E Kauwaitaka na Tamada Vakalomalagi na Noqu Bisinisi
Buyisile Zuma
KwaZulu-Natal, South Africa
Droini mai vei Allen Garns
Niu tu taudua ka tina ni lima na gone, au vakila na itavi bibi ni qaravi ni noqu matavuvale. Au dua e cakacaka e vale, ia na cakacaka au qarava e sega ni qarava taucoko na noqu matavuvale. Au lewena e dua na ilawalawa ni bula rawati koya meu vulica na kena vakavinakataki na noqu ituvaki.
Au a vakauqeti ena ilawalawa ni “Tekivutaki ka Vakatubura na Noqu Bisinisi” kau nanuma ni na rawa niu cula ka volitaka na taga ni vakasaqa ena ivakarau ni vakasaqa malumu. Au dau culacula yani ki na bogilevu niu suka mai na noqu cakacaka ena siga.
Au a cakacaka bera tiko ena loma ni bogi ena dua na ota levu ka vinakati ena mataka ka tarava ni sa mai ca na noqu misini ni culacula. E sa bogilevu, ka sega ni dua na matai vakamisini ena rawa ni veivuke. E gole vata mai na misini e dua na kato ni yaya ni cakacaka lailai, ia au se bera vakadua niu se bau ripeataki misini e liu. Au sega sara tu ga ni kila meu na tekivu evei.
Sa qai votu mai noqu vakasama e dua na lesoni ena ivola vakarau ni Noqu Yavu ka vakatokai na “Cakacakataka na Nomu Vakabauti Jisu Karisito”. Ena gauna oya, au kila ni na gadrevi meu na nuitaka na Turaga. Au tekiduru ka vakatakekere: “Tamaqu Vakalomalagi, au kerea mo ni vukei au meu vakavinakataka rawa na misini oqo me rawa niu cakava na ota me ra mai kauta na volivoli ena mataka lailai. Vukei au Tamaqu Vakalomalagi!”
Kau qai vakauqeti meu taura mai na sikurudraiva mai na kena kato ka vakayagataka me biliga toka e dua na mua ni misini culacula. Au cakava sara, niu vakararavi sara tu ga ena noqu vakabauta. Au vakatabui cegu niu sa biuta vata tale na misini. E cakacaka!
A rawa niu sotava na gauna e vinakati kina na ota. Au sa qai raica na veika e rawa ni yaco ni rau veitokani vata kei au na Tamada Vakalomalagi kei Jisu Karisito ena noqu bisinisi. Au kila niu na vakalougatataki tikoga niu vasaqara na sala meu bulataka na veika au sa vulica mai na ilawalawa ni bula rawati koya.