‘Ai ke Fakafoʻituitui Hoʻo Ako e Ongoongoleleí
Vakai‘i ʻa e fanga kiʻi tokoni ko ʻeni ki hono ako ʻo e ongoongoleleí mo e kumi ʻo e tali ki hoʻo ngaahi fehuʻi fakalaumālié.
ʻOkú ke ako fēfē ʻi he taimi ʻokú ke kumi ai ha tali ki ha fehuʻi fakalaumālie pe ko haʻo feinga pē ke mahino lelei ange ʻa e folofolá? Ko ʻeku ʻuhingá—fakafoʻituituí. ʻOku kehekehe e founga ako ʻa e taha kotoa ki he akó, ka ʻoku ngalo ʻiate kitautolu he taimi ʻe niʻihi te tau lava ʻo ʻai ke fakafoʻituitui ʻetau ako ʻa e ongoongoleleí. ʻAhiʻahi ha niʻihi ʻo e fanga kiʻi tokoni ko ʻení ka toe ʻi ai haʻo fehuʻi fakalaumālie fakatokāteline, ke ʻilo ai e meʻa ʻe ala ngāue lelei taha kiate koé.
1. Fa‘u
‘Ai ha lisi, saati pe ha mape. (Vakai ki he sīpinga ʻi laló.)
‘Ai ha mape ako. Hiki ʻa e ngaahi foʻi leá mo e ngaahi fakakaukaú pea fakafehokotaki kinautolu ʻaki ha ngaahi laine mo fakafuopotopotoʻi ke fakahaaʻi ʻa e anga ʻenau fekauʻakí.
2. Hiki
Lekooti e ngaahi fakakaukau mo e ngaahi ongo ʻokú ke maʻu he lolotonga hoʻo ako folofolá ʻi ha tohinoa-ako pea toutou toe vakaiʻi ʻa e ngaahi fakakaukau ko iá.
Hiki hoʻo ngaahi fakakaukaú mo e ngaahi ongó he hili hoʻo lotú, tatau ai pē kapau ʻoku ʻikai fekauʻaki hangatonu e ngaahi ongó mo e tefito ʻokú ke akó. Fakatokangaʻi ʻa e meʻa ʻoku toutou akoʻi atu ʻe he Laumālié.
Hikiʻi fakanounou hoʻo ngaahi fehuʻí ʻi ha kiʻi tohi, ʻi hoʻo telefoní, pe ʻi ha kiʻi tohi ʻi ho veʻe mohengá ke ne fakamanatu atu mo tokoni ke ke fakakaukau maʻu pē ki he meʻa ʻokú ke ako he ʻaho kotoa.
3. Fakafanongo pea Aleaʻi
Talanoa mo ha taha hoʻo mātuʻá pe ha taki falalaʻanga. Mo ngāueʻi fakataha ia. Mahalo naʻa kiʻi taimi lōloa, ka te mo fakatou tupulaki ʻi hono fakahokó.
Tokoniʻi ha taha kehe. Taufetongi hono vahevahe ʻo e me‘a ʻokú mo ‘iló. Alea‘i e ngaahi meʻa ne mo feakoʻakí.
Fanongo ki he folofolá pe ki ha ngaahi talanoa kehe ʻo e SIASÍ mo ha ngaahi maʻuʻanga fakamatala kehe.
4. Fakatotolo
Kumi ha ngaahi tokoni fakaako ʻi he folofolá mo e ‘initanetí (vakai ki he lisi ʻo e ngaahi maʻuʻanga tokoni ʻaonga ʻa e SIASÍ ʻi laló).
Kumi ʻi he LDS.org ki ha ngaahi vitiō mo ha ngaahi hiva fekauʻaki mo e meʻa ʻokú ke akó.
Ako hono kakanó. Fakatotoloʻi ʻa e hisitōlia pe ngaahi vahe fekauʻaki mo e tefito pe potufolofola ʻokú ke akó.
5. Fakahoko
Fakatātaaʻi ha ngaahi talanoa mei he folofolá pe ha toe ngaahi maʻuʻanga tokoni kehe. ʻOku tokoni fēfē hoʻo ʻai koe ki he tuʻunga ʻo e taha ko iá ke mahino lelei ange ai kiate koe ʻa e meʻa ʻokú ke akó? ʻE fōtunga fēfē ha ngaahi tūkunga faitatau mo ia ‘i hoʻo mo‘ui?
Faʻu ha seini fakafolofola te ne fakafehokotaki e tali ʻokú ke maʻu ʻi he folofolá. (Vakai ki he sīpinga ʻi laló.)