Elder Ulisses Soares : Hōʼē taʼata ʼaore roa e haʼavare i roto iāna
I te mau mahana mātāmua nō tāna tāviniraʼa, ʼa māʼiti ai Iesu i tāna mau ʼāpōsetolo, ʼua ʼite ʼoia ia Natanaela i te haereraʼa mai iāna ra. ʼUa ʼite ʼoiʼoi aʼera ʼoia i te maitaʼi o Natanaela, ma te parau ē, « ʼa hiʼo na i te ʼāti ’Īserā’ela mau, ʼaore roa e haʼavare i roto iāna ! »1
ʼUa ʼite Iesu ē e taʼata ʼāʼau mā ʼo Natanaela, te parau-tiʼa i roto i tāna mau ʼōpuaraʼa, ʼe ma te faʼahua ʼore ʼaore rā te haʼavare ʼore. Mea au nā te Fatu teie tāpaʼo nō te parau-tiʼa, ʼe ʼua piʼi ʼoia ia Natanaela ʼei hōʼē ʼāpōsetolo.2
ʼUa riro Ulisses Soares mai ia Natanaela nō mutaʼa iho ra, ʼe ʼua piʼi atoʼa te Faʼaora iāna.
« Te māramarama o tō’u nā metua »
’Ua fānauhia Ulisses, te hōpeʼa o nā taeaʼe e maha, i São Paulo, Beresiria, i te 2 nō ’Ātopa 1958. E oraraʼa ha’ehaʼa roa tōna, ʼāre’a rā, e mau taʼata maitaʼi, tōna nā metua, ʼo Apparecido ʼe ’o Mercedes Carecho Soares, e mau taʼata ʼo tei rave itoito i te ʼohipa, ʼo tei faʼaroʼo ma te ʼāʼau parau-tiʼa i te mau misiōnare. ʼUa ʼāmui mai rātou i roto i te ʼĒkālesia i te onoraʼa ʼo tō Ulisses matahiti.
« ʼAita roa atu vau i ʼite i te taeaʼe Apparecido i te māʼiriraʼa i te hōʼē pureraʼa » ʼua parau mai ʼo Osiris Cabral, tei tāvini ʼei peresideni titi i te tau e taureʼareʼa ïa ʼo Ulisses. « E mea haʼapaʼo atoʼa ʼo Mercedes. ʼUa fāriʼi Ulisses i te itoito o tōna nā metua. »
« ʼUa paʼari Ulisses Soares i roto i te ʼĒkālesia ma te peʼe i te māramarama o tōna nā metua, ʼo Apparecido ʼe ’o Mercedes Soares (i te ʼaui). ʼA tiʼaturi ai Ulisses i te Fatu noa atu te pātoʼiraʼa, ʼua haʼapiʼi mai ʼoia ʼei tamariʼiriʼi ʼia tāpeʼa māite i te Faʼaora ʼe tāna ʼevanelia.
ʼUa ʼūaʼa te ʼāʼau maitaʼi ʼo Ulisses ʼa haʼapiʼi ai ʼoia i te mau ʼēʼa o te Fatu. « ʼUa paʼari au i roto i te ʼĒkālesia ma te peʼeraʼa i te māramarama o tōʼu nā metua », ʼua parau Elder Soares. ʼA peʼe ai ʼoia i tāua māramarama ra, ʼua tupu atoʼa tōna ʼitera’a pāpū i te pūai noa atu te pātoʼiraʼa.
« ʼO vau anaʼe te melo nō te ’Ēkālesia i roto i tāʼu fare haʼapiʼiraʼa, ʼe ʼua tāmata noa na te tahi atu mau tamāroa i te huti iāʼu i raro ʼe ʼia tūraʼi iāʼu ’ia rave i te mau mea hape », ʼua parau mai ʼoia. « ʼUa tiʼa iāʼu ʼia haʼapiʼi i te pāruru iāʼu iho i roto i teie mau tāmataraʼa, ʼua tiʼaturi noa rā vau i te Fatu ma tōʼu ʼāʼau atoʼa nō te tauturu iāʼu ʼia manuia. ʼUa haʼapiʼi mai au ʼei taureʼareʼa ē ʼia rave anaʼe ʼoe i tā ʼoe tufaʼa, ʼe rave te Fatu i tāna tufaʼa. E tiʼa rā ia ʼoe ʼia tāpeʼa māite i tōna rima ʼe i tāna ʼevanelia ».
