Savali a le Au Peresitene Sili
Seleselega a le Atua
Ata na tusia e Andrew Banneker
Sa galue se tamaitai e igoa ia Christa mo se taimi i se kamupani fatu laitiiti. Sa fiafia o ia i lana galuega. O se punavai ofoofogia tele ona o nei tamai fatu taitasi ninii sa ia faatauina atu sa i ai le mana e liua ai o ia lava i se mea e matuai faavavega lava—se karoti, se kapisi, e oo lava i se laau maoae o le aruna.
E fiafia Christa e nofo i lana komepiuta ma faia oka ma taliina fesili. Ae i se tasi aso na ia maua ai se faitioga na le mautonu ai o ia.
“E le lelei fatu,” o le tala lea a le tagata faatau. “Sa ou faatauina i le lua masina talu ai ae e leai lava se mea o tupu.”
“Na e totoina i se eleele lelei ma tuu atu i ai ia lava le vai ma le susulu o le la?” O le fesili lea a Christa.
“Leai, ae na ou faia la’u vaega,” na tali atu ai le tagata faatau. “Sa ou faatauina fatu. Ae maise lava, ua faamaonia e ola.”
“Ae e te le’i totoina?”
“E leai. O lona uiga o le a palapala ai o’u lima.”
Na mafaufau Christa i lenei mea ma filifili ai ina ia tusia ni taiala o le totoina. Sa ia filifili po o le a le uluai taiala o le a i ai: “E tatau ona e mulimuli i faatonuga o le totoina ina ia totogo ae fatu. E le mafai ona e faatulagaina i luga o le fata ma faamoemoe e feola.”
E lei umi ae le mautonu o ia i se isi faaseā.
“E le o feola lelei fatu,” na fai mai ai se tagata faatau.
“Pe sa e totoina i se eleele lelei?” Na tali atu ai Christa. “Pe na e tuuina atu i ai le aofaiga talafeagai o le vai ma le susulu o le la?”
“Oi, ioe,” sa fai mai ai le tagata faatau. “Sa ou faia uma lava―e pei lava ona fai mai i luga o le pepa. Ae lei aoga.”
“Pe na i ai lava sina mea na tupu? Pe na totogo ae?”
“E leai se mea na tupu,” o le tala lea a le tagata faatau. “Sa ou totoina e pei lava ona faatonuina. Sa ou faamoemoe ia i ai ni tamato mo le taumafataga o le afiafi. O lenei ua ou matua le fiafia lava.”
“Faatali,” o le tali lea a Christa. “O lau tala na e totoina ia fatu ananei?”
“Aua le faavalevalea,” o le tali lea a le tagata faatau. “Sa ou totoina i se vaiaso talu ai. Sa ou lē faamoemoe e vaai i ni tamato i le aso muamua; sa ou onosai. Sei ou faamatala atu ia te oe, sa matuai tele lava le fuiina ma le faatalitali i lena va ma le taimi nei.”
Na iloa e Christa e tatau ona ia faaopoopo i ai se isi taiala: “O nei fatu e mulimulitai i tulafono o le natura. Afai e te totoina fatu i le taeao ma faamoemoe e ai tamato mulimuli ane i lena vaiaso, o le a e le fiafia. E tatau ona e onosai ma faatali mo le galuega o le natura e matala mai i ou luma.”
Sa lelei mea uma seia maua e Christa se isi faasea.
“Ou te matua le fiafia lava i au fatu,” le amata a le tagata faatau. “Sa ou totoina e pei lava ona fautuaina mai e le pepa. Sa ou tuuina atu i ai le vai, sa faamautinoa ua maua le susulu o le la, ma faatalitali seia oo ina iu lava ina latou maua mai so latou seleselega.”
“E foliga mai sa e faia mea uma lava i le ala sao,” o le tala lea a Christa.
