Dolavi na Lomalagi ena Cakacaka ni Valetabu kei na Tuvakawa
Mai vei Peresitedi Russell M. Nelson
Peresitedi ni Kuoramu ni iApositolo Le Tinikarua
Vata kei Wendy W. Nelson
Mai na ivakamacala e vakayacori ena RootsTech 2017 Koniferedi ni Tuvakawa mai Salt Lake City, Utah, Amerika, ena Feperueri 11, 2017. Sarava e dua na katokatoni ni vakamacala vaka Peretania, Portuguese, se Spanish, sikova na lds.org/go/1017Nelson.
Ena gauna ni nodrau vakamacala mai Roots Tech 2017, o Peresitedi Russell M. Nelson kei na watina o Wendy rau a sureti ira na Yalododonu Edaidai me masulaka ka vakasamataka na soli bula vakacava era dodonu mera solia me rawa ni caka e levu na cakacaka e valetabu kei na tuvakawa.
Peresitedi Nelson: ena gauna se cauravou kina na tukaqu o A. C. Nelson e yabaki 27, ka se qai tagane vakawati gone ka tama talega, ena gauna e mate kina na tamana. Oti e tolu na vula, nona mai takali kina o tamana, e mai sikovi koya na tukaqu vakarua. Ena na ika 6 ni Epereli, 1891 e mai veisiko kina. E a kurubui vakalevu o Tukai Nelson ena veisiko nei tamana, a vola o koya na veika e lako curuma vei ira na nona matavuvale kei ira na nona itokani.
“Au davo tu ena noqu loga na gauna e curu mai kina o Tamaqu,” a vola o Tukai Nelson. “Koya a lako mai qai mai dabe ena yasa ni noqu loga. A kaya, “I na luvequ, me vaka ni vo vakalailai toka vei au na gauna, au ciqoma na veivakadonui meu mai raici iko ena vica walega na miniti. Au bulabula vinaka tiko na luvequ, ka bau levu toka na ka o vakacakava toka oti na noqu takali.”
Gauna e tarogi koya kina o Tukai Nelson na cava e cakava tiko, a sauma mai o tamana ni osooso tiko vakalevu ena kena wasei tiko na kosipeli Jisu Karisito mai na vuravura ni yalo.
“Sega ni tadra rawa, na luvequ, na levu ni yalo e tu mai na vuravura ni yalo era se sega ni ciqoma tu na kosipeli,” a kaya o koya. “Ia era levu era sa ciqoma tiko mai, kei na cakacaka levu qo esa caka rawa tiko. E levu era se nanamaki tu vei ira na nodra itokani era se bula tiko me ra vukei ira ena vukudra ena valetabu.”
A kaya o Tukaqu Nelson vei tamana, “Keitou sa nakinaki tiko me keitou gole ki valetabu me keitou na vauci vei iko Tamaqu, ena kena gauna totolo sara.”
A sauma mai na tukaqu vakarua: “Qori na luvequ na vuna au lako mai kina meu mai raici iko. E se sega ni kedatou bulia e dua na matavuvale me tou bula ka tawamudu.”
Gauna a taro kina o Tukaqu Nelson, “Tamaqu, na kosipeli e vakavulica tiko na lotu qo e dina?”
Na tamana a qai dusia yani na nodratou itaba na Mataveiliutaki Taumada ka lili tu ena lalaga ni rumu ni moce.
“Na luvequ, me vaka ga na matata ni o raica tiko na itaba oya, na matata ni dina ni kosipeli. Na kosipeli i Jisu Karisito e tiko e loma na kaukauwa me vakabulai keda kece na yalewa kei na tagane eda talairawarawa kina ka sega tale ni dua na sala o na rawata kina na veivakabulai ena matanitu ni Kalou. Na luvequ, tautauri kaukauwa tiko ena kosipeli. Mo yalo malumalumu, mo masu, mo taura dei na matabete, mo dina, mo yalodina ena yalayala eda sa cakava kei na Kalou. Kakua ni cakava e dua na ka ena sega ni taleitaka na Kalou. Dua na ka na veivakalougatataki e tu ena kosipeli. Na luvequ, mo gone vinaka.”