I te 15raʼa o tōna matahiti, ʼua ani tōna ʼepisekōpo iāna ʼia haʼapiʼi i te hōʼē piha Ha’api’ira’a Sābati a te Feiā ʼĀpī. ʼUa faʼatumuhia te hōʼē haʼapiʼiraʼa tāna i haʼapiʼi i niʼa i te noaʼaraʼa i te hōʼē ʼiteraʼa pāpū nō niʼa i te ʼevanelia. ʼUa taiʼo ʼo Ulisses i te Buka a Moromona, ʼua ʼite ʼoia i te mau taime atoʼa e mea mau te ʼĒkālesia, e ʼua tiʼaturi ʼoia i te Faʼaora ia Iesu Mesia.
ʼA faʼaineine ai ʼoia i tāna haʼapiʼiraʼa, ʼua hinaʼaro pūai ’oia i te faʼaʼite i tāna piha haʼapiʼiraʼa i te parau mau o te ʼevanelia. Tē haʼamanaʼo nei Elder Soares, « ʼua taiʼo ʼe ʼua pure ʼū’ana vau ». « I muri aʼe i tōʼu tūturiraʼa, ʼua tae mai te hōʼē manaʼo mārū, ʼe ʼua haʼapāpū mai ra te hōʼē reo iti haʼihaʼi iāʼu ē tei niʼa vau i te ʼēʼa tiʼa. Nō te pūai roa o te reira, e’ita tā’u e nehenehe e parau ē, ’aita vau i ’ite ».
ʼA paʼari ai Ulisses, ʼua haʼapiʼi mai ʼoia ē mai te mea e rave ʼoia i te mea hau atu i tei tīaʼihia ʼaore rā tei anihia iāna, ʼe haʼamaitaʼi rahi te Fatu iāna. ʼUa tae mai taua huru haʼapiʼiraʼa ra ʼa faʼaineine ai ʼoia nō te hōʼē misiōni. I roto i te mau uiuiraʼa ia Ulisses, ʼua haʼapāpū atu tōna ʼepisekōpo i te faufaʼa rahi ʼia haʼapaʼo i te mau faʼaueraʼa ʼe te ora-parau-tiʼa-noa-raʼa. ʼUa haʼapūai atoʼa ʼoia i te parau nō te faʼaineineraʼa i te pae faufaʼa.
I teie mahana tē ʼaufau nei te tāʼātoʼaraʼa o te mau misiōnare nō Beresiria i tā rātou misiōni, e rave rahi o te mau ʼutuāfare e ʼaufau nei i te tāʼātoʼaraʼa o te mau haʼamauʼaraʼa. ʼA fātata atu ai Ulisses i te matahiti nō te misiōni, ʼua faʼaoti ʼoia i te ʼimi i te tāʼātoʼaraʼa o te moni e tītauhia nō tāna misiōni. Nā roto i te peu pūai maitaʼi tāna i haʼapiʼi mai i roto i te ʼohipa haʼihaʼi a tōna metua tāne ʼe ma te ʼaravihi i te patapata ʼoiʼoi i te rata, ʼua ʼiteahia mai ia Ulisses te hōʼē ʼohipa i te ao nō te tautururaʼa i te hōʼē taiete ʼohipa ʼia faʼaineine i te parau ʼaufauraʼa i te feiā rave ʼohipa.
I muri aʼe i te tataʼuraʼa nō te hōʼē hiʼopoʼaraʼa fifi, ʼua haʼamata aʼera ʼoia i te haʼapiʼi i te ʼohipa nūmeraraʼa i te hōʼē fare haʼapiʼiraʼa tuarua tōroʼa i te pō. I te mau ʼāvaʼe atoʼa, i muri aʼe i te ʼaufauraʼa i te tufaʼa ʼahuru e faʼaherehere ʼoia i te moni nō tāna misiōni. I muri aʼe i te hōʼē matahiti, ʼua tuʼuhia ʼoia i roto i te piha haʼapaʼo faufaʼa nō tāna taiete ʼohipa.
