻosi ngāue ʻi ha ngaahi fatongia kehekehe ʻi he Siasí kau ai haʻane hoko ko ha tokoni ʻi he kau palesitenisī fakasiteikí, pīsope, mo e palesiteni ʻo e Misiona Siapani Nakoiá (2004–07). Naʻe ui ia ki he Kōlomu ʻUluaki ʻo e Kau Fitungofulú ʻi he 2008 ʻo ne hoko ko ha tokoni pea mo e palesiteni ʻo e ʻĒlia ʻĒsia Tokelaú.