Riki bwaAomatan te Raoi
Te tembora, taian mition, ao te mwakuri n ibuobuoki a buoka Roger ma ana utu ni mwaing ni karikiia bwa te utu ae akea tokina.
E ataia Roger Randrianarison bwa iai te bwai teuana ae bua man maiuia ana utu.
“I tataro nakon te Atua bwa e na buokai ni kunea te bwai teuana ni kairan au utu,” e taku. “Iai te bwai ae I tangiria ni kaira au utu iai n te bwai ae tamaroa, te bwai teuana ae e na kairiiri nakon te kawai ae eti.”
E tabeaianga nanona bwa e na kanga ni karikirakeiia teniman ataei—natina mwaane, Randrianandry ao Sedinirina, ao natina te aine, Nirina. E nanokawaki bwa kakai rotakina n te un e kariki kaangaanga n ana utu. E tangiria n riki bwa te karo ae akoi riki.
“I motika nanou bwa ngai ae N na bitaki ibukina bwa I noria bwa te aeka n aomata tera ngai are I a tia n riki n aekana,” e taku.
E bua ana karikirake ni kateitei Roger tabeua ririki n nako ao e a mwamwakuri bwa te turaiwa n te taekiti i Antananarivo, Madagascar (te aba teuana n te West Indian Ocean). N tetaina e katokaiia uoman mitinare aine.
“Ngke a rin n te ka, a titirakinai arau ao ngkana iai au utu,” e taku. “A titiraki ngkana I ataia bwa antai te Atua ao ngkana I tatataro Nakoina.”
A anenei kuna mitinare ma Roger i nanon butiia n te ka ao a kaoa nakon te taromauri n te umwantabu. E keiaki ni mwananga (nakon te taromauri) n tabetai ma e aki kona n nakoraoi iriiran bobotaki irouna ni kaineti ma ana tai, ao e toki reitakina ma mitinare.
Tao nimaua namwakaina rimwi riki e tabe ni mwakuri Roger ni mwengana n tetaina ngke e ongo bwanaia uoman mitinare ake a tabe n taetaenikawai nakon temanna i tinanikun ana o. E ataia Roger bwa a na kawaria ni maroro ma ngaia. E namakina are e riai ni kaekaiia n eng nakon titiraki ake a na titirakinna iai.
I mwin tian kaotakiia bwa antai ngaiia, a titirakinna mitinare ngkana e a tia n ata taekan te Atua. Eng. E tangiria n tataro nakon te Atua? Eng. E tangiria n taetae nakoiia mitinare? Eng. N ningai? Ngkai. A taetae mitinare bwa a na manga okiria i nanon 20 te miniti. Ngke a oki, a airi ma temanna kaain te aro are a maeka n uakaan ma ngaia.
E mwaiti te tai are a reireina Roger mitinare i nanon teuana te namwakaina n ana auti. Ibukin baike a aki raraoi n taekan te Ekaretia ake a tia n ongo, nikiran ana utu a aki kan kekeiaki ma mitinare. I mwin teuana te namwakaina reiakinan taekan te euangkerio, e a ira te tataro Roger ma mitinare n te umwantabu. Aroia membwa ni butimwaia ma te akoi n te umwantabu e tiku mwina irouna bwa te bwai ni kakukurei. “A butimwaeai membwa kanga ai aron are a kaman kinaai n te tai ae maan,” e taku.
E okira mwengana man te umwantabu Roger ao e tuangiia kaain ana utu bwa e nang bwabetitoaki n te namwakaina ae na roko ao ngaiia iai inaaomataia ni kona n rinerine bwa a na kaaina te Ekaretia ke a na aki. A butia bwa e na tataninga bwa a aonga ni kona n iria. A moana iriirakin bobotaki ao a mimi ma ni kukurei naba.
Te moan tai are e iriiri bobotakin te Ekaretia iai e tiku betina ae maan iroun ana karimoa n nati ni mwaane Roger, Randrianandry. “Te moan tai are I roko iai n te umwantabu I rang ni mimi ibukina bwa aomata a rang n nanorinano,” e taku. “Te moan a bwairaraoi nakon te umwantabu. I mwin anne I a ataia raoi bwa ngaia ni menaia ikeikei bon iai bukina, tiaki te kan tiroaki i mataia aomata.”
A bwabetitoaki te Randrianarisons ni bane n aia utu ni Beberuare 20, 2003. Ngke 8 ana ririki Nirina, Sedinirina 17, ao Randrianandry 19. A toki man te mwakuri te utu aei n Tabati nako ao a moanibwaia maiuakinan te euangkerio.
Bitaki
“I mwin tian bwabetitoakiu, I noria bwa e bati te bitaki ni mwengara,” e taku Arelina, bun Roger. “E riki bwa te mwenga n tamnei, ao a rang ni bati kakabwaia, ni kauoua bwa n aonteaba ao n tamnei, a reke man maiuakinan te euangkerio.”