« Mea nā reira tōʼu haʼaputuraʼa i te moni nō te ʼaufau i tāʼu misiōni », ʼua parau Elder Soares. « E i te mau ʼāvaʼe atoʼa i roto i nā matahiti e toru, hou ʼa faʼaruʼe ai au, ʼua hoʼo mai au i te tahi mea tāʼu i hinaʼaro—hōʼē ’ahu tāne, hō’ē piripou ’āvae roa, hō’ē tōtini, hōʼē tāʼamu ʼarapoʼa, hōʼē ʼāfata ʼahu ». ʼUa hinaʼaro atoʼa ʼoia ’e ʼua fāriʼi, i te here ʼe te pātururaʼa pūai a tōna nā metua ʼe te feiā faʼatere.
ʼUa piʼihia Ulisses i te misiōni nō Beresiria Rio de Janeiro. ʼUa tāvini ʼoia i te tufaʼa mātāmua nō tāna misiōni i raro aʼe i te peresideni Helio da Rocha Camargo, tei riro mai i muri iho ’ei huimana fa’atere mātāmua tei piʼihia nō Beresiria mai. ʼUa haʼamata Ulisses i tāna misiōni i te ʼomuaraʼa o te matahiti 1988. ʼUa haʼamoʼahia te hiero mātāmua i Amerika Latino, i muri mai i taua matahiti ra i São Paulo, nā te peresideni Spencer W. Kimball (1895-1985).
I te ʼāvaʼe Tēnuare 1980, ʼua pa’uma atu ʼo Ulisses ʼe tōna hoa misiōnare, tei ʼore ā i fāriʼi i tōna ʼōroʼa hiero, i niʼa i te hōʼē pereʼoʼo uta taʼata i Rio de Janeiro nō te hōʼē tere e vaʼu hora te maoro i te hiero nō São Paulo Brazil. ʼUa fārerei te mau metua o Ulisses ʼe te mau taea’e ’e mau tuahine iāna i reira, ʼe ʼua tāʼatihia te ʼutuāfare Soares nō te tau ʼe a muri noa atu. Eʼita roa e moʼehia ia Ulisses taua nā hora e pae ra ’e tōna ʼutuāfare i roto i te hiero nō São Paulo. I muri aʼe i taua mahana ra, ʼua hoʼi atu ʼoia ʼe tōna hoa i te ʼaua misiōni.
Te tuʼuraʼa i te Atua nā mua roa
ʼUa ʼoaʼoa Ulisses i te hōʼē misiōni manuia, tei haʼapūai atu ā i tōna ʼiteraʼa pāpū. I tōna hoʼiraʼa i te ʼutuāfare, ʼua ʼiteahia iāna te hōʼē ʼohipa ʼe ʼua haʼamata ʼoia i te haʼapiʼi i te ʼohipa nūmeraraʼa ʼe te tereraʼa faufaʼa i te hōʼē fare haʼapiʼiraʼa teitei i reira.
Fātata e hitu ʼāvaʼe tōna hoʼiraʼa atu i te fare, ʼua fārerei ʼoia i te « tuahine Morgado » i te hōʼē oriraʼa nā te mau titi. ʼUa tāvini Ulisses ʼei tiʼa faʼatere nōna nō te hōʼē taime, ʼe ’ua ʼāparau rāua i te maororaʼa o te pō i te faʼaʼiteraʼa i te mau ʼāʼamu nō te misiōni. E toru hepetoma i muri iho, ʼua haʼamata rāua i te arapae.
E vaʼu tō Rosana Fernandes Morgado matahiti ʼa haʼamata ai tōna tuaʼana vahine, ʼo Margareth, i te ’āfaʼi iāna i te fare pureraʼa. I te pae hopeʼa, ’ua fāriʼi nā feiā ʼāpī melo ʼore ʼe te itoito i te parau faʼatiʼa nā tō rāua metua tāne ʼia bāpetizohia, e tiʼa rā ia rāua tātaʼitahi ʼia tīa’i e tae noa atu i te 17raʼa o tō rāua matahiti. ʼUa haere Rosana i te fare pureraʼa e iva matahiti te maoro hou ʼa fāriʼi ai i te parau faʼatiʼa ʼia bāpetizohia ʼoia.
