Mga Miting sa Ikaupat nga Dominggo (Oktubre–Disyembre 2018)

Personal ug Tibuok Pamilya nga Pagtuon sa Kasulatan

Sa ikaupat nga mga Dominggo sa 2018, ang mga elders quorum ug mga Relief Society maghisgot sa personal ug tibuok pamilya nga pagtuon sa kasulatan. Ang mga lider ug mga magtutudlo mahimong mopili sa paggiya sa mga diskusyon mahitungod sa bisan asa sa mosunod nga mga baruganan.

Personal nga Pagtuon sa Kasulatan

Aron makatabang sa pagdasig sa mga miyembro nga kanunay nga magtuon sa kasulatan, ikonsiderar ang pagdapit sa matag miyembro nga mopili og usa sa mosunod nga mga tudling aron basahon: Josue 1:8; 2 Timoteo 3:15–17; 1 Nephi 15:23–25; 2 Nephi 32: 3; Doktrina ug mga Pakigsaad 11:22–23; 33:16–18. Human sila makagahin og panahon sa pagbasa ug pagpamalandong, mahimo nilang ipaambit ngadto sa laing tawo sa kwarto kon unsay gitudlo sa ilang tudling kanila mahitungod sa pagtuon sa kasulatan.

Mahimo usab nimong dapiton ang mga miyembro sa pagpaambit sa ilang mga pagpamatuod sa mga panalangin nga ilang nadawat samtang nagtuon sila sa mga kasulatan. Ang mga miyembro mahimo usab nga makabenepisyo sa pagpaminaw sa usag usa nga mopaambit sa unsay ilang gibuhat aron mahimong makahuluganon ang personal nga pagtuon sa kasulatan (tan-awa ang pipila ka mga ehemplo sa “Mga Ideya sa Pagpalambo sa Imong Personal nga Pagtuon sa Kasulatan” diha sa Dali, Sunod Kanako—Alang sa mga Indibidwal ug mga Pamilya). Mahimo usab nimong ipaambit sa mga miyembro ang gitudlo ni Elder Quentin L. Cook mahitungod sa “mga katuyoan ug mga panalangin nga may kalabutan sa [kausaban sa iskedyul sa Dominggo] ug sa ubang bag-ong mga kausaban” (tan-awa sa “Lig-on ug Malungtarong Pagkakabig ngadto sa Langitnong Amahan ug ni Ginoong Jesukristo,” Liahona, Nob. 2018). Ang mga miyembro mahimong maghisgot kon sa unsang paagi ang atong mga paningkamot sa pagpalambo sa atong pagtuon sa kasulatan makatabang sa pagkab-ut niini nga mga katuyoan.

Pagkamakanunayon sa Pagtuon sa Ebanghelyo

Gitandi ni Elder David A. Bednar ang makanunayon nga pagtuon sa kasulatan sa tibuok pamilya ug ang ubang matarung nga mga binuhatan ngadto sa gagmay nga mga agi sa brutsa nga nagporma sa matahum nga painting. Aron matabangan ang mga miyembro nga makasabut sa gitudlo ni Elder Bednar, tingali mahimo ka nga mopakita og usa ka painting diin tataw ang mga agi sa brutsa sa pintor. Ang mga miyembro mahimo dayong mobasa sa analohiya ni Elder Bednar, nga makita sa “Labaw nga Makugihon ug Mabuhaton diha sa Panimalay” (Liahona, Nob. 2009, 19–20), ug maghisgot kon sa unsang paagi ang mga agi sa brutsa niini nga painting susama sa pagtuon sa kasulatan. Unsay nakatabang kanato sa pagbuntog sa mga babag sa makanunayon nga pagtuon sa ebanghelyo, kon nagtuon man kita nga tinagsa o uban sa atong mga pamilya? Unsa ang gisaad ni Presidente Russell M. Nelson ngadto niadtong “makugihon nga molihok aron sa pagbag-o sa [ilang mga panimalay] ngadto sa usa ka sentro sa pagkat-on sa ebanghelyo”? (tan-awa sa “Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018). Hatagi og panahon ang mga miyembro nga mamalandong ug mopaambit sa unsay nadasig sila nga buhaton tungod sa ilang nakat-unan karon.

Mga Diskusyon sa Ebanghelyo diha sa Panimalay ug sa Simbahan

Usa ka paagi sa pagtabang sa mga miyembro nga makasabut sa kaimportante sa mga diskusyon sa ebanghelyo diha sa panimalay ug sa simbahan mao ang pagdapit sa usa ka bata ug usa ka ginikanan sa pagkanta sa “Tudloi ko Paglakaw sa Kahayag” (Songbook sa mga Bata, nu. 70). Unsa ang gitudlo kanato sa inter-aksyon tali sa bata ug sa ginikanan diha sa mga pulong niini nga awit mahitungod sa pagkat-on sa ebanghelyo? Tingali adunay pipila ka mga miyembro nga andam nga mopaambit sa ilang mga hunahuna kon unsaon sa paghimo sa mga diskusyon sa ebanghelyo nga natural ug kanunay nga parte sa kinabuhi sa pamilya. Ang mosunod nga mga kasulatan makahatag og mga ideya: Deuteronomio 11:18–20; 1 Pedro 3:15; Mosiah 18:9; Moroni 6:4–5, 9; Doktrina ug mga Pakigsaad 88:122. Sa unsang paagi ang atong mga diskusyon diha sa panimalay ug sa simbahan makapaduol nato ngadto sa Langitnong Amahan ug ni Jesukristo?

Mga Ideya sa Pagsuporta sa Pagtuon sa Kasulatan diha sa Panimalay sa 2019

Sa 2019, ang tanang mga miyembro sa ward magtuon sa Bag-ong Tugon—sa panimalay ug sa Sunday School ug Primary. Sa mga miting sa korum ug Relief Society, ang mga lider ug mga magtutudlo kinahanglang mopahinumdom sa mga miyembro mahitungod sa mga kasulatan nga naka-iskedyul alang sa umaabut nga semana diha sa Dali, Sunod Kanako—Alang sa mga Indibidwal ug mga Pamilya nga ilang matun-an sa panimalay. Kining yano nga pahinumdom mahimong ipaambit pinaagi sa pagsulat, sa pagsulti, o gamit ang duha.

Ang mga lider ug mga magtutudlo sa elders quorum ug Relief Society makaawhag niini nga pagtuon sa kasulatan pinaagi sa pagpangita og mga oportunidad sa pagdala og mga panabut sa Bag-ong Tugon diha sa mga miting sa elders quorum ug Relief Society. Sama pananglit, ang mga lider ug mga magtutudlo sa elders quorum ug Relief Society mahimong:

Mga Ideya sa Pagsuporta sa Pagtuon sa Kasulatan diha sa Panimalay sa 2019

• Motimaan kon sa unsang paagi ang mga istorya o doktrina gikan sa ilang pagtuon sa kasulatan magamit diha sa leksyon sa elders quorum o Relief Society. Ang mga lider ug mga magtutudlo mahimong mopaambit niini nga panabut sa usa ka miting sa Dominggo.

• Mopaambit sa mga miyembro kon sa unsang paagi ang mga istorya o doktrina gikan sa Bag-ong Tugon magamit diha sa ilang mga responsibilidad sa elders quorum o Relief Society.

• Mopaambit sa mga miyembro og positibo nga mga kasinatian nga aduna sila kalabut sa pagtuon sa Bag-ong Tugon diha sa panimalay ug moawhag sa mga miyembro sa pagpaambit usab niini nga mga kasinatian.