Man te taratara n aonteaba, e kamoa Tamara are i Karawa Roger ngke e buokia ni manga katea waen ana karikirake. I mwin uoua te ririki ni kabubutitaekiti ao ni karaoi baike e konai ni karekei bwai ibukin ana utu, e moana karerekean ana konturaeki ni kateitei. “I onimaki bwa te Atua e aki toki ni kakabwaiaai n te tai are I baireia n Iriiria,” e taku.
Ma a taku natina mwaane bwa te kabanea ni bubura ni bitaki are a tia n noria bon anuan maiun tamaia. A kabwarabwara tamaia ngkai bwa katoton te nanorinano ao te akoi. E taku Roger bwa e ana nanona te euangkerio bwa e na bitaki. Man te tai are e kamatebwaia, e keiaki Roger ni karaoi bwai aika raraoi ni maiuna.
“Ibukin reirein te euangkerio, I a tuai manga rang kai un, e taku. “N tabetai I kaunaki, ma te euangkerio e a reke bwa mwakoron au namakin, au iango ao tamneiu. E buokai n anganai te rau.”
N reken aroaro n unun, bon Roger are e karekea te raoi irouia membwa n te utu ao e kauringiia bwa a na karaoa are E karaoia te Tia Kamaiu.
“E a nanorinano tamau ao ngkai e a tararua te utu ma te tangira,” e taetae Sedinirina. “Ngkana I ota iai bwa e kanga ni bitaki, I rang ni kakatonga iroun Tamara are i Karawa, ibukin te euangkerio, ao ibukin rikira bwa membwa n te Ekaretia.”
Te Utu Ae Akea Tokina
N 2006, man Te Mwane Ni Buoka ni Kabuta Ni Boutokan Te Tembora, a nako iai Roger ao Arelina nako Johannesburg, Aberika Maiaki, ni kabaeaki n te tembora.
Man 2009 nakon 2011, a karaoa aia mwakuri ni mitinare Sedinirina ao Randrianandry nako Aberika Maiaki—Sedinirina i Cape Town ao Randrianandry i Johannesburg. Mwakoron ungannanoia ni mwakuri bon buokaia utu tabeua ni bitaki, n aron are e a tia n reke n aia utu.
“E kona n reke te kakai ae aron aei, ao e riki ibukina bwa a roko mitinare n ara auti,” e taku Randrianandry. “Ai ngaia are e a reke nanou ni kan karaoa te bwai ae ti tearona nakon te utu teuana n te tabo teuana.”
Te babaire anne e uota te kakabwaia teuana nakon te utu ae te Randrianarison. Iai tetaina ae ruabong te bong iai ngke ngaiia ni kauoman Sedinirina ao Randrianandry a nang mena n te Johannesburg Missionary Training Center. E karaoa kibaia n utu Roger ma Arelina ao natiia te aine, Nirina, nako Aberika Maiaki bwa e aonga aia utu ae bwanin ni kona ni kabaeaki n te tembora. Nirina, 14 ana ririki n te tai anne, e taku bwa e kaangaanga kabwarabwarakin te waki are a mena i nanona ma are e namakinna.
“E kamarurunga au onimaki ao e buokai n namakina kaaniu riki nakon te Atua,” e taku.
N te bong aei a mwakuri membwa n te utu ni kateitei ao ni kamarurungiia ake i rarikiia. E mwakuri Roger bwa te bitiobi n ana uoote. Arelina, e mwakuri n te Moanrinan n Reirei ma te Onimaki n ana buroukuraem te Atua. Sedinirina, ngaia te tia ibuobuoki ni kiraka n te titeiki. Randrianandry te tia ibuobuoki ni kiraka n te uoote. Nirina e tarekita n te katangitang n te uoote.
E riki te euangkerio bwa kaekan taian tataro ni mwengan te utu ae Randrianarison. E kamaoi maraki man tai ake a nako, e reitia riki n aia utu, ao e anganiia aia tai n ikotaki n aki toki. E reiakina Roger bwa e na tatangira. “Te maiu n utu,” e taku, “bon te maiu ae on n te tangira.”
Katokaakiia mitinare n te taekiti e moana kawaina Roger Randrianarison n riki bwa ana reirei Kristo.
Tamneia ana utu Randrianarison mai iroun Matthew D. Flitton
Kamatebwaian te euangkerio n te utu e buoka ana utu Randrianarison n rikirake ni kaan riki ni bobotakiia.
Te mwananga nako Aberika Maiaki ni kabaeaki n te Johannesburg Tembora e kakorakoraiia ana utu Randrianarison.
I eta: tamnei mai iroun David William Newman © IRI; i nano: tamnei © Laura Parker