Ti Waare: Kairake n Ikawai
Kakaean te Kimwareirei Rinanon Kristo n Aki Tabe Ma Moantaain Okiu n Au Mition
Ngke I moantaai n oki man au mition, I taku bwa N nang aki manga karekea te kimwareirei. Ma I karekea. Ao ko kona naba ngkoe.
E maeka te tia korokaraki i Utah, USA.
Te nakon te mition e matoatoa. E ngae n anne, te oki nakon mweengam man am mition e bon matoatoa naba, riki ngkana ko okira mweengam ni moantaai nakon are e a tia ni baireaki. Ko raraoma n te bwai ae a na taekinna tabeman ke tera ae a na karaoia ibukim. A na kona ni motika taekam? N aki kukurei? A na ribaiko? Ko raraoma bwa ko na namakinna ae kanga ko aki raoiroi ke n aki tau korakoram. Ko mimi ngkana e na iai te bwai ae bure iroum ke ngkana ko karaoa te iango ae bure n nako ni mitinare. I raraoma ni bwaai aikai ni kabane.
Ngke I iangoia bwa N na nako ni mitinare, e bon korakora nanou nako iai. I ataia bwa bon te bwai ae tangiria te Uea bwa N na karaoia. Tabeua namwakaina ake imwiina bon tabeua kabanean kukurein maiu, ao imwiin karekean te taneiai ae tamaroa n te tabo ni kataneiai ibukiia mitinare, I taku n au iango bwa nikiran au mition i Argentina e na nakoraoi naba. Ma e bon aki.
I rootaki n te raraoma, te maaku, ao te bwarannano n au mition—bwaai aika I tuai kaitara ma ngaai n taai aika nako, ke n aki rangi ni kaangaanga n aron are I a tia n rinanona. Au beretitenti n au mition e kataia ni kakaea angan buokau. Ma n tokina, I baireia bwa N nang okira mweengau. E bebete karaoan te babaire anne n te tai anne, ma ngke I a okira mweengau, I moanna ni karekei titiraki ni kabane ake I taekin mai imwaina.
I reiakinna bwa inanon te tai ae teimatoa, te Tia Kamaiu e uota te kamaiu ao te taratara ngkana ko ukoukori ni kauoua ma te tangira. I kakoaua raoi bwa iai te reirei ae e na reiakinaki n ara taneiai ni maiura ni kabane, a kona n raoiroi ke ni buakaka. Ao n ana tai te Uea, E reireinai tabeua reirei aika a rangi ni bongana aika a riki bwa bwaai aika a kakawaki irou ngkai.
Te nako ni mitinare bon te bwai ae eti ibukiu. Ma tera bukina, I aki kaantaningaaki bwa N na tiku ibukin 18 te namwakaina. Iai ana babaire teuana ibukiu. I teimatoa n aki ataia raoi bwa e na kanga aron maiu, ma akea au kaangaanga ma anne. Tera ae I ataia e kangai bwa N na karaoa te bwai ae E tangiria bwa N na karaoia ngkai. N au ka aua n namwakaina i Argentina, au koaua ao rairakiu e a korakora riki. I kaitibo ma aomata aika aki kakoauaaki, ao I a tia ni buokiia aomata aika e kainnanoai te Uea bwa N na buokiia. I aki manga uringaaba n te bwai ae I a tia n rinanona ke n iangoia bwa e na tia ni kaokoro. Boni ngaia raoi ae I kantaningaia ao n tia n riki bwa te bwai ae tabu nakoiu.
E aki maan ao I wareka ana taetae Unimwaane Neal A. Maxwell (1926–2004) man te Kooram n Abotoro n te Tengaun ma Uoman are e buokai ni kaotaai n te bwai are I rinanona. E taku:
“Maiun temanna . . . e aki kona ni kauataboaki n te onimaki ae onrake ao te karawawataki ae e itiaki. . . .
“Ngaia are, ko na kanga ngkoe ao ngai ni kantaningaia bwa ko na rinanon te maiu aio ma te aki oota, ma ni kangai, ‘Te Uea, anganai te atatai, ma tiaki te rawawata, tiaki te nanokawaki, tiaki te maraki, tiaki te kakaitara, tiaki te kairiribai, ao ni koauana I aki tangiria ni mwanuokinaki. Kararoai mai irou, te Uea, atatai ni kabane ake e karikiko bwa antai Ngkoe! Ngkanne kariaia bwa N na Nakoina ni maeka ma Ngaia ao n tibwauai Kimwareireina!’” (“Lest Ye Be Wearied and Faint in Your Minds,” Ensign, Meei 1991, 88).
E aki riki raoi te Tia Kamaiu n arona ae antai Ngaia n aki tabe ma kataaki aika E rinanoi. E riki bwa antai Ngaia ibukin kataaki aikanne. A buokia ni kanakoraoa Kateina aika kororaoi, ao a Anganna te konabwai n namakina te kimwareirei ae E namakinna ngkai. I namakina te kakabwaia n tia ni karekea te taneiai n te katei ae barongaaki raoi. Tiaki te bwai ae I titiraki ibukina; bon tiaki te bwai ae I tangiria; ma te Atua e atai au konabwai, ao E tangirai bwa N na tibwaua Kimwareireina. Te kimwareirei anne bon te bwai ae I aki kona n ataia n aki ata naba te rawawata, te nanokawaki, te maraki, ao te kakaitara. Te oki nakon te mweenga ni moantaai bon teuana mai ibuakon te bwai ae I a tia n rinanona, ma n ana mwamwannano ao ana ibuobuoki te Tia Kamaiu, e taraa n ae ti tebo ma te bwai ae uarereke boona ae ko na kabwaka ibukin te bwai ae I karekea.
Ngaia ae karekea te onimaki. Onimakina am Uea. Ao bwaina te onimaki! E aki kona te maiu n nakoraoi n aron are ko baireia. E na akea te maraki ke akea te rawawata. Ma te kimwareirei e tataningaiko imwiin taai aika kangaanga. Te kimwareirei bon te bwai ae E tangiria n tainako ibukim.