Na dia saro-kenatra aza ianao

Nosaratan’ny Loholona José A. Teixeira

Ao amin’ny Fitopololahy

Matokia ny Tompo dia hitahy anao Izy amin’ireo ezaka ataonao mba hizara ny filazantsara.

Fony aho filohan’ny misiôna vaovao tao Brésil dia nanao dinidinika niaraka tamin’ny elder vitsivitsy. Nangataka elder iray aho hilazalaza ny momba azy tamiko.

“Saro-kenatra be aho,” hoy izy. Natahotra izy sao dia hanembantsembana ny fahafahany manompo ny fahamenarany.

Nanontany aho hoe: “Mieritreritra ve ianao fa afaka manampy anao ho lasa misiônera tsara ny Tompo na dia izany aza?”

“Mino aho fa afaka manao ny zavatra rehetra ny Tompo.”

“Avelao ary Izy hanampy anao. Afaka manao izany ve ianao?”

“Afaka aho,” hoy izy.

Miaiky aho aloha fa rehefa lasa izy dia nieritreritra aho hoe “Enga anie ka hahomby izany.”

Herinandro maro no lasa dia efa ho avy hanao dinidinika indray ireo misiônera ireo. Tamin’ity indray mitoraka ity dia nilaza ny naman’ilay elder saro-kenatra hoe: “Filoha a! Tsy fantatro izay nolazainao azy fa tena nanova zavatra tokoa izany. Lasa tena mahay miresaka amin’ny olona izy.” Ka noho izany dia naniry ny hiresaka taminy indray aho.

Rehefa niditra tao amin’ny biraoko izy dia niondrika.

“Manana vaovao tsara maromaro aho,” hoy izy. “Mbola saro-kenatra aho saingy nangataka ny Tompo aho hanampy ahy. Dia nosokafako ny vavako ka nanomboka niteny aho. Dia inona no nitranga hoy ianao? Manao izany foana aho izao. Tsy tadidiko akory aza ny zavatra lazaiko. Ny tena mahatalanjona dia tian’ny olona izany. Mahatsapa ny Fanahy izy ireo. Mahatakatra izay lazaiko sy mitovy hevitra amiko izy ireo.”

Talanjona aho raha nahita ny fiovana nisy teo amin’io misiônera io rehefa nametraka ny fitokisany tamin’ny Tompo izy. Lasa fitaovana lehibe tamin’ny fitondrana fifaliana teo amin’ny olona maro izy.

Mandresy ny tahotra

Rehefa mizara ny filazantsara isika dia mahatsapa ho matahotahotra indraindray. Saingy araka izay nasehon’ity misiônera saro-kenatra ity dia hitarika antsika ny Tompo raha mahatoky Azy isika. Ny Fanahy Masina dia hanampy antsika hahalala izay tokony holazaina (jereo ny 2 Nefia 32:2–3), ary rehefa mahatsapa ny Fanahy ny olona dia matetika izy ireo no mandray tsara izany. Olona maro no lasa eritreritra mikasika ny zavatra inoantsika ka dia maniry ny hahalala bebe kokoa momba izany.

Fifaliana lehibe

Manana fijoroana ho vavolombelona aho fa hitarika antsika amin’ny ezaka ataontsika mba hizara ny filazantsara ny Ray any An-danitra, ka hahatsapa fifaliana lehibe isika ao anatin’izany dingana izany. Raha ny marina, izany fifaliana izany dia tsy hiaraka amintsika amin’izao fotoana izao fotsiny fa any amin’ny tontolo ho avy ihany koa. (Jereo ny F&F 18:16.) Antony tsara iray hanaovanao zavatra tsy dia tena hahazoanao aina izany, na dia saro-kenatra aza ianao.

Tahotra telo azonao resena

Ankoatra ny fahamenarana dia mahafantatra tahotra telo fanampiny aho izay mahatonga ny sasany amintsika hilaza hoe: “Matahotra aho hoe raha miresaka momba ny filazantsara dia tsy hinamana amiko intsony ny namako.” Soa ihany fa azo resena amin’ny alalan’ny finoana ireo tahotra ireo.

1. Tsy dia mahay loatra aho.

   Raha tsy ampy fahalalana mikasika ny filazantsara ianao dia afaka manampy ireo misiônera manompo amin’ny fotoana feno. Afaka mampianatra antsika ny hafatra mikasika ny Famerenana amin’ny laoniny izy ireo, manampy antsika hanamafy orina ny finoantsika an’i Jesoa Kristy, ary manampy antsika hahatakatra ny fibebahana sy ny fomba hampiharana izany eo amin’ny fiainantsika sy ny antony maha-manan-danja ny batisa sy ny fanomezana ny Fanahy Masina. Loharanom-pahalalana iray lehibe hafa ny Torio ny Filazantsarako. Tiako ny hamporisika ny zatovolahy sy ny zatovovavy rehetra hanana io boky io sy hampiditra izany ao anatin’ny fandalinanareo isan’andro miaraka amin’ny soratra masinareo.

2. Tsy mbola nanao izany mihitsy aho teo aloha.

   Raha tsy manana traikefa ianao dia manazara tena miaraka amin’ny misiônera! Afaka manampy anao hahalala izay tokony holazaina sy tsy tokony holazaina amin’ny toe-javatra sasantsasany izy ireo. Rehefa miaraka amin’ny misiônera ianao dia hahatsapa ny fitiavan’izy ireo ny filazantsara ireo mpiara-belona aminy. Nahazo ny herimpo hoentina mizara ny filazantsara izy ireo. Afaka manampy anao hanao toy izany koa izy ireo.

3. Matahotra aho ny hizara

   Rehefa mizara ny fijoroana ho vavolombelona ananantsika isika dia manampy ireo namantsika hahita ireo zavatra manan-danja kokoa, ary manomboka manaja antsika sy tia antsika amin’ny fahatakarana hafa izy ireo. Mitranga saika ho ao anatin’ny ankamaroan’ny fotoana izany. Maro ny zatovo milaza hoe: “Saro-tahotra aho teo aloha, kanefa rehefa niresaka tamin-kitsimpo, dia nanomboka natoky ahy sy nametraka fanontaniana betsaka kokoa ireo namako.” Tsy tokony hatahotra ny hizara izay ananantsika isika. Sarobidy izany satria avy amin’Andriamanitra. Ary inona moa no fomba tsaratsara kokoa hanehoantsika ny fitiavantsika ireo namantsika ankoatra ny mizara amin’izy ireo izay fantatsika fa marina?