ʻEletā Larry Echo Hawk

ʻO e Kau Fitungofulú

Talu mei he ʻaho naʻe fanongo ai ʻa ʻEletā Leli ʻEko Hooki ʻi he 1972 ki he meʻa ʻa ʻEletā Sipenisā W. Kimipolo (1895–1985) fekauʻaki mo ʻene sioloto ki ha hoko ʻa e Kakai Tuʻufonua ʻo ʻAmeliká ko ha kau taki kuo akoʻí, mo ʻene līʻoa ʻene moʻuí ki hono “tokoniʻi ʻo e kakaí.”

Ko ʻEletā ʻEko Hōkí ko ha mēmipa ia ʻo e Matakali Pōní (Pawnee Nation) pea naʻe fāʻeleʻi ia ʻi Kouti ʻi Uaiōmingi ʻi ʻAokosi 1948 kia ʻĒnesi mo Seini ʻEko Hooki. Naʻe tupu hake ʻi Fāmingitoni ʻi Niu Mekisikou ʻi he USA, ʻa ia naʻe akoʻi ai ia mo hono fāmilí pea mo papitaiso ʻe he kau faifekau ʻo e Siasí ʻi he 1962.

ʻI hono taʻu 17, naʻá ne palōmesi ai ki he ʻEikí hili ha tau ha pulu peisipolo ʻi hono matá, kapau he ʻikai kui, te ne lau ʻa e Tohi ʻa Molomoná. Naʻe toe lava pē ʻo sio peá ne lau leva ha peesi ʻe 10 ʻi he ʻaho ʻi ha meimei māhina ʻe tolu.

Naʻe pehē ʻe ʻEletā Hooki, “Ko e meʻa fakalaumālie māʻolunga taha ia kuo faifaiangé peá u aʻusia, ʻi hono fakamoʻoniʻi mai ʻe he Laumālie Māʻoniʻoní kiate au ʻoku moʻoni e Tohi ʻa Molomoná. Kuo fakaivia au ʻi heʻeku moʻuí kotoa ʻe he meʻa ko iá ʻo tokoniʻi au ke u fakalakalaka.”

Naʻe fakaafeʻi ia ki he ʻUnivēsiti ko Pilikihami ʻIongi—Polovó ʻi ha sikolasipi ʻakapulu pea maʻu ai hono mataʻitohí ʻi he sipotí (physical education) mo e ako ki he fanga monumanú (zoology). Naʻe tukuange fakalāngilangi ia ʻi he 1970 mei he Tautahi ʻa e ʻIunaiteti Siteití (United States Marine Corps) ʻi ha ʻosi ia ha taʻu ʻe ua ʻo ʻene ngāué. Naʻe ʻosi mei he ʻUnivēsiti ʻo ʻIutaá mo ha mataʻitohi ko e toketā ʻi he laó ʻi he 1973.

Naʻe hoko ʻa ʻEletā ʻEko Hooki ko ha loea, taha falealea he siteití, loea pule ʻo e siteití, palōfesa lao ʻi BYU, mo e Tokoni Sekelitali ʻi he Potungāue ki he Ngaahi Meʻa Fakalotofonua ʻa e Kau ʻInitiá (Department of the Interior for Indian Affairs)—ʻa ia ko ha tuʻunga naʻe pau ke fakafisi mei ai ka ne tali e ui ki he Kōlomu ʻUluaki ʻo e Kau Fitungofulú.

Naʻe fakahoko ʻe ʻEletā Kimipolo e mali ʻa ʻEletā ʻEko Hooki mo hono uaifi ko Teli Palaisí, ʻi he Temipale Sōlekí ʻi Tīsema 1968. Naʻá ne tokoni kiate ia ʻi heʻene hoko ko e faiako, pīsope, aleaʻanga māʻolunga, pea mo e palesiteni fakasiteikí. ʻOku ʻi ai ʻena fānau ʻe toko ono.