Mau huero moa, mau mute uira, ʼe te faʼaroʼo

Alvaro Alcaino

Antofagasta, Chili

Te hōʼē o tā mātou fā ʼei ʼutuāfare ʼo te haʼaputuraʼa ïa i te moni ʼia navaʼi nō te ʼaufauraʼa mātāmua nō tō mātou iho fare. ’Āhiri ē ’aita taua fā ra, e haʼamauʼa ïa vau i tōʼu mau hopeʼa hepetoma i te mātaʼitaʼiraʼa i te ʼāfata teata, ma te tīaʼiraʼa ʼia tae mai te tahi mau rāveʼa ʼimiraʼa faufaʼa iāʼu nei.

ʼEi taʼata faʼahoro pere’oʼo uira nō te hōʼē taiete mīnera i te pae apatoʼerau nō Chili, e rave au te ʼohipa e maha mahana i te mau ʼāpoʼo mīnera ’e i muri iho e toru mahana faʼafaʼaearaʼa—mai te mahana māʼa e tae atu i te monirē. Nō te tauturu i tā mātou faufa’a moni ʼe te moni faʼaherehere nō te hōʼē fare, ʼua faʼaoti mātou e haʼamata i te hoʼo haere i te mau huero moa. Tā mātou ʼōpuaraʼa o te ravera’a mai i te mau poro’i a te mau hoa, te mau taʼata tupu, ʼe te mau melo nō te ʼĒkālesia ; e hoʼo mai fātata e 1 000 huero moa i te mau hepetoma atoʼa i pīha’i iho i te hōʼē hoʼo taoʼa ; ʼe e ’ohi ʼe e ʼōpere haere i te mau huero moa i te mau mahana māʼa ʼe te mau monirē.

ʼUa faʼaoti māua tāʼu vahine faʼaipoipo ʼo Laura e ʼāfaʼi māua i tā māua e piti tamariʼi nā muri iho ia māua nō te mau ʼōpereraʼa ʼe ’ia ʼoaʼoa ʼāmui i taua taime ra. ’A tere ai mātou nō te hoʼo mai i tā mātou ’āfata huero moa mātāmua, ʼua tupu mai te fifi. ʼUa haʼuti te hōʼē o tā māua tamariʼi i te hōʼē faʼaʼoi peni tara ʼāuri naʼinaʼi, ʼe ʼua tāʼue i te faʼaʼoi ʼe ʼua topa tiʼa atu te reira i roto i te vairaʼa tūʼamaraʼa ʼavaʼava tei vai matara noa. ʼUa pura mai te auahi, ʼe ʼua ʼere tō mātou pereʼoʼo uta i te pūai uira, ʼe ʼua pohe tāʼue noa i te ropura’a o te hōʼē porōmu rahi. ʼUa paʼapaʼa te hōʼē mute uira [fusible].

’A vai ai mātou i reira ma te ha’afifi i te tereraʼa pereʼoʼo ’e ma te ui e aha te rave i muri iho, ʼua hepohepo roa māua ʼe e au ra ʼua hinaʼaro māua e taʼi. I taua taime rā, ʼua haʼamanaʼo vau ē ʼua fafau mai te Fatu e faʼaitoito ʼe e tauturu ’oia ia tātou mai te mea e tiʼaturi tātou iāna. ʼUa tae mai te hōʼē manaʼo hau i niʼa iho iāʼu. ’Ua ʼite a’era vau eʼita vau e pārahi noa i reira ’a amuamu noa ai. E fifi tō mātou, ʼe nā roto i te tauturu a te Atua, e matara mātou i te reira fifi.

ʼUa fāriu atu māua Laura i te tahi ʼe te tahi ʼe ʼua parau, « e tiʼa ia tāua ʼia faʼaʼite i tō tāua faʼaroʼo ». ʼUa pure māua ʼe ʼua tāmarō i tō māua roimata. I muri iho, ʼo Laura i niʼa i te faʼahororaʼa, ʼua pou atu vau i rāpae nō te turaʼi i te pereʼoʼo. E rave rahi mau taʼata tei ouʼa i rāpae’au i tō rātou mau pereʼoʼo ʼe ʼua tauturu iāʼu.

ʼUa tūraʼi mātou i te pereʼoʼo fātata e 200 metera i te ātea hou ʼa ʼitehia ai te hōʼē vāhi pāpū i rāpae’au i te porōmu rahi nō te tāpeʼa. ’A tere ai te pereʼoʼo i te vāhi tāpeʼaraʼa, ʼua ʼite aʼera vau ē ʼua tāpae mātou i mua noa mai i te hōʼē fare toa hoʼoraʼa ’āfata ratio nō te pereʼoʼo.

ʼUa ’iteahia mai iāʼu te mute uira tei paʼapaʼa, ʼua tomo atu vau i roto i te fare toa, ʼe ʼua ani : « Tē vai ra ānei tā ʼoutou hōʼē o teie mau mea ? »

ʼUa pāhono mai ra te taʼata hoʼo, « ʼoia mau ».

ʼUa hoʼo mai au i te hōʼē mute uira ʼe ’ua tuʼu atu ra i te vāhi nō te reira, ʼua tere faʼahou te pereʼoʼo ʼe ʼua reva atu mātou. Te fātata ra te taʼata hoʼo huero moa i te tāpiri i te fare hoʼoraʼa ’a tae atu ai mātou. ʼUa hoʼo mai mātou i tā mātou mau huero moa ʼe ʼua rave i tā mātou mau ʼōpereraʼa.

’Ia faʼaruru anaʼe tātou i te mau fifi, e tiʼa ia tātou ʼia haʼamanaʼo i te ani i tō tātou Metua i te Ao ra nō te tauturu. ʼUa ʼite au ē e pāhono mai ʼoia ia tātou ’a haere ai tātou i mua ʼe ’a faʼaʼite ai i tō tātou faʼaroʼo iāna.