ʼUa ora Ulisses i te tufaʼa apatoʼerau nō São Paulo, ʼe tē ora ra ʼo Rosana i pīhaʼi iho i tōna nā metua i te tufaʼa apatoʼa nō te ’oire. E piti e tae atu e toru hora nō te tere nā roto i te ʼoire nā niʼa i te pereʼoʼo uta taʼata ʼe te pereʼoʼo nā raro i te fenua. Maoti, tē ora ra ʼo Margareth ʼe tāna tāne faʼaipoipo, ʼo Claudio, i pīhaʼi iho i te fare o tōna nā metua.
« ʼIa haere anaʼe mai ʼo Ulisses i te mau hopeʼa hepetoma nō te arapae ia Rosana, e mea fifi roa nōna ’ia hoʼi i tōna fare i te pō », tē haʼamanaʼo ra ʼo Elder Claudio R. M. Costa, Hitu ʼAhuru huimana faʼatere rahi, nō tōna tao’ete tāne. Nō reira, e ani ʼoia ʼe ʼo Margareth ia Ulisses ʼia faʼaea mai i te pō i tō rāua ra fare i muri aʼe i tāna mau arapaeraʼa. « ʼUa faʼaʼamu māua iāna nō te hōʼē taime », ʼua parau faʼahou mai Elder Costa.
« E taʼoto ʼoia i niʼa i te pārahiraʼa roa i roto i tō māua piha fāriʼiraʼa taʼata »,ʼua parau te tuahine Costa. « ʼNō faʼaipoipo noa iho nei māua, nō reira ʼaita tā māua e ’ahu taʼoto ē atu. E tāpoʼi ʼoia iāna iho i te hōʼē ʼahu pāruru tahito. ʼUa ʼoaʼoa ʼoia nō te mea ʼua nehenehe iāna ʼia ’ite faʼahou ia Rosana i te poʼipoʼi aʼe. Mea maitaʼi ʼoia i tōʼu tuahine, ʼe mea au roa tōʼu nā metua iāna.
ʼUa faʼaipoipohia ʼo Ulisses ʼe ’o Rosana i roto i te hiero nō São Paulo Beresiria i te 30 nō ʼĀtopa 1982.
Mai te mea e faʼaea ʼoutou te tahi tau minuti i pīhaʼi iho ia Elder ʼe te tuahine Soares, ʼe ʼite-mau-hia tō rāua here, tō rāua faʼahiahia ʼe tō rāua faʼatura i te tahi ʼe te tahi. Nō Elder Soares, « ’ua riro Rosana ’ei hi’ora’a nō te maita’i ’e te here ’e te pūpūra’a hope iāna i te Fatu ’e nō’u ’e nō tō’u ’utuāfare ».3 Nō te tuahine Soares, ʼua riro Ulisses « ’ei hōʼē taoʼa aroha nō te raʼi mai ».
ʼUa parau faʼahou mai te tuahine Soares : « ʼUa riro noa ʼoia ʼei taʼata haʼapaʼo ʼe te parau-tiʼa, ʼua haʼapaʼo maitaʼi noa ʼoia i tō mātou ʼutuāfare, ʼe ’ua hāmani maitaʼi noa ʼoia iāʼu. I roto i tōna mau piʼiraʼa ato’a i roto i te ʼĒkālesia, ʼua itoito maitaʼi ʼoia i te raveraʼa i te reira. E haere ʼe e rave ʼoia. ʼUa tuʼu noa ʼoia i te mau mea a te Atua nā mua roa i roto i tōna oraraʼa. ʼUa here au iāna nō te mea ʼua ʼite au ē mai te mea e tuʼu ʼoia i te mau mea a te Atua nā mua roa, ʼe tuʼu atoʼa ʼoia iāʼu nā mua roa ».
