Nai Vakarau Vakarisito
Mai na vosa ena dua na soqoni ni Lotu e Brigham Young University–Idaho ena ika 25 ni Janueri, 2003.
E levu cake na loloma titobu nei Jisu, o koya e a vakararawataki vakalevu duadua, vei keda e lailai sara na noda vakararawataki.
RARAMA KEI VURAVURA, MAI VEI HOWARD LYON.
E a vakavulica o Elder Neal A. Maxwell (1926–2004) e dua na ivakavuvuli e sa tarai au sara vakatitobu kau sa dau vakanamata kina vakalevu ena gauna ni noqu vuli, railesu kei na vakasama vakatitobu. E a kaya o koya, “Ke a sega na Veisorovaki vakavo ga na ivakarau i Karisito!”1 Mai na gauna au a rogoca kina na itukutuku matata ka veilauti oqo, au sa saga meu vulica vakalevu cake ka kila deivaki na vosa oqo na “ivakarau dei” ni dua na tamata. Au sa dauvakananuma vakatitobu na veiwekani e tiko ena ivakarau dei i Karisito kei na Nona Veisorovaki—kei na revurevu ni veiwekani oqori vei keda, ni da tisaipeli.
Na iVakarau dei ni Turaga o Jisu Karisito
E dua beka na ivakatakilakila ni ivakarau dei sai koya na noda rawa ni kila na gauna veidonui meda dolele yani vei ira na tani ena gauna era sotava tiko kina na veibolebole se dredre eda sotava sara tiko ga o keda ena kena kaukauwa ena gauna saraga oya. Na ivakarau dei e vakaraitaki, oqo na ivakaraitaki, na kaukauwa meda vakila kina na nodra rarawa tiko eso tale na tamata ena gauna eda rarawa sara tikoga kina o keda, ni rawa meda kidava na nodra via kana eso tale ena gauna eda waloloi tu kina o keda, kei na kaukauwa meda dolele yani ena loloma titobu ena nodra yaluma vakayalo o ira na tani ena gauna eda bikai tu ena lomaleqa ena noda bula vakayalo. Ia, na ivakarau dei e vakaraitaki ena noda rai yani ka dolele yani vei ira tale eso, ni sa kena ivakarau taumada sai koya meda nanumi keda mada iliu ka raici keda tikoga. Kevaka, na kena rawati na ivakarau dei oqo na rawa ni noda kila na veika oqori, ia, sa ivakaraitaki cecere duadua ni vuravura oqo, ni kena bulataki tiko ena loloma titobu na iVakabula.
Eso na iVakaraitaki ni Vakarau dei i Karisito
Oqo o Ira na Tinikarua ka Talai Ira Yani o Jisu, mai vei Walter Rane
Ena rumu e cake ena bogi ni Otioti ni Vakayakavi, ena bogi vata ga ena sotava kina o Koya na rarawa cecere duadua e sa bau yaco ena vuravura kece a bulia o Koya, e a tukuna o Karisito baleta na Dauveivakacegui kei na vakacegu.
“Au sa vosataka na veika oqo vei kemudou, niu sa tiko vata kei kemudou.
“Ia na Dauveivakacegui, na Yalo Tabu, ko koya ena tala mai ko Tamaqu e na yacaqu ena vakavulici kemudou ena ka kecega kau a vosataka vei kemudou.
“Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia o vuravura. Me kakua ni rarawa na yalomudou se rere.” (Joni 14:25–27).
Nona kila ni sa vakarau me sotava o Koya na yali ni logaloga vinaka kei na vakacegu, kei na gauna e a nuiqawaqawa ka rere tu na Yalona, e a dolele yani na iVakavuvuli ka solia vei ira tale eso na veivakalougatataki vata ga e a rawa ni vakaukauwataki Koya.
Ena Masu ni Vakatakekere, e cabora o Jisu ni se bera nodratou a gole kei ira na Nona tisaipeli ki nai soniwai ko Kitironi ki na Were ko Kecisemani, e a masulaki ira na Nona tisaipeli na iVakavuvuli kei ira kece “era na vakabauti au ena vuku ni nodra vosa;
“Me ra dua bau kecega; me vaka edaru a duabau, Tamaqu, me ra dua bau kei kedaru. …
“… Me ra vakayacori sara me ra duabau ga; ia me kila kina ko vuravura ni kemuni sa talai au mai, ka ni kemun sa lomani ira me vaka ko ni sa lomani au. …
“Ia kau sa vakatakila vei ira na yacamuni, ia kau na vakatakila tiko: me tu vei ira na loloma ko ni a lomani au kina, meu tiko talega kei ira (Joni 17:20, 21, 23, 26).
