Fotoan’ny soratra masina

Nanasitrana boka iray i Jesoa

Nosoratan’i Erin Sanderson

Monina any Utah Etazonia ny mpanoratra.

Miaraha-mianatra momba ny Testamenta Vaovao amin’ity taona ity!

Mieritrereta fotoana iray namparary anao. Nisy olona naneho hatsaram-panahy ve nanampiana anao ho salama kokoa?

Ao amin’ ny Testamenta Vaovao isika dia mamaky momba an’i Jesoa Kristy naneho hatsaram-panahy tamin’olona narary. Indray andro nisy lehilahy iray voan’ny aretin-koditra manaintaina antsoina hoe leprosisa (habokàna) nanatona an’i Jesoa. Fantany fa manana ny fahefana hanasitrana ireo rehetra izay marary i Jesoa. Nino izy fa afaka hanasitrana azy i Jesoa. Nokasihin’i Jesoa ilay boka ary hoy Izy, “Madiova hianao” (Marka 1:41). Vantany vao niteny izany i Jesoa dia sitrana ilay lehilahy.

Afaka manaraka ny dian’i Jesoa isika amin’ ny alalan’ny fanehoana hatsaram-panahy sy fitiavana amin’ ny hafa izay marary na malahelo.

Mianara bebe kokoa: Ireo Filazantsara

Ny Testamenta Vaovao dia manana boky efatra miavaka antsoina hoe ireo Filazantsara, izay nosoratan’ny sasany tamin’ireo mpianatr’i Jesoa. Ireo Filazantsara ireo dia mitantara momba ny fotoana niainan’i Jesoa Kristy teto an-tany. Ilay tantara momba ny fanasitranana ilay boka iny dia hita ao amin’ ny telo amin’ireo Filazantsara. Hita izany ao amin’ ny Marka 1:40–42 ary koa ao amin’ ny Matio 8:2–4 ary Lioka 5:12–14.

Sosokevitra ho an’ny resadresaky ny mpianakavy

Azonareo ampiasaina ny sary nalaina avy tamin’ ny soratra masina hita ao amin’ ny pejy 74 hitantarana ny tantara avy ao amin’ ny Marka 1:40–42. Avy eo afaka mamaky ny Joda 1:22 ianareo dia manao drafitra ny amin’ ny fomba hataon’ny fianakaviana mba hitondrana fiovana eo amin’ ny fiainan’ny olona iray. Mety afaka manampy olona iray mangingina ianareo!

Hira: “Raconte-moi les histoires de Jésus” (Chants pour les Enfants, 36).

Soratra masina: Marka 1:40–42

Horonantsary: Midira ao amin’ ny Biblevideos.org raha hijery ny “Jesus Heals a Lame Man on the Sabbath” sy ny “Jesus Heals a Man Born Blind.”

Manaraka ny Dian’i Jesoa

Milalaova tantara an-tsehatra kely miaraka amin’ ny fianakavianao izay mampiseho ny fomba hanehoanao fitiavana amin’ireo izay miaina ao anatin’ireto toe-javatra ireto. Forony amin’ ny alalan’ny toe-javatra iainanao manokana ny sasany.

• Misy fianakaviana iray vao nifindra teo amin’ ny manodidina anay.

• Misy ankizy sasany ratsy fanahy amin’ ny ankizy iray hafa any am-pianarana.

• Misy mpitsidika iray tsy mahafantratra na iza na iza ao am-piangonana tonga ao amin’ ny Kilonga.

• Tsy manana na iza na iza ilalaovana ny zandrinao lahy na ny zandrinao vavy.

• Mitomany ny zazakely, nefa sahirana mahandro sakafo ny reninao.

• Misy olona iray marary ao amin’ ny paroasy na sampana misy anao ka tsy afaka miala ao an-trano izy.

Fanampiana omen’ny Soratra Masina: Fitadiavana teny

Ao amin’ ny Marka 1:41 dia ampiasaina ny teny fangorahana. Indraindray dia misy teny sarotra izay mety tsy takatrao ao amin’ ny Baiboly. Afaka mampiasa ny Torolalana ho an’ny Soratra Masina ianao hanampy anao rehefa hitanao fa tsy hainao ny teny iray! Ohatra, azonao tadiavina ny teny hoe “Fangorahana” hahafantaranao ny dikany sy hahitanao soratra masina hafa izay mampiasa izany. Inona koa ireo teny hafa azonao tadiavina ao amin’ ny tantara momba an’i Jesoa nanasitrana ilay lehilahy boka?