Nō niʼa i tāna vahine faʼaipoipo teie tā Elder Soares i parau, « ’o ʼoia te ʼaito mau ʼe te faʼaururaʼa i roto i tō māua ʼutuāfare. E mea here ʼoia i te taʼata, te hāmani maitaʼi ʼe te faʼa’oroma’i i te mau taʼata atoʼa. E tāhōʼē ʼoia i tō mātou ʼutuāfare, ʼe e hiʼo ʼoia i te maitaʼi i roto i te mau taʼata atoʼa. E rave rahi mau mea tāna i faʼatupu i roto i tōʼu oraraʼa. Nō niʼa i tōʼu piʼiraʼa i roto i te Pupu nō te Tino ’Ahuru ma Piti ’āpōsetolo, ʼua parau haʼuti atu vau iāna, ‘tē faʼahapa nei au ia ʼoe nō teie ʼohipa nō te mea ʼua faʼarahi mau ʼoe i te mana o te ʼevanelia i roto i tōʼu oraraʼa’ ».
Hō’ē māfatu rahi
Tē haʼamanaʼo nei ʼo Gustavo, te tamariʼi matahiapo a te mau Soares, i te pō, ’a faʼaroʼo ʼore ai ʼoia, ʼei tamariʼiriʼi, i tōna nā metua ʼe ʼua tāpuni atu ʼoia nō te haere atu i te hōʼē faʼaʼoaʼoaraʼa matahiti i tō rātou vāhi faʼaearaʼa i São Paulo tei mātauhia mai te Festa Junina.
« Tei rotopū vau i te hōʼē nahoʼa rahi e ʼarearea ra ʼa faʼaroʼo ai au i te hōʼē taʼata i te piʼiraʼa i tōʼu iʼoa nō te haere atu i mua », ʼua parau ʼoia. « I reira tōʼu ʼiteraʼa i tōʼu pāpā ».
ʼUa peʼapeʼa roa tōna nā metua, ʼaita rā ʼoia i tamaʼi ia Gustavo, ʼua tauahi atu rā ʼo Ulisses iāna.
« ʼUa tauʼa parau hōhonu mātou nō tōʼu moʼeraʼa, ʼua faʼatura rā tōʼu nā metua iāʼu », ʼua parau faʼahou mai ra Gustavo. « ʼUa ʼite au ē ʼua pāruru-mau-hia vau, ʼe ʼua ʼite au ē ʼua here mau rāua iāʼu ».
E mea haʼapaʼo roa ʼo Ulisses i tōna ʼutuāfare. Noa atu tāna ʼohipa ʼe te rahi o tōna mau tere i roto i te mau matahiti, e rave rā ʼoia i te taime nō te patu i te mau auraʼa ʼe tāna mau tamariʼi.
ʼA piʼihia ai Elder Soares i roto i te Pupu nō te Tino ’Ahuru ma Piti ’āpōsetolo i te 31 nō Māti 2018, penei aʼe ’aita atu paha mau taʼata tei māere rahi maori rā ʼo Gustavo ʼe tōna nā tuahine, ’o Lethicia Caravello ʼe ’o Nathalia Soares Avila. Mai te mea rā nā te aroha, te ʼohipa pūai, ʼte ʼiteraʼa ʼe te ha’ehaʼa e faʼatiʼa i te hōʼē taʼata ʼia riro ʼei ʼāpōsetolo, e nehenehe rātou ʼia taʼa nō te aha te Fatu i piʼi ai i tō rātou metua tāne.
« I tō Iesu piʼiraʼa i tāna mau ʼāpōsetolo, ʼaita ʼoia i piʼi i te mau Pharisea māramarama roa aʼe, ʼua piʼi rā ʼoia i te mau feiā rāvaʼai », ʼua parau Lethicia. « Mai tōʼu metua tāne ʼe tōʼu metua vahine te huru. ʼUa tiʼaturi hope roa rāua i te Fatu, ʼe ʼua faʼaʼohipa ʼoia ia rāua nō te faʼatupu i tāna mau ʼohipa nō te mea ʼua ʼite ʼoia ē e ʼere rāua i te mea pipiri, e mea ineine rā i te rave pūai i te ʼohipa, ʼe ʼua navaʼi i te ha’ehaʼa nō te fāriʼi ʼia aʼohia ».
