Te Kabanea n Taeka
Tera ae Ko Na Kunea Inanon Ana Boki Moomon?
Iroun Unimwaane Gary E. Stevenson
Man te Kooram n Abotoro n te Tengaun ma Uoman
Man te marooro n te maungatabu ni kabuta n Okitobwa 2016.
Ngkai e reke am tai ao te tabo ae rau ibukin warekan Ana Boki Moomon, I noriko ni karekei kaeka, namakina te kairaki, ao ni karekea oin am koaua n Ana Boki Moomon ao te koaua iroun Iesu Kristo.
N am tai ni wareware, ko na wareware rinanon mwakoron te boki ae kakaawaki aei ao ni kaitibo ma am Tia Kamaiu ae tangiraki, te Uea Iesu Kristo, iaon angiin baana. E katautauaki bwa tabeua tein Arana e kabonganaaki ni katoa 1.7 kiibu.1 N aron naba Kristo e taekin koauaia ni boong aika kaitira, n taku, “Ao n aron ae e maiu am Uea ao Atuam e boni koaua.” (Reirei ao Berita aika Tabu 17:6).
I kakaitau ibukin te kakao ao te berita are e a tia te Uea n anga rinanon te burabeti Moronaai nakoimi n tatabemani ngkami—ao naake a wareka Ana Boki Moomon: “Ao ngkana a reke bwaai aikai iroumi [Ana Boki Moomon], n na kaungai nanomi bwa kam na butiia te Atua, te Tama ae akea Tokina, n aran [Iesu] Kristo, ngkana arona bwa a koaua bwa kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi ni mwaakan te Tamnei ae Raoiroi” (Moronaai 10:4; taraa naba kibu 3, 5).
Te koaua are ko na kunea inanon Ana Boki Moomon e na tabekiko ao n anganiko te kairi man te tamnei. A na kakorakoraa am onimaki, e na kaona tamneim ma te oota, ao ni katauraoiko ibukin te tai ae na roko ae kaangaanga karaoakina iroum.
Inanon baan te boki, ko na kunea ana tangira ae akea tokina ao ana akoi te Atua ae akea kabotauana. Ngkana ko kekeiaki n irii reirei aika ko kunei ikanne, e na rababa kimwareireim, e na rikirake otam, kaeka aika ko ukoukori nakon kakaewenako aika a mwaiti n te maiu aei ana kaukaki nakoim. Ngkana ko tarataraa te boki, ko tarataraa te Uea.