“O mea uma lava ua lelei,” o le tali lea a le tagata faatau. “Ae o le mea sa ou mauaina o le sukini!”
“O loo faaali mai e au faamaumauga o fatu na sa e okaina,” na fai mai ai Christa.
“Ae ou te le manao i ni sukini; ou te manao i ni maukeni!”
“Ou te le o malamalama.”
“Sa ou totoina fatu i la’u toga maukeni—le eleele lava e tasi na maua mai ai maukeni i le tausaga ua mavae. Ou te viia lava au laau i aso uma, ma ta’u atu ia te i latou o le a avea lava i latou ma ni maukeni matagofie. Ae nai lo o ni maukeni tetele, lapotopoto, lanu moli, sa ou maua ni sukini uumi, lanu meamata. Matuai tele naua sukini!”
Sa iloa ai e Christa o taiala o le a le lava ma sa tatau ai ona ta’u atu se mataupu faavae: “O fatu e te totoina ma le taimi o le totoina e iloa ai le seleselega.”
O Le Tulafono o le Seleselega
Na aoao mai le Aposetolo o Paulo e uiga i le seleselega a le Atua:
“Aua nei faaseseina outou; e le ulagia le Atua: aua o le mea e luluina e le tagata, o le mea lava lea e seleseleina mai ai e ia.
“O se lulu i la lona tino, e selesele mai ai e ia i la le tino le mea e pala; a o se lulu i la le Agaga, e selesele mai ai e ia i la le Agaga le ola faavavau.
“Aua nei tatou faapalapala i le amio lelei: aua o ona po e tatau ai tatou te selesele mai ai, pe afai tatou te le faavaivai” (Kalatia 6:7–9).
I taimi ua tuanai, na tuuina mai ai e le Alii ia i tatou le poto faaopoopo ma se vaaiga manino i lenei tulafono le masuia:
“E i ai se tulafono, na folafola le maaveesea i le lagi i luma atu o le faavaega o le lalolagi lenei ua faavae ai i luga faamanuiaga uma—
“Ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga” (MF&F 130:20–21).
O le mea tatou te luluina, tatou te seleseleina.
O le seleselega a le Atua e faigata ona malamalama i ai i le mamalu. Ia i latou o e e faamamaluina o Ia, o le anoanoai o Ana faamanuiaga e oo mai i le “fua lelei, e lolomi ma luluina, e tumu ma solo i tua. … Aua o le fua tou te fuaina atu ai, e fuaina mai ai ia te outou” (Luka 6:38).
E pei lava o fatu faalelalolagi e manaomia ai taumafaiga ma le onosai, e faapea foi le tele o faamanuiaga o le lagi. E le mafai ona tatou tuuina la tatou tapuaiga i se fata ma faamoemoe e selesele faamanuiaga faaleagaga. Ae afai tatou te totoina ma faafailele tulaga faatonuina o le talalelei i le olaga i aso taitasi o lo tatou aiga, o loo i ai se avanoa maualuga o le a feola ae a tatou fanau ma fua mai ni fua faaleagaga e sili lona taua ia i latou ma augatupulaga i le lumanai.
O tali a le Atua i a tatou tatalo e le masani ona vave oo mai—o nisi taimi e foliga mai e le oo mai lava—ae e silafia e le Atua le mea e sili ona lelei mo Lana fanau. E mautinoa lava, e i ai se aso tatou te vaai manino atili ai; ma i lena aso o le a tatou iloa ai le agalelei ma le agaalofa o le lagi.
I le taimi nei, o la tatou sini ma le olioli tele o le savavali lea i tulaga aao o lo tatou Matai ma le Faaola ma ola i ni olaga lelei ma mama ina ia mafai ona avea ma tatou le seleselega folafolaina ma le taua o faamanuiaga le mafaatauina a le Atua.
O le mea tatou te luluina, tatou te seleseleina.
O le tulafono lena o le lagi.
O le tulafono lena o le seleselega a le Atua.