E tauturu te « māfatu rahi » o tō rātou metua tāne ʼa haere ai ʼoia i mua mai te hōʼē o te mau ʼite taʼa ʼē a te Fatu, ʼua parau mai ra ʼo Nathalia. « E māfatu tōna nō te reira ʼohipa », ʼua parau mai ra ʼoia. « E ʼite ʼoia i te mana o te raʼi, e mea here ʼoia i te mau taʼata atoʼa, ʼe tē hinaʼaro nei ʼoia i te rave i te mea tiʼa ».
« E ’āfaro te mau mea atoʼa »
I tō Elder Soares tāviniraʼa ʼei peresideni nō te misiōni nō Portugal Porto mai te matahiti 2000 e tae atu i te matahiti 2003, ʼua mātau-maitaʼi-hia ʼoia i te faʼaʼohiparaʼa i te parau Potiti « Tudo vai dar certo »—e ʼāfaro te mau mea atoʼa.
« ʼUa haʼapiʼi ʼoia i te reira ia mātou », tē haʼamanaʼo ra ʼo Ty Bennett, te hōʼē o tāna mau misiōnare. « Tē ora nei ʼoia i tōna oraraʼa ma te faʼaroʼo ʼe te ʼanaʼanatae ē mai te mea e rave tātou i te mea tā te Fatu e hinaʼaro ia tātou ʼia rave, ʼe ʼāfaro te mau mea atoʼa ».
ʼUa haʼapiʼi atoʼa ʼoia i tāna mau misiōnare ’eiaha e faʼaʼohipa i te mau taʼo fifi ʼaore rā e ’ore e nehenehe, te parau ra ʼo Richard Shields, te tahi atu o tāna mau misiōnare. « ʼUa faʼaau mātou i te mau mea i te mau ‘tāmataraʼa’. Nā taua aʼo ra i faʼaʼāfaro i tōʼu oraraʼa, ʼia faʼariro anaʼe au i te mau mea mai te mau ‘tāmataraʼa’ e tiʼa ʼia haʼavīhia ʼeiaha rā mai te mau mea ‘fifi’ ʼaore rā e ʼore e nehenehe’ ».
ʼAita taua huru faʼaroʼo ʼe taua ʼanaʼanataeraʼa ra i tae mai nō roto mai i te hōʼē oraraʼa ʼōhie. ʼUa mātau maitaʼi ʼo Elder ʼe te tuahine Soares i te hepohepo nō te faʼaroʼo ʼore ʼe te ʼanaʼanatae ʼore, te rohirohi o te mau mahana ʼohipa roa ʼe te tuatāpapara’a, te mau tāmataraʼa nō te ea maitaʼi ʼore, ʼe te māuiui nā roto i te maruaraʼa te tamariʼi, te tamariʼi tei fānau-pohe-hia mai, ʼe te pohe o te mau tamariʼi ʼe te mau metua.
Nā roto rā i te tere o te oraraʼa nei, ʼua tuʼu rāua i tō rāua faʼaroʼo i roto i te mau parau au-roa-hia e Elder Soares o te pāpaʼiraʼa moʼa « ʼia vai ha’ehaʼa noa ʼoe; e nā te Fatu tō ʼoe Atua e arataʼi ia ʼoe nā tō ʼoe rima ra, ʼe e hōroʼa atu ia ʼoe te pāhonoraʼa i tā ʼoe mau pure ».4
« Te mau tāmataraʼa e tufaʼa nō tō tātou haereraʼa i mua », ʼua parau Elder Soares. « Ia faʼaʼoromaʼi anaʼe tātou i roto i te māuiui, ʼia haʼapiʼi anaʼe tātou ʼia upoʼotiʼa atu i niʼa i te mau tāmataraʼa nō te oraraʼa, ʼia vai itoito noa anaʼe tātou, e hiʼo maitaʼi mai te Fatu ia tātou, ʼe e haʼamaitaʼi mai ʼoia ia tātou i te mau haʼamaitaʼiraʼa tāna i fafau mai ».