A. C. Nelson, na tubui Peresitedi Russell M. Nelson.
Droini mai vei Bjorn Thorkelson; vakaraitaki e muri, talevoni veikauyaki, kei na ivakaraitaki ni tablet mai na Getty Images
Sister Nelson: Au taleitaka vakalevu na B kece oqo. Mo yalo malumalumu, mo masu, mo taura dei na matabete, mo dina, mo yalodina ena yalayala eda sa cakava kei na Kalou. … Mo gonetagane vinaka.” E ono na B e kauta mai vei iko na tukaqu vakarua sa takali. E via rogorogo vata tu kei Peresitedi Gordon B. Hinckley (1910–2008) vata kei na ono na nona ono na B.1
Peresitedi Nelson: E cakava o koya, se vakacava? E dua na ka na kena mareqeti vei au ni rawa ni biuta tu mai na tukaqu na itukutuku oqo vei keda. Eda vulica ni na luvei tamana era vauci kece vei koya. Sa mai vakavotukana na inaki ni nona veisiko.
Na Yalo i Ilaija
Peresitedi Nelson: Na yaca rogolevu ena vosanikalou e vakamacalataka na bibi ni matavuvale. Na yacana o Ilaija. EL-AI-JA va Ipiriu na kena balebale “Jiova na noqu Kalou.”2 Vakasamataka mada! E cokoti tu ena yacai Elaija ena vosa va Ipiriu ruarua na vosa na Tamana kei na Luvena.
Sister Nelson: A otioti ni parofita o Elaija me taura na kaukauwa ni veivauci ni Matabete i Melikiseteki ni se bera na gauna i Jisu Karisito. Na nona inaki o Elaija me vakatakila e yalodra na gone na yalayala a caka vei ira na qase, io ena vagolea ko koya na lomadra na gone vei ira na qase. Ia kevaka e sega, sa na vakarusai taucoko ko vuravura ena nona lako mai” (Josefa Simici—Ai Tukutuku 1:39; mai cava kina na kena vakabibitaki). E sa bau dua na vosa kaukauwa.
Peresitedi Nelson: Na yalo i Ilaija sa “dua na veivakatakilai ni Yalo Tabu e tukuni vakadinadina voli me baleta na bula vakalou ni matavuvale.”3 Me vaka na kena e kune ena iVola Vosa (tuva) Vakaivolatabu, “Na kaukauwa nei Elaija na kaukauwa ni veivauci vaka matabete ena vei ka e vesu se tasere tu e vuravura e vesu se tasere tu mai lomalagi” (“Elaija”).
Sister Nelson: Na gauna eda tukuna kina ni yavala tiko na yalo i Elaija vei ira na tamata me vakauqeti ira mera vaqarai ira era sa mate, eda tukuna tiko na Yalo Tabu e vakauqeti keda meda cakava na vei ka ena vakatarai keda meda vauci kei ira na noda matavuvale ka tawamudu.
Peresitedi Nelson: E dua na ka talei meda vagolea ko koya na lomadra na gone vei ira na qase ena noda tukuna tiko vei ira na bibi ni talanoa ni tuvakawa ena sala e rawarawa ni noda raica kina na vei ka oqo. Au kila nida na raica na ivola ni tuvakawa, na itaba kei na vei ka e vuqa eso ena rawa ni vaqaqacotaka na nona vakadinadina (raica na Mosaia 1:5). Ena noda na tuvana ena noda lalaga, delani teveli, noda monalivaliva, noda yaya vakalivaliva veikauyaki, eda na rawa ni uqeti meda digidigi vakavinaka ka toso vaka voleka vua na Turaga kei na noda matavuvale.
Kevaka eda biuta tu ga ena vakatagedegede ya, ia eda se sega ni da se cakava vinaka na noda itavi. Ni da leweni lotu, na noda uqeti ena cakacaka ni tuvakawa ena vakayaloqaqataki tu ena dusidusi mai vua na Turaga ni o ira na noda kawa iliu era na sega ni rawa ni taucoko ke sega o keda (raica na V&V 128:15). Kena ibalebale eda na rawa ni vei semati ena vuku ni cakacaka vakalotu tabu ni valetabu. Eda dodonu meda sema kaukauwa vei ira na noda kawa era sa liu kei ira na wekada era na qai muri mai. Kevaka na noda kumuni talanoa kei na itaba me na yacova mai e dua na kena icavacava—kevaka eda kilai ira na noda kawa era sa liu kei na vei ka vinaka baleti ira, ia eda biuti ira tu me ra vesu tu ena sana kadua ka sega ni da qarava na cakacaka vakalotu vei ira—na duidui qo ena sega ni vukei ira na noda kawa era se vesu tu ena valeniveivesu vakayalo.
