Malama ʻa Fetuʻu
ʻOku nofo ʻa e tokotaha naʻá ne fai e talanoá ʻi Kololato, USA.
“ʻOku fakafiefia ke ʻi heni mo kimoutolu he Palaimelí” (Tohi Hiva ʻa e Fānaú, 254).
Naʻe fusi ʻe Fetuʻu hono valá. ‘Oku kei ongo faikehe pē ke tui ha kofu ki he lotú. Naʻe tui talausese lōloa pe mutu ʻa e tamaiki fefiné ʻi hono siasi kimuʻá he Sāpaté. Kae ‘ikai ʻi hono siasi foʻoú. Naʻe toki papitaiso pē mo ʻene faʻeé ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Na‘e māpuhoi ʻa Fetuʻu ʻi heʻene sio ki he sioʻatá. Na‘e vēkeveke ke fuofua ʻalu ki he lotú ko e mēmipa totonu, ka naʻe toe manavasiʻi foki. Kimuʻá, naʻe nofo pē mo e Fineʻeikí ʻi he kotoa ʻo e taimi lotú. Ka ʻoku ʻalu ʻeni ia ki he Palaimelí.
Na‘e fakakuitaha ʻa Fetuʻu ki hono ʻatá. Fēfē kapau he ʻikai lata ai? Fēfē kapau he ʻikai ke saiʻia ai ʻa e longaʻi fānau kehé?
“Fetu‘u? ʻOkú ke maau?” Ko e ui atu ia ʻa e fineʻeikí.
Naʻe hifo mai ʻa Fetuʻu. Naʻá ne ʻeke ange, “ʻOku ou ʻasi sai pē?”
Naʻe malimali e Fine‘eikí. “ʻOkú ke hā fakaʻofoʻofa.”
Naʻe fingoʻi atu ʻe Fetuʻu hono matá. “Kuo pau ke ke lea pehē. He ko ʻeku faʻeé koe.”
“ʻOkú ke moʻoni. Kuo pau ke u lea pehē. “He ʻoku moʻoni.”
Naʻe kiʻi malimali ʻa Fetuʻu. ʻOku ʻi ai maʻu pē ha founga ʻa e Fineʻeikí ke ʻai ke ne ongoʻi lelei ange. Ka naʻá ne kei tailiili pē. Fēfē kapau he ʻikai fie lea ki ai e toenga ʻo e longaʻi fānaú? Naʻe ʻi ai hano ngaahi kaungāmeʻa ʻi he akó, ka naʻe ʻikai ko ha kau mēmipa kinautolu ʻo hono siasi foʻoú. Naʻá ne fakaʻamu pehē ange mai naʻe ʻi ai ha tokotaha pē ʻo hono ngaahi kaumeʻá ke na ō ki he lotú.
Naʻá ne pehē ange ki he Fineʻeikí, “Ko u toki manatuʻi hake ha meʻa kuo pau ke u fai.”
Naʻe lele ki ʻolunga ʻo tūʻulutui ʻi hono veʻe mohengá. “Tamai Hevani, kātaki ‘o tokoniʻi au ke u ma‘u ha ngaahi kaumeʻa. ‘Oku ou tui ʻoku mo‘oni e me‘a naʻe ako‘i ʻe he ongo faifekaú, ka ‘oku ou ilifia.”
Naʻe tū‘ulutui pē ʻo fakaongoongo. Hili ha ki‘i taimi nounou kuó ne maʻu ha ongo fakafiefia mo nonga pea naʻe ʻikai ke toe fuʻu tailiili fēfē.
Naʻe tangutu ʻa Fetuʻu mo e Fineʻeikí ʻi he lotú he tafaʻaki ʻo ha fāmili mo ha fanga kiʻi tamaiki fefine ʻe toko tolu. Naʻe fakafe‘iloaki mai ʻe he ongomātuʻá kinautolu pea kamata talanoa mo e Fineʻeikí, kimuʻa pea kamata ʻa e lotú. Naʻe tokoni ʻa Fetuʻu ki he fanga kiʻi tamaiki fefiné ʻi hono valivali ha fakatātā ʻo Sīsū.
Na‘e luelue mai ʻa Pīsope ʻAnitelū kiate kinautolu. “Sisitā Kāningihemi! Fetu‘u! Fakafiefia ke mamata kiate koe he ʻahó ni.” Naʻe malimali kiate kinautolu taki taha mo nau lulululu. Kuo ngalo ʻia Fetuʻu ia e angalelei ʻa e taha kotoa he lotú. Mahalo ʻe maʻu pē hano kaumeʻa.
Naʻe ʻalu ʻa Fetuʻu ki he Palaimelí ʻi he ʻosi ʻa e houalotu sākalamēnití. Na‘e fakahilehila manavasiʻi atu ki he longaʻi fānau kehé ʻi heʻene tangutú. Naʻa nau pōtalanoa ʻo hangē naʻe ʻikai ke nau fakatokangaʻi iá. Naʻe tō hifo leva ʻe loto ʻo Fetuʻú. Tā ʻe iku tuēnoa pē.
Feʻunga pē mo e hū mai ʻa ha kiʻi taʻahine taʻu tatau mo Fetuʻu. Fakakaukau ʻa Fetuʻu, “Na‘e ngali manavasiʻi mo ia foki.” “Te u lava ʻo ʻalu ʻo fakalea ki ai.”
Naʻe mihiʻi leva ʻe Fetu‘u ʻene mānavá, pea lue atu ki he kiʻi taʻahiné. “Māō ē lelei, ko hoku hingoá ko Fetuʻu. ʻOku ou foʻou mai ki heni. Te ke fie tangutu ʻi hoku tafaʻakí?” Ne fakatau ʻe Fetuʻu ʻene mānavá. ʻE fie hoko nai e kiʻi taʻahiné ko hano kaumeʻa?
Na‘e kiʻi malimali ange kiʻi taʻahiné. “Ko Sela au. ‘Oku ou foʻou mo au foki. Naʻe toki hiki mai hoku fāmilí mei ʻOniteliō.”
Talaange ʻe Fetuʻu, “Naʻá ku toki papitaiso pē mo ʻeku fineʻeikí he uike ʻe ua kuo hilí.” “‘Oku ʻikai ke u fakapapau‘i e meʻa ‘oku totonu ke u faí.”
Ne toe lahi ange malimali ʻa Selá. “Te ta fakakaukauʻi fakataha.”
Naʻe tangutu ʻa Fetuʻu mo Sela pea mo ʻena kalasí. Naʻe fesiofaki ʻa Fetuʻu mo Sela he taimi ʻe niʻihi pea malimali. Pea malimali mai mo Sela. Naʻe ongoʻi nonga mo fiefia ʻa Fetuʻu. Naʻá ne ʻilo kuo tali ʻe he Tamai Hēvaní ʻene lotú mo tokoni ke maʻu hano kaungāmeʻa.
Naʻe kole ange ʻa e faiakó ʻi he kalasí kia Fetuʻu mo Sela ke na fakafeʻiloaki ange kinaua.
Ne tuʻu ʻa Fetuʻu ki ʻolunga. “Ko hoku hingoá ko Fetuʻu Kāningihemi. Naʻe papitaiso au mo ʻeku fineʻeikí ʻi he uike ʻe ua kuo hilí.” Naʻe kiʻi longo, pea malimali hono fofongá ʻi heʻene vakai ki hono kaungāmeʻa foʻoú. “Pea ko hoku kaungāmeʻa ʻeni ko Selá.”