ʻEletā Robert C. Gay

ʻO e Kau Fitungofulú

ʻOku faʻa lea ʻa ʻEletā Lōpeti C. Kei ʻi hono ngaahi fatongia ʻi he Siasí fekauʻaki mo e pōpoaki ʻa Sīsū Kalaisí ko ha “ongoongolelei ʻo e fakatauʻatāina”.

Naʻe pehē ʻe ʻEletā Kei fekauʻaki mo ia pea mo hono uaifi ko Līneti Nilasoni Keí, “Ko ha meʻa ia kuó ma mamata mo foua ʻi heʻema moʻuí kotoa. ʻOkú ma hū ki he ʻOtua ʻo e fakatauʻatāina: fakalaumālie, fakaesino, fakaʻatamai, pea mo fakaelotó. ʻOku lava ke toʻo atu ʻetau ngaahi kavengá kotoa ʻi he Fakalelei ʻa Kalaisí. ʻOku tau maʻu ʻa e mālohi, nonga, pea mo e ʻaloʻofa ʻoku fie maʻu ke tau matuʻuaki ʻaki e ngaahi ʻahiʻahi ʻo e moʻuí pea foki ki heʻetau Tamai Hēvaní.”

ʻOku maʻu ʻe ʻEletā Kei ʻene fiefia lahi tahá mei he tokoni ʻofa fakaetangata kuo tāpuakiʻi ʻaki ia mo Sisitā Kei ke na fakahokó, ʻo fakatou tatau pē ʻi muli pea toe ofi ange ai ki heni. Hangē ko ʻení, kimuʻa pea ʻi he hili ʻo ʻene hoko ko e palesiteni ʻo e Misiona ʻAkalā Kaná mei he 2004 ki he 2007, naʻá ne ngāue mo Sisitā Kei ʻi ha fanga kiʻi kolo iiki ʻi ʻAfilika pea mo ha ngaahi feituʻu kehe, ke langa ha ngaahi faleako mo ha ngaahi ʻōfisi fakafaitoʻo pea mo tokoni ʻi hono faʻufaʻu ha ngaahi polokalama ki he laukongá mo e nō īkí. Kuo tokoni e ngaahi kautaha naʻá na kau ʻi hono fokotuʻu mo hano ngaahi kaungā ngāue ʻi hono hiki hake siʻa kakai masiva ʻe lauimiliona ʻi he funga māmaní.

Naʻe fāʻeleʻi ia ʻi Sepitema 1951 ʻi Losi ʻEniselisi, Kalefōnia ʻi he USA, kia Pila mo Mele Kei, pea naʻe fakafeʻiloaki ia ki hono uaifi ki he kahaʻú ʻe hano kaungāmeʻa mei he akoʻanga māʻolungá, ʻa ia naʻá na tokoniʻi ki mui ange ke kau ki he Siasí. Naʻá na mali ʻi he Temipale Losi ʻEniselisi Kalefōniá ʻi ʻEpeleli 1974 pea ʻoku ʻi ai haʻana fānau ʻe toko fitu.

Naʻe toe maʻu ʻe ʻEletā Kei hono mataʻitohi BA mei he ʻUnivesiti ʻo ʻIutaá pea mo hono mataʻitohi toketaá mei he ʻUnivesiti Hāvatí, ʻa ia naʻe toe faiako ai ʻi he ʻekonōmiká.

Naʻe kau ʻa ʻEletā Kei ʻi he ngāue maluʻi paʻangá (private equity) ʻi ha taʻu ʻe 25 tupu, ʻo ne ngāue fakavahaʻa puleʻanga ki hono fakahū e paʻangá mo fakatupu e pisinisí.

ʻI he taimi naʻe ui ai ia ki he Kōlomu ʻUluaki ʻo e Kau Fitungofulú, naʻá ne lolotonga hoko ko ha Fitungofulu Fakaʻelia ʻi he ʻĒlia Tongahahake ʻo ʻAmelika Noaté. Makehe mei heʻene ngāue fakafaifekau taimi kakato ki Sipeini mei he 1971 ki he 1973, kuo ʻosi hoko ʻa ʻEletā Kei ko ha tokoni pīsope, aleaʻanga māʻolunga, kulupulita ʻo e kau taulaʻeiki lahí, faiako Tokātelinen ʻo e Ongoongoleleí, taki faifekau fakauooti, pea mo ha palesiteni ʻo e Kau Talavoú he uōtí.