Leʻo ʻo e Kau Māʻoniʻoni ʻi he Ngaahi ʻAho Kimui Ní
Fakahaofi ‘i he Loki Talitaliʻangá
Tā fakatātā ʻa Allen Garns
Naʻe pau ke faʻa ngāue hoku husepānití ʻi he Sāpaté, ʻo tuku ai ke u tokangaʻi toko taha hono ʻave ʻema fānau tangata ʻe toko faá ki he lotú. Lolotonga e houalotu sākalamēnití ʻi ha Sāpate ʻe taha, kuo makuku ʻeku ongo kiʻi tamaiki īkí. Kapau te u ʻai ha taha ʻo e ongo tamaikí ni ke tokanga ki ha tohi, kuo fie maʻu ia ʻe hono tokouá. Naʻá ku ʻahiʻahiʻi e fanga kiʻi meʻakaí, meʻavaʻingá, mo e valivalí, ka naʻe ʻikai ʻaonga ha meʻa ia. Naʻá ku mafasia heʻeku ongo kiʻi tamaikí, he naʻe hangehangē heʻikai te na lava ʻo kiʻi tangutu fakalongolongo ʻi ha houa pē taha.
Naʻá ku toʻo hake ha kiʻi meʻavaʻinga mei heʻeku kató ʻo mono ange ia ki heʻeku kiʻi tamasiʻi taʻu tahá. ʻI he taimi pē ko iá kuo kaila ʻeku kiʻi tamasiʻi taʻu tolu ko Taisoní, ʻi heʻene ʻohofi hono kiʻi tehiná, mo feinga ke toʻo ʻa e kiʻi meʻavaʻingá. Na‘á ku fakamāʻia ʻi heʻeku fua atu e ongo kiʻi tamaiki keé ni ki he loki talitali‘angá.
Naʻe fakafokifā ʻa e māfana hoku fofongá ʻi hetafe noa pē hoku loʻimatá. Ko e hā ʻoku faingataʻa pehē ai e meʻá ni? Naʻá ku fai e meʻa naʻe fie maʻu ʻe he Tamai Hēvaní ke u faí, ʻaki hono ʻomi hoku fāmilí ki he lotí, ko ia? Ka kuo ʻikai ke u toe lava ʻe au. Na‘e fakaongosia mo fakamā ke u kē mo ʻeku ongo kiʻi tamaikí ʻi he houalotu sākalamēnití he uike kotoa. Na‘e ʻikai ke u toe fie foki mai au.
Na‘á ku tangutu mo e fakakaukau ko ʻení ʻi ha sekoni nai ʻe 15, pea hū mai ha fefine naʻe ʻikai ke u fuʻu ʻiloʻi ki he loki tataliʻangá ke tokoni. Ko hono hingoá ko Sisitā Peasi. Naʻe faʻa tangutu tokotaha pē, he naʻe kau hono husepānití ʻi he kau pīsopelikí pea kuo lalahi ʻene fānaú. Na‘á ne pehē mai, “ʻOkú ke ʻi heni tokotaha maʻu pē! ʻOku ou lava pē ʻo tala ʻoku ke feinga mālohi. ʻE lava ke u tangutu mo Taisoni?” Na‘e ʻikai ke u lava au ʻo maʻu ha tali! Naʻá ku kamo pē ʻi heʻene puke hono kiʻi nima ʻo iá, kuó ne nonga eni mo fiefia, ʻo foki ki falelotu.
Naʻá ku holoholoʻi leva hoku loʻimatá, fua ʻeku kiʻi pēpeé, ʻo foki loto maʻulalo atu ki falelotu ke maʻu e toenga ʻo e fakatahá ʻi he nonga.
Ko e taimi ne mau hū atu ai ki he houalotu sākalamēniti ʻi he Sāpate hono hokó, naʻe kumi ʻe Taisoni hono kaumeʻa foʻoú. Naʻá ne faʻa lotu ʻi he poʻulí, “Fakamālō Tamai Hēvani, koeʻuhí ko Sisitā Peasi ‘oku ou ʻofa lahi ai!”
Kuo laka hake ʻeni he ta‘u ʻe tolú, mo e kei faʻa kumi pē ʻe Taisoni ʻa Sisitā Peasi ʻi falelotu. Naʻe ui ia he taʻu kuo ʻosí ke hoko ko e faiako Palaimeli ʻa Taisoní. Ne hoko ia ko e kiʻi tamasiʻi fiefia taha he moʻuí.
‘Oku ou fakamālō koeʻuhí ko Sisitā Peasi mo ʻene fie ʻofa mo tokoni ki he niʻihi kehé. ‘Oku ou ʻilo te tau lava ʻo tāpuakiʻi e moʻui ʻa ha niʻihi kehe ʻi he taimi ʻoku tau tokoni ai ʻo hangē ko ia naʻe fai ʻe he Fakamoʻuí.