Usa ka Sakripisyo apan Hingpit ANG Kalipay
Ang akong tinguha nga magserbisyo og usa ka misyon hapit mawala tungod kay nalipay na ko sa akong kinitan.
Sa sayis anyos pa ko, gikahimamat sa akong mama ang mga misyonaryo ug mipasakop sa Simbahan sa Ghana, Africa. Gibiyaan siya sa akong papa nga may lima ka anak, apan ang mga pagtulun-an sa Simbahan nagtabang sa among pamilya nga kanunayng lig-on. Kami mipangga sa matag usa ug dunay kalinaw sa among panimalay. Ganahan kong mosimba kuyog ni mama ug nalingaw sa pagtambong og mga klase sa Primary ug hangtud sa seminary.
Isip usa ka batan-ong lalaki gitawag ko nga ward missionary ug nalingaw sa pag-proselyte kuyog sa mga misyonaryo. Nakita sab nako ang pipila ka mga batan-ong lalaki sa among ward nga nangadto og misyon. Dihang nauli na sila, mga lahi na sila. Mas maalam na sila ug hingkod, sa pisikal ug sa espritwal. Ang magulang nako nga lalaki nagmisyon usab. Dihang miuli na siya, nakita nako ang daghang kalamboan sa iyang kinaiya. Kanunay kong nangutana sa kaugalingon, “Unsa man ang naa sa misyon nga miusab ug mipalambo pag-ayo niining mga tawhana?” Nadasig ko nga magmisyon.
Pagkahuman nako sa high school, nagtrabaho ko aron makatigom og kwarta alang sa misyon. Sa wala madugay ang akong tinguha nga magmisyon nawala tungod kay nalipay nako sa akong kinitaan. Usa gayud ka sakripisyo ang pagmisyon tungod kay ang akong kinitaan nakatabang sa pagsuporta sa akong pamilya. Sa matag higayon nga sugdan nako sa pagsulat ang mga porma sa akong pagmisyon, maghunahuna ko mahitungod sa kwarta nga akong mabiyaan, ug akong ibutang ang mga porma ug mopadayon sa pagtrabaho.
Dihang ang akong mga higala nanglarga na sa misyon, dili maayo ang akong gibati tungod kay nahibalo ko nga angay gayud usab kong mangandam nga moadto. Tungod niini gisuta nako ang akong kaugalingon. Naghunahuna ko, “ang pagpaluyo sa propeta ug sa akong mga lider dili lamang ang pag-isa sa kamot. Pagbuhat kini sa unsay ilang gisulti ug pagsunod sa mga sugo sa Langitnong Amahan.”
Karon na ang panahon sa pag-alagad og misyon, mao nga gisumiter nako ang akong mga papeles sa misyon ngadto sa bishop. Ikaduha kadto nga pinakamalipayong adlaw sa akong kinabuhi. Ang pinakamalipayong adlaw mao kadtong gitawag ko sa akong bishop ngadto sa iyang opisina ug mihatag kanako og puti nga envelope nga gisudlan sa tawag sa akong pagmisyon ngadto sa Nigeria Ibadan Mission. Puno sa kalipay ang akong kasingkasing.
Didto sa missionary training center, mas nadugangan ang akong kahibalo sa mga doktrina sa ebanghelyo ug nakakat-on og talagsaong mga butang. Nadawat usab nako ang kaugalingon nakong endowment sa templo. Mapasalamaton kaayo ko tungod sa akong desisyon nga magmisyon, ug wala gayud akoy pagmahay niini. Ako usab mitubo sa espirituhanong paagi sa akong misyon. Nagtuo ko niini kay nakatabang ako sa mga tawo nga makadawat sa sama nga mga panalangin sa ebanghelyo nga nagdala og hilabihang kalipay ngari kanako ug sa akong pamilya.
Litrato sa maayong kabubut-on ni Edward M. Akosah