Mga importanting panghitabo sa Ika-188 nga Semiannual nga Kinatibuk-ang Komperensya

Sa makausa pa, dagko nga mga kausaban ang gipahibalo sa kinatibuk-ang komperensya. Samtang ang mga pahibalo lahi niining higayuna, ang mga katuyoan luyo niini nagpabilin nga mao ra gihapon: Ang propeta sa Dios mibati sa kadinalian sa pag-andam kanato alang sa Ikaduhang Pag-anhi sa Ginoo ug nagdapit kanato sa paglig-on sa atong pagtuo sa Langitnong Amahan ug sa Iyang Anak, si Jesukristo.

Ania ang pipila lang ka importanting mga pagdapit ug mga saad nga gihatagan og gibug-aton ni Presidente Russell M. Nelson panahon sa komperensya.

Himoon ang Panimalay nga Mas Balaan

Sa iyang pangbukas nga pakigpulong, si Presidente Nelson miduso sa panginahanglan sa paghimo og mga kausaban sa atong kinabuhi nga mohimo sa atong mga panimalay nga sentro sa pagkat-on sa ebanghelyo. “Panahon na alang sa nakasentro sa panimalay nga Simbahan, gisuportahan sa unsa ang gipangbuhat sulod sa atong branch, ward, ug stake nga mga gambalay [building].”

• Basaha ang gisugyot nga mga kausaban diha sa panimalay ug ang mga kausaban sa simbahan nga nagsuporta niini (tan-awa sa pahina 8).

• Pangita og dugang nga impormasyon diha sa “Ang mga Kausaban Makatabang sa Pagbalanse sa Instruksyon sa Ebanghelyo diha sa Panimalay ug sa Simbahan” (pahina 117).

“Pagbiya sa Kalibutanong mga Butang”

Gidapit ni Presidente Nelson ang mga sister sa kinatibuk-ang sesyon sa mga babaye sa pag-apil sa “labing dakong kawsa … sa yuta karon.” Misaad siya, “Kon magkahiusa mabuhat nato ang tanang gikinahanglang ipabuhat sa atong Langitnong Amahan aron sa pag-andam sa kalibutan alang sa Ikaduhang Pag-anhi [ni Jesukristo].”

• Basaha ang upat ka pagdapit ni Presidente Nelson ngadto sa mga sister (tan-awa sa pahina 68).

“Pagpahiuli sa Saktong Ngalan sa Simbahan sa Ginoo”

Si Presidente Nelson mitawag sa mga miyembro sa pagtawag sa Simbahan sa Manluluwas pinaagi sa ngalan nga gihatag sa Manluluwas niini. “Mosaad ko kaninyo nga kon kita mobuhat sa atong labing maayo sa pagpahiuli sa saktong ngalan sa Simbahan sa Ginoo, Siya kansang Simbahan mao kini mobu-bu sa Iyang gahum ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”

• Basaha ang instruksyon ni Presidente Nelson mahitungod sa ngalan sa Simbahan (tan-awa sa pahina 87).

“Moadto sa Iyang Balaan nga Balay”

Gitapos ni Presidente Nelson ang komperensya uban sa pagpahibalo sa 12 ka bag-ong templo ug usa ka pagdapit nga “regular nga … moadto sa Iyang balaan nga balay.” Miingon siya, “Ako mosaad kaninyo nga ang Ginoo mohatag og mga milagro nga Siya nasayud nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”

• Tan-awa kon asa ipahimutang ang gipahibalo nga mga templo (tan-awa sa mga pahina 113, 116).