ʼE ʼia tāpeʼa māite anaʼe tātou i te ʼauri, eʼita te Fatu e vaiiho ʼōtare noa ia tātou, te parau faʼahou mai ra ʼoia.
Nā te haʼapaʼo-māite-raʼa i te mau faʼaueraʼa, i te ʼevanelia, i te mau pāpaʼiraʼa moʼa, ʼe i te Fatu ia Iesu Mesia e tauturu ia tātou ʼia haʼavī i te mau tāmataraʼa o te oraraʼa nei » tē faʼaʼite pāpū mai nei Elder Soares. « ʼIa tūturi anaʼe tātou nō te pure, e pārahi mai ʼoia i pīhaʼi iho ia tātou, ʼe e arataʼi ʼoia ia tātou. E faʼauru ʼoia ia tātou i te vāhi e tiʼa ʼia haere atu ʼe te mea e tiʼa ʼia ravehia. ʼIa haʼapaʼo anaʼe tātou ʼe ’ia faʼaha’ehaʼa anaʼe tātou ia tātou iho, e pāhono mai te Fatu i tā tātou mau pure ».
Pipi itoito
E taʼata ʼaravihi ʼe tei faʼaineinehia ʼo Ulisses Soares. ʼUa faʼaineine tāna haʼapiʼiraʼa, mai te parau tūʼite nō te faʼatereraʼa ʼohipa, ’ia ʼohipa ’ei taʼata haʼapaʼo faufaʼa ʼe ʼei hiʼopoʼa nō te mau taiete ʼohipa rarahi i Beresiria ʼUa faʼaineine taua ʼohipa ra iāna ʼia rave i te ʼohipa i roto i te tufaʼa haʼapaʼoraʼa faufaʼa a te ʼĒkālesia, tei faʼaineine iāna i te 31raʼa o tōna matahiti ʼia riro ’ei faʼatere ʼāpī roa aʼe nō te mau ʼohipa pae tino a te ʼĒkālesia. Nā taua faʼaineineraʼa i tāvini maitaʼi iāna ʼei peresideni misiōni ʼe i roto i tōna piʼiraʼa ʼei Hitu ʼAhuru huimana fa’atere i te 2 nō ʼĒperēra 2005.
Hou ʼa piʼihia ai ʼoia i roto i te peresidenira’a o te Hitu ’Ahuru i te 6 nō Tēnuare 2013, ʼua tāvini ’o Elder Soares ʼei tauturu ’e i muri iho ʼei peresideni nō te ārea nō Beresiria ʼe ʼei tauturu i roto i te ārea nō Afirita apato’a hitia o te rā. I reira tōna tāviniraʼa ʼei tauturu nō Elder Dale G. Renlund, te hōʼē Hitu ’Ahuru huimana fa’atere i taua taime ra. Tē haʼamanaʼo nei Elder Renlund, e melo i teienei nō te Pupu nō te Tino ’Ahuru ma Piti ’āpōsetolo i tō rāua tāvini-ʼāmui-raʼa.
« E pipi ʼoaʼoa, itoito, ’e te haʼapaʼo maitaʼi ʼo Elder Soares nā Iesu Mesia », tē parau nei Elder Renlund. « ʼAita vau i ʼite i te tahi atu taʼata tei ʼite mau ʼe tē rave nei ʼoia i te ʼohipa a te Fatu. Mai te mea e anihia ʼoia ʼia rave i te tahi ʼohipa, e rave ʼoia i te reira mā tōna pūai atoʼa ».
I rotopū ānei i te feiā moʼa i Peru (i te ʼaui), i Ghana (i raro), ʼaore rā i roto i te tahi atu mau fenua i reira tōna tāviniraʼa ʼe aupururaʼa, « e here ʼoiʼoi Elder Soares i te mau taʼata », tē parau ra ʼo Elder Claudio R. M. Costa.
