Te Reta mai Iroun te Tari ae Tatangira
E maeka te tia korokaraki i Utah, USA.
E aki oa au ka 16 ni koronririki tariu ae e ikawai ibukina bwa e nako ni mitinare. Ma e ngae n anne taeka n reirei ake e kanakoi nakoiu bon te bwai n tangira ae I kawakina n aki toki.
Tebwi ma onoua ana nririki! Bon te tai ae kakukurei ni maiu! “Ko na bon aki riai n rinanon te bwai aei n akea te boutoka,” I iango.
Au karo aika a wanawana a rangi n akoi ao a aki toki n anganai taian reirei aika a raraoi. Mwaneu are te ikawai e a tibwa tia ni mare ao e a maing nako nakon te kawa teuana. Tariu are e uarereke e bon ti tabe ma ana iango ngkai ai tibwa 11 ana ririki. Iai raoraou aika a kakateke, ao I ataia ae au tia kairiiri n te Ekaretia a rangi n tabe ibukiu.
Ma tariu are te karimoa, Gary, bon ngaia ae I rangi n onimakinna. I aki toki ni kakatotonga ni bwaai ni kabane ngke I kairake. “Ngkana I kakaraki ma ngaia, a bane n ota bwaai irouna,” I taku nakoiu. “Au kaantaninga bwa e na mena ikai n te tai aei.”
Ma e aki kona, E rangi n raroanako bwa e mena i Tiaban, ni beku bwa te mitinare ae bwanin ana tai.
Ma e ngae ngke akea Gary, e bon boo au koronririki ae rangi ni kakukurei. Tinau e karaoa kanau n te moaningabong n aron are ti bon tataneiai iai n tain te koronririki, ao I karekei tabeua bwai n tangira imwain nakou nakon n te reirei. N te tairiki anne, ngai ao au utu tia nako bwa tina katairi n te pizza ao ni kabaneana ma te keeke n rekenibong. E bon reke naba irou ae I a iango ni mii bwa I a marooro ma raou te aine, ni kabuta te ka, ao tabeua riki ake I a kona ni karaoi ngkai ai 16 au ririki.
Ma, te moan bwai ni kakawaki ni bwai n tangira ae I karekea n te bong anne bon te reta ae e roko n te meeri. E aki mwaninga Gary au ka16 ni koronririki Te taneiai aei e riki imwain ae e kabonganaaki te imeri, ngaia are e rangi ni maan rokon te reta ae e mwananga mai Tiaban nako Cache Valley, Utah, USA. I bon kubanako bwa e roko raoi te reta aei n te bong are bongin au koronririki! E koreaki n te bai kanoan te reta, are e a karikia bwa kanga e bon mena tariu irarikiu ngke I warekia:
“Nakon Merilee:
“Eng, te roko n te ririki ae 16 bon te roro are e a rikirake iai te inaomata ao waaki ni kakukurei. I taku bwa ngkana e reke te reta aei iroum ao tao e a bon tia ni boo. I aki kakoaua—ae ai 16 am ririki ni maiu. E tara n ae ai tibwa tabeua te ririki n nako ngke ko kakabongana [bwaram ni cowboy ae e uarereke ni uraura].
“Tiku n akoi aon itiaki, ao kaotia nakoia aomata bwa e rangi ni bongana te Ekaretia iroum. Ngkana ko karaoa anne, ko na bon aki kona n rinanon te tai are ko na karaoa iai am babaire ngkana e korakora te kariiri mai irouia raoraom. Te katooto: N te reirei n te kauarinan, e bane n ataaki ae I aki tangiria ni kan moi manging ke ni moko, I bon aki, ngaia are I bon aki kona ni kaoaki nakon te aekaki ni bootaki ni kakukurei ae a karaoaki baikane iai. A ataia raraou ae I aki moko ke ni mooi manging. …
“Ngkana ko kaotia nakoia aomata banan maium, ngkane aomata ake ti tebo maiuia ma ngkoe ana tangiria n nakoim. I aki nanonna ae ko na tuangiia aomata ni kabane, ma am mwakuri e na kaota am onimaki. E rangi ni kakateke anuan tamneim, ao e bon kaineti ma aram. Ao iai iroum te nano ni kan kukurei. Tekeraoi ‘te ka 16’ ni koronririki!” Te kabanea n taeka e rainiaki n te ingke ae e uraura. Bon aei te bwai n tangira ae e rangi n tamaroa riki! I aki toki ni wawarekia ni katoa tai, ni karokoa e oki mai Tiaban ao e a reke ara tai ni marooro n itaramata.
E a bon mwaiti te ririki n nako mai imwiin te tai are I karekea te reta anne, ma ae bon iai irou ngkai. A mwaiti bwaai aika a bitaki mai imwiin te tai arei, ma e bon aki bitaki au tangira ibukin tariu. N te bong aei I boutokaia tiaki ngkai bon tariu ao raoraou, ma ngkai ai Unimwaane Gary E. Stevenson man te Kooram n Abotoro n te Tengaun ma Uoman. Te reirei are e anga ngkai te tia kakoaua ae e onoti ibukin Kristo nakon te aonaaba e bon kakorakoraai, n ai aron te reta are e kanakoa nakoiu n tain au ka 16 n rekenibong.