ʼUa hau ānei te hōʼē ʼiteraʼa pāpū i te mau manaʼo noa ?

Te hōʼē ʼiteraʼa pāpū ʼo te mea ïa tā te Faʼaora e parau ra ’a parau ai ʼoia ia Petero, « e ʼere tā te taʼata i faʼaʼite mai ia ʼoe i te reira, nā tāʼu Metua rā i te ao ra » (Mataio 16:17). ’O te ʼiteraʼa nō ’ō mai i te Atua tei heheuhia mai nā roto i te Vārua Maitaʼi.

E paraparau mai te Vārua Maitaʼi nā roto i te hōʼē reo ʼo tā tātou e ʼite hau atu i te faʼaroʼo, ʼo tē haere mai « i roto i tō ʼoe feruriraʼa ʼe i roto i tō ʼoe ʼāʼau » (PH&PF 8:2 ; ʼāpitihia atu te haʼapāpūraʼa)—tō tātou mau ʼite ʼe tō tātou atoʼa mau manaʼo.

ʼUa faʼata’a mai te peropheta Iosepha Semita i te vārua nō te heheuraʼa mai te hōʼē ïa manaʼo nō « te māramarama ateate, [ʼo te hōroʼa mai ] ia ʼoutou te mau manaʼo tāʼue » (Te mau Haʼapiʼiraʼa ’a te Mau Peresideni ʼo te ʼĒkālesia : Iosepha Semita [2007], 132).

ʼIa fāriu anaʼe tātou i tō tātou feruriraʼa ʼe tō tātou ʼāʼau—tō tātou mau feruriraʼa, mau manaʼo, ʼe mau hinaʼaro—i te Atua ra, e henehenehe iāna ’ia paraparau mai i tō tātou feruriraʼa ʼe i tō tātou ʼāʼau ma te reo iti haʼihaʼi o te Vārua Maitaʼi. ʼA faʼaʼohipa ai ʼoia i tō tātou mau vārua, e au ra e tahe mai te tahi mau ʼiteraʼa ʼe mau manaʼo i roto ia tātou nei. Teie te ʼiteraʼa pāpū tāna e hōroʼa mai ia tātou.