ʼUa parau ʼoia ē « ua here ʼoiʼoi » Elder Soares i te feiā moʼa i Afirita. Te hōʼē o tāna mau ʼohipa mātāmua i roto i te ārea ’o te peresideniraʼa i te hōʼē ʼāmuiraʼa titi i Kananga, te Repupirita Manahune nō Congo. « I tōna hoʼiraʼa mai, ʼaita ʼoia i faʼaea i te parau nō niʼa i te maitaʼi ʼe te itoito o te mau taʼata tāna i fārerei », ʼua parau mai Elder Renlund.
ʼUa piʼi Elder L. Whitney Clayton, tei tāvini i pīhaʼi iho ia Elder Soares e pae matahiti ’e te ʼāfa i roto i te peresideniraʼa nō te Hitu ʼAhuru, ia Elder Soares e taʼata ʼo te faʼatupu i te tāhoʼēraʼa. « E faʼaroʼo ʼe e feruri ʼoia i tōna mau manaʼo. E mea haʼapaʼo maitaʼi ʼoia i tōna huru i roto i te mau rururaʼa ʼia hōʼē tō mātou mau reo ʼeiaha rā e tataʼuraʼa nō te feiā faʼataʼi ʼupa ».
E mea ha’ehaʼa roa ʼo Elder Soares nō niʼa i tōna ʼaravihi i te parau nā roto i te reo Potiti, te reo Peretāne, te reo Paniora, ʼe te reo Fārani. ʼUa riro rā taua hōroʼaraʼa, ʼo te tītau e ʼia haʼapaʼo-maitaʼi-hia, ʼei hōʼē haʼamaitaʼiraʼa nō te ʼĒkālesia, i te parauraʼa a Elder Clayton. E nehenehe tā Elder Soares e parau i te nahoʼa rahi melo o te ʼĒkālesia nā roto i tō rātou iho reo tumu.
« ʼUa riro Ulisses ’ei taʼata arataʼi mai tōna ʼāpīraʼa », tē parau nei Elder Claudio Costa nō tōna tao’ete tāne. « E mea māramarama roa ʼe e mea ʼaravihi roa ʼoia, ’e tē ʼite nei ʼoia i te hōpoiʼa ʼia hōroʼa noa i te mea maitaʼi roa aʼe nō roto mai iāna. E here ʼōhie noa ʼoia i te mau taʼata nā pīhaʼi iho iāna. E māfatu tōna nō te hōʼē pipi mau a te Faʼaora, ʼe e ʼiteraʼa pāpū tōna ē ʼo Iesu te Mesia. Tē here nei au iāna ʼe te māuruuru nei au i te pātururaʼa iāna ʼei hōʼē ʼāpōsetolo nā te Fatu ».
E teie tā Elder David A. Bednar i parau nā niʼa i te iʼoa o te Pupu nō te Tino ’Ahuru ma Piti ’āpōsetolo : « E pipi mā, haʼavare ʼore ʼe te hara ʼore ʼo Elder Soares nā te Faʼaora. Nā roto i te ʼanaʼana o tōna hōhoʼa mata, tōna ʼataʼata mahanahana, ʼe tōna huru maitaʼi, e rave rahi mau taʼata ʼe mau ʼutuāfare tei faʼauruhia, ʼe ’o tei faʼauruhia ma te hōʼē hinaʼaro rahi aʼe ʼia peʼe i te Faʼaora ʼe ʼia ora i te mau haʼapiʼiraʼa a tāna ʼevanelia ».
E hōhoʼa ʼe tāna vahine faʼaipoipo, Rosana, i mua i te hiero nō Roto Miti nā Kristin Murphy, Deseret News
I roto i tō tātou tau tuʼuraʼa ʼevanelia, ʼua parau te Fatu nō Edward Partridge, « ʼua mā tōna ʼāʼau i mua iāʼu nei, nō te mea e au ʼoia mai ia Natanaela i tahito ra, ʼo te ʼore roa e haʼavare i roto iāna ra »5 Nō Hairamu Semita, ʼua parau te Fatu, « ʼua here au, o te Fatu, iāna nō te tiʼa-mau-raʼa nō tōna ʼāʼau, ʼe nō te mea ʼua here ʼoia i tei tiʼa i mua iāʼu nei ».6
E parau atoʼa te Fatu i te reira nō Ulisses Soares.