Kairake ao Berita aika Tabu n te Tembora
Man kauarerekean te ririki ibukin te mwakuri ni mitinare ae bwanin taina, tebwina tengaa riki kairake a karaoi ngkai aia berita aika tabu n te tembora.
N tabera bwa taan ni mwakuri n te tembora, ti a tia ni karekea te kakabwaia ni kaitibo ma kairake n ikawaki aika a roko nakon te tembora ni karekei aia entaumente. Ti a tia ni kunea bwa te tiemina ibukin te katauraoi nakon te tembora e bon rangin n ibuobuoki nakoia, ma man aia kairoro kaaro ao taan kairiiri aika tikiraoi a karaoa te tabe ae moan te kakawaki ni buokia ni katauraoia ni karaoi berita aika tabu n te tembora. N tabera ni karo ao ni kairiiri, ti kainnanoia bwa ti na buokia kairake tiaki n ti katauraokia ibukin te mwakuri ni mitinare ae bwanin taina, are e kabanea ti tabeua te namakaina, ma ibukin naba karaoan ao kawakinan berita aika tabu n te tembora, are ibukin te maiu are akea tokina. A kona moani mwaneka ni moanaki n am tai n ataei.
Katauraoakia Ataei
A kona karo ni kaotia nakoia natia kakawakin te tembora man te nebonebo n te tembora ao man tibwauakin aia kakoaua n te mwakuri n te tembora. Riki n tabo are e kangaanga iai te nakon te tembora, a kona karo ni karinna inanoia natia te nano ni kan nakon te tembora.
Beretitenti Howard W. Hunter (1907–95) e reireinia kaaro: “Ti a tibwauaia ma natira te namakin n tamnei are ti karekea n te tembora. Ao ti na reireinia riki ma te koaua ao ni bwai riki aika ti kona n taekina iai te kantaninga n ana auti te Uea.”1 A kainnanoia ara ataei bwa a na ataia bwa te tembora bon te tabo are ti a tia ni karekei mai iai titiraki nakon taian tataro ao te tabo are ti karekea iai ana tangira te Atua.
A kona karo naba n reireinia aia ataei n ingainga nakon ao ni maiu n ae tau nakon aia rekomente ae katauaki are e karekea aia tai n tau ngkana a koro 12 aia ririki ni maiu. Ngkana e roko te tai ibukia kairake aikai bwa ana kaea, ti nora te kimwareirei ao te kamoamoa ngke a kaoti beeba ni kariaia n te tembora.
Katauraoakia Kairake
A kona karo ni buokia aia ataei ni kakae n rongorongon te utu n te aro bwa ngkana a koro 12 aia ririki a kona ni uoti araia kain te utu nakon te tembora. Nakoia kairake ake a karaoia, E a tia Unimwaane David A. Bednar man te Kooram n Abotoro n te Tengaun ma Uoman ni berita: “Am tangira ao am kakaitau ibukia am bakatibu a na rikirake. Am koaua ibukin ao rairakim nakon te Tia Kamaiu e na nano man teimatoa. Ao I berita bwa ko na kawakinaki man rikiraken ana kairoro te tia kakaitara.”2
Ti a tia n nori katoto aika mwaiti n te berita aei aika a korobukia. N te tai ae aki maan n nako e tuangira te kairake n aine bwa imwin ana ukeuke iaon aran tinana, e a tia n roko n te tembora ni karaoa te mwakuri ibukina. E taekinna ngke e bwabetitoaki ibukina, iai nanona ae itiaki bwa e na butimwaia tibuna te unaine n te maiu are e na roko. Taneiai n aron koaua aika kakorakoraki aikai ao ni karekea te nano n iri mwakuri iaon otenanti riki tabeua n te tembora.
A mwaiti kairake aika a kaitara ma kariri ni bwaini kunikai aika aki riai. Ngkana karo ao taan kairiiri a bwaini kunikai aika a tamaroa, kunikai aika tararaoi a na namakinna kairake bwa a kona naba ni karaoia. A kainnanoia n ataia kairake bwa aron aia kunnikai ao n tararua rabwataia e kona ni kaota aroia n riki bwa taan irira Iesu.
A kona karo ni buokia kairake ni katauraoia n rin n te tembora ni buokia n atai berita aika tabu aika a na karaoi ikekei. Berita aika tabu n te tembora a raonaki ma berita ni “kamatebwaia tuan kawakinan te tamaroa ao te itiaki, ni bwaina te akoi, te tangira, ni butimwai iango aika kakaokoro ao n itiaki; kamanena am tarena ao am bwai nakon kabutanakoan te koaua ao tabekakirakean te [utu]; ni kateimatoa te nano nakon aan te koaua; ao n ukeukeria ni kawai ni kabane n ibuobuoki nakon te katauraoi ae tamaroa bwa e aonga te aonaaba n tauraoi ni kareke ana King—te Uea Iesu Kristo.”3 A kona karo ni kakoaua bwa a na karekei bon irouia ao kakabwaia aika a mwaaka kairake inanon maiuia ngkana a kawakin berita aika tabu aikai, ao a na riki n iai riki nanon berita aika tabu aikai nakoia kairake ngkana a buokia aia karo n ataia bwa kakabwaia ao berita aika tabu a kona ni karaoaki rinanon Ana Mwakuri ni Kamaiu Iesu Kristo.
A mwaiti kawai aika ti kona iai ni buokia natira ao kairake ni karekei kakabwaia man te tembora. Ngkana a rangin n tauraoi, ao ana bon kona n namakina te rau ao n namakina te Tamnei ao ni kona ni karekei atatai n tamnei aika tamaroa ngkana a karekei aia entaumente. Te taneiai n te tembora ae e kakorakora e na karikia bwa ana reirei Kristo ao mitinare aika tamaroa riki—unga nanona ni buokia naake a reireiniia ni katauraoia ni karekei oin aia otenanti aika tabu n te tembora.
Kamataata n te Tamnei iroun Steve Kropp.