Mau hōho’a nō te fa’aro’o
Michael Isaac
Bydgoszcz, Polane
« E nehenehe te maʼi e faʼatupu mai e rave rahi mau mea maitaʼi », tē parau ra ʼo Michael, tei roʼohia i te maʼi māpē. Nō te mea ’ua fa’arahi tōna ma’i i tōna māuruuru nō te ’evanelia, ’ua parau ’oia, « e tāmatara’a maita’i te reira ».
Leslie Nilsson, taʼata pata hōhoʼa
ʼUa fānauhia vau i Etiopia i te matahiti 1942 ʼe ʼua haere atu vau i te ha’api’ira’a i Polane i te matahiti 1965. I te matahiti 1991, ʼua fārerei au i te mau misiōnare ʼe ʼua tomo atu vau i roto i te ʼĒkālesia. ʼUa tāvini au ʼei peresideni ʼāmaʼa e toru matahiti ʼe te ’āfa. ʼUa tāvini au ʼei tauturu i roto i te peresideniraʼa misiōni e 12 matahiti te maoro. ʼUa riro fa’ahou vau ʼei peresideni ʼāmaʼa ʼe ʼei peresideni mataʼeinaʼa i muri iho. I muri iho, ʼua roʼohia vau i te maʼi māpē.
I teienei e nehenehe noa vau e rave i te tahi noa mau mea i roto i te ʼĒkālesia. E tāmata vau i te haere i te mau purera’a i te mau sābati.
ʼUa riri au i te haʼamataraʼa.
« Nō te aha vau? » ’Ua pure au. « ʼUa tāvini au ia ʼoe, e te Fatu ». Tau taime i muri mai, ʼua taʼa iāʼu. Tē parau nei te mau pāpaʼiraʼa mʼoa, « e tupu ā ho‘i teie i te taʼata e faʼaroʼo tōna iā‘u nei ʼia faʼaorahia ʼoia, ʼe ʼaore ʼoia i faʼataʼahia nō tē pohe ra, e faʼaorahia ïa ʼoia » (PH&PF 42:48).
Tē parau nei teie ʼīrava ē e faʼaorahia tātou mai te mea ʼaita tātou i faʼataʼahia nō te pohe.
Tē tāmau noa nei te mau melo o te ʼĒkālesia i te pure nōʼu, tera rā te ’ino noa atu rā ā tōʼu ea. Tē manaʼo nei rātou ē ʼaita tā rātou mau pure i faʼaroʼohia, ʼua faʼaroʼohia rā te reira nō te mea ʼua riro mai rātou ʼei mau taʼata maitaʼi aʼe ’e nō te mea tē ʼite nei au i te here tā rātou e faʼaʼite mai nei iāʼu.
Noa atu e mea maitaʼi tōʼu ea, e hea ā ïa taime e toe nei i tōʼu fāito matahiti ? E rave rahi ā taime tei mua iāʼu.
Mea au nāʼu ’ia haere i roto i te mau pāpaʼiraʼa moʼa ʼe ʼia ʼimi i te mau ʼaito ʼo te tauturu mai iāʼu. I te tau ’a maitaʼi ai tōʼu ea ʼe tē tāvini ra vau, mea au nāʼu e peʼe ia Nephi, i teienei rā e rave rahi taime e haʼamanaʼo vau ia Ioba. E taʼata maitaʼi ʼoia, ʼe ʼua māuiui atoʼa ʼoia. Tē vai noa ra te tiʼaturiraʼa i roto i te ’evanelia.
I roto i te hōʼē ʼoire mai ia Bydgoszcz, mai te mea e hinaʼaro vau e fārerei i te tāvana, e’ita te reira e tupu nō te mea e mea haʼihaʼi roa vau nō te reira. Nā roto rā i te ’evanelia, e matara noa te ʼūputa nō te piʼi i te Atua. Nō reira vau i here ai i tāʼu ʼēkālesia.
Tei iāʼu ra te ʼĒkālesia. Tē vai nei tāʼu rāveʼa nō te paraparau atu i te Atua nā roto i te pure, nā roto i te haʼapaeraʼa māʼa, nā roto i te mau mea atoʼa tā tātou e rave nei. E aha atu ā te mea tāʼu e hinaʼaro ?
I te tahi taime e parau vau iāʼu iho, « penei aʼe nō reira paha vau i roʼohia ai i te maʼi—’ia nehenehe iāʼu ʼia māramarama e tei roto vau i te hōʼē mea faʼahiahia, e auē ïa ʼohipa faʼahiahia teie ».
Tē ’ite nei au i te ’oto o tāʼu vahine faʼaipoipo, ʼo Renata, nō te mea ʼua maʼihia vau. ʼAita ho’i au e au ’ia tupu te reira, tera rā e hotu te ’oto nō te here. ʼAhani ʼaita ʼoia i here, eʼita ïa ʼoia e ʼoto. E tauturu te here ia ʼoutou ’ia ʼite e ʼaita ʼoutou e faʼaea ra ’o ʼoutou anaʼe, tē vai nei te mau taʼata ʼo te tāu’a nei ia ʼoutou.
E mea faufaʼa ’ore te pohe. E pohe pāʼātoʼa te mau taʼata. Tei te huru rā o tō tātou hiʼoraʼa i te pohe. ’Ua ’ite au e, tē ora nei te Atua. Tē here nei ʼoia ia tātou pāʼātoʼa—o vau atoʼa. Tera ïa te mea tāʼu e nehenehe e parau.
ʼUa riro te maʼi o Michael ʼei tāmataraʼa fifi mau nō tāna vahine faʼaipoipo, ʼo Renata. « Tē ʼite nei au i te ’oto o tāʼu vahine faʼaipoipo, ʼo Renata, nō te mea ʼua maʼihia vau », tē parau ra ʼoia. « E hotu rā te ’oto nō te here. E tauturu te here ia ʼoutou ’ia ʼite e ʼaita ʼoutou e faʼaea ra o ʼoutou anaʼe, tē vai nei te mau taʼata ʼo te tāu’a nei ia ʼoutou ».
Noa atu te tāʼotiʼaraʼa tei faʼatupuhia mai e tōna maʼi, e tāmau noa Michael i te ʼimi i te mau rāveʼa nō te tāvini ʼe nō te faʼaitoito i te mau taʼata nā pīha’i iho iāna.
ʼUa ʼite mai ’o Michael i te tiʼaturiraʼa ʼe te arataʼiraʼa i roto i te mau pāpa‘iraa mo‘a. I te mau tau i maitaʼi ai tōna ea ʼe ʼa tāvini ai ʼoia, ʼua faʼahiahia ʼoia ia Nephi. ʼUa parau ʼoia, « i teie nei rā e rave rahi taime e haʼamanaʼo vau ia Ioba ». « E taʼata maitaʼi ʼoia, ʼe ʼua māuiui atoʼa ʼoia ».