E a korakora te Maraki Ngkai Ko Kamatoa

Jeff Borders

Washington, USA

N te bongina n tain te kabuebue ao te bong ae e rangi ni kamaono inanon Turai, I buoka ai tariu ni katea te o are e na tuka mwanakon te tano. Te mwakuri aei e a karika ae I a karibwabwaaki ma wakaan te aroka ae te tierii ae e a tibwa rikirake are e mena imwaiu.

“E bebete,” I iango.

I a booti au bwai ni mwakuri ao ni kena rarikin te wakaa ni katobibia ni kamwawa neu ni mwakuri. I a anaa te tao ao, n aki iangoia raoi, I a moana naba korokorean taian wakaa. A baiti korean wakaa ake a uarereke, ma ngke I a roko ni wakaa ake a bubura, I a ataia ae e na aki bebete aron koreaia. Teuana mai ibuakon te wakaa e rangi ni matoatoa.

I tenai wiu, I a kataua bwa N a kororo ni kabwakaa te wakaa. E a bwaro maonou iaon roroau man kabuebuen taai are e tei iaou ngke I a kamatoa n taua te tao. E a ruru te tao nikarokoa e a bane n ruru rabwatau. I a namakina baiu—are e taua ni kamaoa bwain kamaiuan te tao—bwa e a moana ni bue ma te maraki. I aki tabe ma te maraki ao I reitinako ni taua.

N tokina, te tao e a korea te wakaa ni kanakoa. I a kaki bwain kamaeuan te tao ao I namakina te kukurei ibukin tokanikaiu. Ngke I kanakoa otangani baiu, I a noora kunin baiu bwa e a mwakoro man baiu.

Ngke I tabe n iangoa te bwai ae I a tia n rinanona, I kunea bwa kamatoan tauakin te tao, kanga bon aekakin, tauan te kai te biti ni kamatoa. Ti tuangaki bwa ti na kamatoa n taua te kai te biti inanon mwanangara n te maiu aei. Ma tao ibukina ae ti taua ni kamatoa e aki nanonaki ae ti na aki rinanon taai ni kamaraki. E ikuaki baiu ngke I taua ni kamatoa te tao. Ai bon aekakina naba, ti na rinanon kakatai ao karawawata ngkai ti reitinako n taua te kai te biti ni kamatoa.

E ataia Tamara are i Karawa bwa okira rikaaki Nakoina e na kaonaki ma taian kaangaanga. Anne bukina ae E a tia n anganira booki aika tabu ao aia taeka burabeti bwa buokara. Ngkana ti taui baikai inanon tain katakira ao karawawata n te maiu aei, n te tai teuana ti na okiria ni maeka ma Ngaia.

Ngkana ti a roko Irouna, ti na kona n tarai baira, ake a tia n taua ni kamatoa te kai te biti, inanon tain te maraki ke te kaangaanga. Ao ti na ataia bwa man ana ibuobuoki Tamara are i Karawa ao rinanon mwakan ana mwakuri ni kamaiu Iesu Kristo, ti kamatoa n taua, n aki tabe ma taian totoko ake ti kaitarai.