Sister Nelson: Noda maroroya na vei talanoa makawa vaka oqo e bibi, ia me kua ni ra na vakayagataki tu vei ira na noda kawa’ na cakacaka vakalotu. Eda dodonu meda solia na noda gauna vei ira na kawa era sa liu yani meda vaqara na kedra itukutuku.
Peresitedi Nelson: Sa kena balebale noda solia na noda gauna eda vakayagataka tu ena itaviqaravi. E gadrevi meda solia na noda gauna meda veiqaravi ena valetabu kei na cakacaka ni tuvakawa ka wili kina na tuva yaca.
Sister Nelson: Na noda soli bula e kauta mai na veivakakalougatataki vakalomalagi.4 Au kalougata vakalevu niu kunea e levu na noqu kawa au vakila era sa vakarau tu mera veiyalayalati kei na Kalou ka ciqoma na vei cakacaka tabu vakalotu. Ni toso tiko na gauna au sa qai raica kevaka au cakava tiko na cakacaka ni vei veiqaravi qo ka oti na noqu gauna, noqu kaukauwa kei na vakasama, kevaka au solia noqu gauna meu vaqara na tukutuku ni cakacaka vakalotu vei ira na noqu kawa sa liu yani meu gole kina valetabu meu lai veisosomitaki vei ira, e tadola na lomalagi ka tekivu drodro tale mai na kaukauwa kei na vakasama. Ia a mani levu tu na gauna meu na sotava kina na noqu lalawa. Au kila ni dredre, io e dau yaco ena vei gauna. Na cakacaka ivaletabu kei na tuvakawa e kauta mai vei au e dua na marau au kila ni sega ni vaka vuravura qo.
Cakacaka ni Tuvakawa kei na Cakacaka Vakaulotu
Peresitedi Nelson: Kevaka au a dau kaulotu nikua, o rau na noqu itokani voleka ena lomani tabanalevu se tabana sa ikoya na liuliu ni kaulotu ni tabana kei na dau ni tuvakawa.
Keda na tamata eda sucu vata kaya mai kei na noda gagadre me da kila e dua na ka me baleti ira na kawa era sa liu. Ya e yaco me dua na naki levu nodra na kaulotu. Era vuli na kaulotu mera lomani ira na tamata era vakavulica, era na taroga me baleta na nodra matavuvale. “E rau se bula beka na nomu itubutubu? E rau se bula beka na tubumuni? Ni kilai ira beka na tubumuni vaka va? E dau toso vinaka na veivosaki vei ira era dau kau vaka voleka mai vei ira na kaulotu mera dau veitalanoa taka baleti ira na tamata era lomana.
Ena gauna qo e dau dau bibi vua na kaulotu se lewe ni kaulotu me taroga, “Ni kila beka dua vei ira na tubumuni vakarua? Ni kila beka na yacadra? Na ke macala ni koya na nomu dauvakatataro ena sega ni kila yacana o ratou na lewe walu na tubuna.
Na kaulotu e rawa ni vakatura yani vua: “E tiko e dua noqu itokani e leweni Lotu ena rawa ni vukei iko. Kevaka keitou rawa ni kunea eso na yaca se ratou kece na tubumuni, ena rawa ni taura vakalailai nomuni gauna mo ni lai vaqara ocei na tubumuni vakarua?” Na nomuni tokani e vale ni Lotu, sa ikoya na dauni tuvakawa ni tabana kei na valetabu.
Sister Nelson: Au kila ni dodonu mera vakacegu na kaulotu ni ra kila ni sega ni na tu taudua gauna era vaqarai ira era mera vakavulica era na ciqoma na dina ni kosipeli vakalesui mai vei Jisu Karisito. A veiqaravi vaka daunivakasala ki na va na Peresitedi ni Lotu o Peresitedi George Q. Cannon (1827–1901), e vakavulica ena gauna qo, ira era lewena tiko mai na Lotu me baleta na nodra vei masulaki ira na nodra kawa sa liu yani me baleta ira era na wekadra era muri jiko mai mera lewena mai Lotu mera rawa ni ciqoma o ira na nodra kawa sa liu na cakacaka bibi vakalotu veisosomitaki.5
Na Veivakacerecerei: Sa Cakacaka Ni Matavuvale
Peresitedi Nelson: Na bula vakacerecerei sa cakacaka ni matavuvale. Na bula ni veivakacerecerei ni matavuvale ena rawa ga ena loma ni cakacaka ni veivakabulai vakalotu ni kosipeli nei Jisu Karisito. Na icavacava ni noda sasaga meda marau kina vakamatavuvale—ni da sa taura na noda edaumeni, vauci vata, ka vakarautaki ki na bula tawamudu ena iserau ni Kalou.
