Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Kato Paʻanga Molé
Tā fakatātaaʻi ʻe Wilson Ong
Naʻá ku hiki kimuí ni mai ki ha ʻapi foʻou peá u kole ki ha kau mēmipa ʻo e Siasí ke nau tokoni mai ʻi ha ngāue ʻi hoku falé. Lolotonga e ngāué, naʻá ku mavahe ke fakatau mai ha koloa ne mau fie maʻu ke fakaʻosi ʻaki. Naʻá ku fakatokangaʻi ʻi he ʻosi ʻa e ngāué naʻe ʻikai ke ʻiate au ʻeku kato paʻangá. Naʻá ku hoahaʻa he naʻe ʻi loto ʻi heʻeku kato paʻangá e kotoa ʻo ʻeku ngaahi tohi fakafoʻituitui mahuʻingá mo e paʻanga naʻá ku toki maʻu mei ha taha naʻá ku fakafofongaʻi he pongipongi pē ko iá. Naʻá ku toe fakatotoloʻi leva hoku hala ki he feituʻu naʻe fai ai ʻeku fakataú ka naʻe ʻikai hano ola. Naʻá ku foki ki ʻapi ʻo kumi pe naʻe tō ʻi ha feituʻu ai, ka naʻe ʻikai pē ke u maʻu ia. Na‘e kamata leva ke u fakakaukauʻi pe ʻe lava fēfē ke maʻu ha ngaahi tatau foʻou ʻo e ngaahi tohí kotoa. Kae kimuʻa peá u mavahe mei hoku ʻapí, kuo ʻeke mai ʻe haku kaungāmeʻa, “Kuó ke ʻosi lotu?”
Na‘á ku pehē loto leva, “ʻIo, kuó u ʻosi lotu!”
Ka ko hono mo‘oní, naʻe ‘ikai ke u lotu fakamātoato. Ka, na‘á ku vili ki he Tamai Hēvaní ke fai hoku lotó pea mo feinga ke fakafatongia ʻaki ia ʻene tokoni mai ke maʻu ʻeku kato paʻangá. Ka naʻá ku manatuʻi e potu folofola ʻi he ʻĪsaia 55:8: “ʻOku ʻikai ko ho‘omou fakakaukaú ʻa ʻeku ngaahi fakakaukaú, pe ko homou ngaahi halá ʻa hoku ngaahi halá, ʻoku folofola ʻe he ʻEikí.”
Naʻá ku ʻalu ki he lotú he Sāpaté, pea talamai ʻe ha mēmipa naʻá ma talanoa ʻi he ʻaho kimuʻá, naʻe lotu fakamātoato ki he Tamai Hēvaní ke u maʻu ʻeku kato paʻangá. Na‘á ne pehē naʻá ne ongoʻi te u maʻu ia. ʻI heʻeku tangutu kimui ange ai ke fai ʻeku ako fakatāutahá, ne u kamata lau ʻa e Ko Hono Maʻu ʻo e Tali ki Heʻetau Ngaahi Lotú naʻe fai ʻe ʻEletā Siini R. Kuki, ko ha mēmipa mālōlō ʻo e Kau Fitungofulú. ʻOku hā ʻi he peesi ʻuluakí ha talanoa meimei tatau mo ʻeku palopalemá: Naʻe mole ʻa e kato paʻanga ʻo e foha ʻo ʻEletā Kukí, pea fakataha ai ʻa e fāmilí ʻo lotu ki he ʻEikí ke nau maʻu ia.
Hili hono lau e aʻusia ko iá, ne u fakaʻaongaʻi leva e meʻa naʻá ku akó ʻo fakatahatahaʻi hoku uaifí mo e fānaú Ne mau takatakai fuopotopoto, pea fakahoko ʻe he toko taha taki taha ha lotu, ʻo kole ki he ʻEikí ha tokoni ke ʻilo ʻeku kato paʻangá kapau ko Hono finangaló ia.
Ne u ‘osi sio tonu kimuʻa ʻi he mālohi ʻo e lotú, ka ʻi heʻeku lotu lilo kimui aí, naʻá ku kole ki he Tamai Hēvaní ke tali ʻemau lotú ke fakamālohia ai e tui hoku uaifí mo e fānaú.
Naʻe telefoni mai ha tangata ʻi he ʻaho hono hokó. Na‘á ne pehē kuó ne maʻu ʻeku kato paʻangá, fakataha mo e paʻangá. Na‘á ku tangi hangē ha kiʻi tamasiʻi si‘í he kuo tali ʻeku lotú mo fakamālohia e tui hoku fāmilí.
‘Oku ou ʻilo‘i ʻoku tokoni ʻa e Tamai Hēvaní, neongo e tokolahi ʻo e fānau ke tokoniʻí, kiate kitautolu fakatāutaha ʻo fakatatau mo ʻEne taimí pea ʻi Heʻene founga pē ʻAʻana.