Ko ʻEtau Tafaʻakí
Tā fakatātaaʻi ʻe Dan Burr
ʻOku Foaki Mai ʻe he ʻOtuá ha Ngaahi Meʻangāue
Ko ʻeku faʻē-tangatá ko ha taha tā-fakatātā pea ʻokú ne ʻai ha fanga kiʻi vaka ʻakau ʻi ha ngaahi hina sioʻata. ʻOku fie maʻu ki ai ha taimi, tokanga, mo e ngāue lahi ke ngaohi.
Naʻá ku mamata ʻi ha ʻaho ʻe taha ki heʻene ngaahi meʻangāué mou fakatokangaʻi e founga hono fakaʻaongaʻi ʻo e ngaahi meʻangāué takitaha ki ha tongitongi iiki pe faʻu ʻo ha vaka. Naʻá ku ʻohovale ʻi heʻeku sio heʻene ngāué, ʻi he anga ʻo ʻene fakaʻaongaʻi ʻa e ngaahi meʻangāué ki he faʻu ʻo e ngaahi vaka ko ʻení. Naʻe fakamanatu mai ai kiate au ʻa e talanoa ʻo e foʻu ʻe Nīfai e vaká (vakai, 1 Nīfai 17–18). Na‘á ne foʻu ia fakatatau mo e founga ʻa e ʻEikí, kae ʻikai ʻa e tangatá. ʻOku foaki mai ʻe he ʻOtuá kiate kitautolu ha ngaahi meʻangāue ke tau foʻu hotau takitaha vaka ʻi Heʻene foungá. Ko e folofolá, tuí, mo e ʻofa ʻa e ʻOtuá ko ha ngaahi meʻangāue ia kuo pau ke u ngāueʻaki ʻi heʻeku moʻuí ke foʻu fakalelei ʻaki hoku vaká ʻo ʻikai papā. ʻOku ou ako ʻi he ʻaho kotoa pē ke u hoko ko ha ākonga ʻa e ʻEikí.
María Mercedes G., Monakesi, Venisuela
Ongo‘i Liʻekina
Ko ha faʻahitaʻu failau momoko ia ʻi Tenimaʻake. Naʻe toki kamata pē ʻeku ngāue fakafaifekau taimi kakató, pea naʻe palopalemaʻia ʻeku fakamoʻoní. Ko ha taha ului au ʻi ha māhina pē ʻe 19 mo fonu tailiili ʻi he fehangahangai mo e fonua foʻoú, mo ha lea fakafonua naʻe ʻikai ke u lava ʻo leaʻaki, pea mo ha ngaahi hala fihituʻu naʻe ʻikai ke u lava ʻo makupusi haʻaku fononga holo ai. Naʻe ʻikai fuoloa kuo hoko ʻeku ngaahi lotu houngaʻiá hoko ko ha tukuakiʻi fakamamahi: “ʻE ʻOtua, ko e hā kuó ke tuku ai au ke u liʻekiná?”
Naʻá ku lotu tāumaʻu kiate Ia ʻi ha pongipongi ʻe taha. Ka naʻe ʻikai ke u fehuʻi “ko e hā e ʻuhingá” ʻaki ha loto ʻita, ka naʻá ku kole ke maʻu ha fakamoʻoni ki he moʻoni ʻo e ongoongoleleí mo lolomi ʻeku loto veiveiuá.
Hili ‘eku lotú, naʻá ku fakaava leva ʻeku folofolá. Naʻá ku ʻi he Teutalōnome 31:6: “Ke ke mālohi koe peá ke loto toʻa, ʻoua naʻá ke lilika, pea ʻoua naʻá ke manavahē kiate kinautolu: he ko [e ʻEiki] ko ho ʻOtuá, ko ia ia ʻokú mo ō mo koé; ʻe ʻikai te ne fakatukutukuʻi koe, pe liʻaki koe.”
Na‘e fonu fiefia ʻa hoku lotó ʻi heʻeku fakatokangaʻi ko e tali ki heʻeku lotú: Naʻe ʻi ai maʻu pē ʻa e ʻOtuá. Naʻe tatali pē Ia ki ha lotu fakamātoato kae ʻikai ko e tukuakiʻi ʻoku liʻekina.
He ʻikai teitei mavahe ʻa e ʻOtuá meiate au, naʻa mo e taimi ʻoku hangē ai ʻoku hala ha toe ʻamanakí. Pea te tau lava ‘o ongoʻi ʻene fiefiá ʻi he lotú pea mo ʻEne folofolá.
Clayton E., Tekisisi, USA