Sister Nelson: Na vei kalasi ni Lotu eda curuma, na veigauna eda veiqaravi kina, na veiyalayalati eda cakava vata kei na Kalou, na veicakacaka vakamatabete eda ciqoma, na kece eda cakava e vale ni Lotu e liutaki keda kece tiko ena valetabu, na vale ni Kalou. E levu na kaukauwa e tu vei ira na veiwatini kei ira na luvedra ena cakacaka vakalotu na veivauci gauna eda maroroya kina na noda veiyalayalati.
Peresitedi Nelson: Ena veisiga eda digitaka na vanua eda via bula kina ka tawamudu ena noda vakarau ni vakasama, na ka eda vakila, na ka eda vosataka, kei na noda itovo. A kaya na Tamada Vakalomalagi ni Nona cakacaka kei na lagilagi oya “me ra tucake tale mai na mate na tamata kecega ka rawata na bula tawamudu (raica na Mosese 1:39). Ia o Koya e vinakata meda digitaka meda lesu yani vei Koya. O Koya ena sega ni na vakaukauwa taki keda. Na dodonu ni noda maroroya na noda veiyalayalati e vakaraitaka tiko vei Koya na levu ni noda via lesu tale Vua. Na veisiga e kauti keda mai vakavoleka vua na tamada ena lagilagi ni nona bula tawamudu. Eda gadreva meda maroroya na noda veiyalayalati, veivutuni ena veisiga, ka vakasaqara ka vaka na noda Vakabula. Ya walega ena qai rawa me tawamudu na noqu matavuvale.
Sister Nelson: qo na noqu vakadinadina ni na vacava na totoka ni bula ena gauna qo, ka wacava na kena dredre eda na sotava, na nomu vaka itavi tiko ena valetabu kei na cakacaka ni tuvakawa ena vaka vinaka taka. Na cava o gadreva tu ena nomu bula na gauna qo? Levu na loloma? Levu na marau? Levu na bula vakaivakarau? Levu na vakacegu? Levu na gauna vakaibalebale? Levu na nomu vakila na vakasama ni veisau? Levu na lasa? Levu na sau ni taro e taroga na yalomu? Levu na vei semati kei ira na tani? Levu na nomu kila ni ka o wilika ena volanikalou? Levu na sasaga mo loloma kei na veivosoti? Levu na na nomu sasaga mo masu vaka kaukauwa? Levu na nomu na vakayaloqaqataki ena nomu vakasama ni cakacaka kei na vakarau ni cakacaka e qaravi? Levu na gauna ena vei ka e vaka betena?
Au sa kerekere vakabibi vei kemuni mo ni solia na nomuni gauna vua na Turaga ena nomu vakalevutaka na nomu gauna ni veiqaravi kina ena valetabu kei na cakacaka ni tuva kawa ka raica na ka ena yaco. Qo na noqu vakadinadina ni gauna eda vakaraitaka vua na Turaga ni da dina tiko ena noda vukei ira na noda kawa era sa liu, na tadola o lomalagi eda na qai ciqoma na vei ka eda gadreva.
Peresitedi Nelson: Eda na rawa vakauqeti ena vei siga me baleta na valetabu kei na cakacaka ni tuvakawa. Ia meda cakava e dua naka meda vakila kina na marau qo vakai keda. Au via vaka davora e dua na ibolebole vei keda yadua me baleta na cakacaka totoka qo vata kei na vei ka eda vakila ni da semata tiko na cakacaka qo. Au sureti kemuni mo ni vakasamataka ena masumasu na solibula cava—ena gadrevi beka na soli ni gauna—e rawa ni caka me levu cake kina na tuvakawa kei na cakacaka ni valetabu ena yabaki oqo.
Eda sa vakaitavi tiko ena cakacaka ni Kalou. Ni sa bula tiko o Koya. Na Karisito ko Jisu. Oqo na Nona Lotu. Eda sa luvena vakayalo. O Koya e rawa ni vakararavi vei keda.