Au dau vakataroga wasoma na veitaro oqo niu dau vakasamataka vakatitobu na veika oqo kei na so tale ni sa voleka sara tiko ni sotava na iVakabula na rarawa ena were kei na Nona cakitaki: E a rawa vakacava me masulaki ira tale eso me ra duabau ni sa voleka tiko na gauna ni Nona yaluma. Na cava e rawa kina Vua me vasaqara na nodra logaloga vinaka kei na vakacegu o ira e lailai sara mai vei Koya na ka era gadreva? Ni sa bikai tu o Koya ena druka ni vuravura e a bulia o Koya, e rawa vakacava me vakanamata taucoko ka vakatabakidua ki na nodra lomaleqa kei na ituvaki eso tale? E rawa vakacava vua na iVakavuvuli me dolele yani ki tuba ni na sega ni rawa ni cakava vakakina e dua e lailai mai vua? E dua na itukutuku mai vei Elder Maxwell e sauma na veitaro oqori:
“Na ivakarau dei i Jisu e vakadeitaka na Nona veisorovaki cecere. Kevaka e sega na ivakarau ni veilaveti i Jisu ke a sega na veisorovaki veilaveti! Na Nona ivakarau dei e vakakina me ‘vakila na veivakatovolei kecega’ (Alama 7:11), ia A temaki ‘a sega ni rawai’ (V&V 20:22).”2
E levu cake na loloma titobu nei Jisu, o koya e a vakararawataki vakalevu duadua, vei keda e lailai sara na noda vakararawataki. Ia, na titobu ni rarawa kei na loloma e veisemati kaukauwa sara loloma titobu e vakila o Koya ka mai veiqaravi.
Vakasaqarai Vagumatua na Loloma Uasivi
E rawa ni da vakasaqara ena bula oqo na veivakalougatataki ka vakatubura eso na ivakarau dei e Vakarisito. Ia, e rawa vei keda ena noda bula oqo meda sasagataka na yalododonu ka ciqoma na isolisoli vakayalo e veicuqeni kei na noda rawa ni kila na gauna veidonui meda dolele yani vei ira na tani ena gauna era sotava tiko kina na veibolebole se dredre eda sotava sara tiko ga o keda ena kena kaukauwa ena gauna saraga oya. Ena sega ni da rawata ga na kaukauwa oqori mai na kaukauwa vakatamata se gumatua yadua. Ia, eda sa gadreva ka vakararavi ki na nona “cakacaka dodonu, kei na loloma cecere, kei na nona loloma soli wale na Mesaia Tabu” (2 Nifai 2:8). “Na vosa ena vosa, na ivunau ena ivunau” (2 Nifai 28:30) ka “ni sa toso na gauna” (Mosese 7:21), eda sa rawa ni dolele yani ki tuba ni sa ivakarau taumada me da leqataki keda ga.
Au na vakatura ni dodonu me daru na masulaka tiko, gadreva, sasagataka ka cakacakataka me bucini na ivakarau dei Vakarisito kevaka eda nuitaka meda ciqoma na isolisoli vakayalo ni loloma uasivi—sai koya na loloma taucoko i Karisito. Na loloma uasivi e sega ni iwalewale se ivakarau dei ni bula, ena rawa ni da taukena ena noda sasaga gumatua kei na vosota vakadede. E sa dina sara, e dodonu meda na rokova na noda veiyalayalati ka bula kilikili kaya ka vakayacora na veika kecega meda rawata na iloloma; ia na kena dina na isolisoli ni loloma uasivi ena rawati keda—ke sega ni o keda ki na loloma uasivi (raica na Moronai 7:47). Na Turaga ga e lewa na gauna eda na ciqoma kina na isolisoli vakayalo, ia e dodonu meda vakayacora na veika kece ena noda kaukauwa meda gadreva, sasagataka, sureta, cakacakataka meda rawata na veisolisoli oqori. Ni da cakava vakalevu na sala e veiganiti ki na ivakarau dei i Karisito, sa da vakaraitaka tiko ki lomalagi ena sala kaukauwa na noda gagadre cecere ni isolisoli vakayalo ni loloma uasivi. E sa matata sara ni da sa kalougata ena isolisoli totoka oqo ni da dolele tiko yani vakalevu ki tuba ni sa ivakarau taumada vakatamata e vuravura e tiko vei keda meda na raici keda tikoga.
O Jisu na Karisito e sa Luvena Duabau na Tamada Tawamudu. Au kila ni bula tiko o Koya. Kau vakadinadinataka ni sa mai rawa vei keda na madigi ni keda ituvaki vakayago ka tawamudu ena vuku ni Nona ivakarau dei. Meda dolele yani ki tuba ni sa ivakarau taumada meda raici keda ga.