Glad Ia blong Ol Sent
Glad i kam taem yumi stap obei ol komanmen blong Kraes, taem yumi winim harem nogud mo ol wiknes tru long Hem, mo taem yumi givim seves olsem we Hem i bin mekem.
Profet long Buk blong Momon, Inos, apuboe blong Lihae, i bin raetem abaot wan spesel eksperiens we i bin hapen eli long laef blong hem. Taem hem i bin stap lukaotem kakae hemwan long bus, Inos i stat blong tingting hevi long ol tijing blong papa blong hem, Jekob. Hem i talem: “Ol toktok we mi bin harem plante taem we papa blong mi i talem long saed blong laef we i no save finis, mo glad blong ol sent, i bin go draon dip long hat blong mi.”1 From sol blong hem i hanggri, Inos i bin nildaon, i prea, wan naes prea we i gohed dei mo naet, wan prea we i tekem hem blong kasem ol impoten revelesen, stret save, mo ol promes.
I gat plante samting blong lanem aot long eksperiens blong Inos, be tedei, wanem i kamaot klia long maen blong mi, i memori blong Inos abaot papa blong hem we i bin tokbaot plante abaot “glad blong ol sent.”
Long konfrens ia, tri yia i pas, Presiden Russel M. Nelson i bin tokbaot glad.2 Wetem sam moa samting, hem i bin talem:
“Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.
“Taem yumi stap lukluk nomo long plan blong God blong fasin blong sevem man, mo Jisas Kraes mo gospel blong Hem, yumi save filim glad nomata wantem i stap hapen—o i no stap hapen—long laef blong yumi. Glad i kam long Hem mo from Hem. … Long Ol Lata-dei Sent, !Jisas Kraes i glad ia!”3
Ol Sent oli olgeta we oli mekem wan gospel kavenan tru long baptaes, mo oli stap traehad blong folem Kraes olsem ol disaepol blong Hem.4 Long wei ia, “glad blong ol sent” i minim se yumi stap kam olsem Kraes.
Mi wantem tokbaot glad ia we i kam taem yumi stap obei ol komanmen, glad ia we i kam from yumi winim harem nogud mo ol wiknes tru long Hem, mo glad ia we i kam taem yumi givim seves olsem we Hem i bin mekem.
Glad Ia blong Stap Obei Ol Komanmen blong Kraes
Yumi stap laef long wan selfis taem, we plante oli kwestinim hamas ol komanmen blong Lod oli impoten, o oli jes no wantem save long ol. Plante taem, ol pipol we oli no wantem save ol tabu tok olsem loa blong jastiti, standet blong stap ones, mo we Sabat i tabu, i luk se oli kam antap mo oli stap glad long ol gud samting blong laef, mo long sam taem, iven moa bitim olgeta we oli stap traehad blong obei. Sam oli stat blong askem olgetawan sapos i gud inaf blong hadwok mo mekem sakrifaes. Ol pipol blong Isrel bifo, oli bin komplen:
“Yumi stap mekem wok blong Hae God, be blong nating nomo. Sapos yumi mekem ol samting we hem i stap talem, no sapos yumi soemaot long hem we yumi tanem tingting blong yumi from ol samting nogud we yumi bin mekem, be ol samting ya tu i no save givhan long yumi.
“Long lukluk blong yumi, yumi luk se ol praod man nao oli stap harem gud. Mo ol man nogud oli gat plante samting. Be i no hemia nomo. Oltaem oli stap traem God long ol rabis fasin blong olgeta blong faenemaot se tingting blong hem i longfala no nogat, be oli no kasem panis from”5
Lod i talem: Jes wet, kasem “taem ia we bambae … mi mekem olgeta oli spesel man blong mi. “Mo bakegen, long taem ia, ol man blong mi bambae oli luksave fasin we bambae mi mekem long ol man. Ol stret man oli stap mekem wok blong mi, mo bambae mi mekem i stret long olgeta. Be ol man nogud, oli no stap mekem wok blong mi, nao bambae mi mekem i narafala long olgeta”6 Ol man nogud bae oli “glad blong smol taem nomo” be, oltaem i blong smol taem.7 Glad ia blong ol sent, i stap we i stap.
God i luk ol samting long tru wei blong olgeta, mo Hem i serem lukluk ia wetem yumi tru long ol komanmen blong Hem, i mekem gud blong soem rod long yumi i goraon long ol hol, mo bigfala hol long laef ia blong go kasem glad we i no save finis. Profet Josef Smit i bin eksplenem: “Taem ol komanmen blong Hem oli tijim yumi, i wetem lukluk long taem we i no save finis; from God i stap lukluk long yumi olsem se yumi stap long taem we i no save finis, mo i no luk ol samting olsem yumi stap luk olgeta”.8
Mi no faenem yet, eniwan, we i bin faenem gospel long medel blong laef blong hem, mo afta, i talem se, sapos nomo i bin hapen eli smol. “O, ol nogud joes mo ol mistek we bae mi no mekem,” oli talem. Ol komanmen blong Lod oli soem rod long yumi blong mekem moa gud joes mo gat moa hapi risal. O yumi sapos blong stap glad mo talem tangkyu long Hem from Hem i soem yumi wan moa gud wei.
Olsem wan yangfala, Sista Kalombo Rosette Kamwanya blong Dimokratik Ripablik blong Kongo, we naoia i stap long misin long Kot D’Ivoa Abijan Wes Misin, i bin livim kakae mo prea blong tri dei blong faenem rod ia we God i wantem hem blong tekem. Long wan visen long naet, hem i bin luk tufala bilding, wan japel mo naoia, hem i luksave se i wan tempol. Hem i stat blong lukaotem mo i no longtaem, i faenem japel ia we hem i bin luk long drim blong hem. Saen ia i talem: “Jos Ia blong Jisas Kraes blong Ol Lata-dei Sent.” Sista Kamwanya i bin baptaes, mo afta, mama blong hem mo sikis brata blong hem i baptaes. Sista Kamwanya i talem: “Taem mi kasem gospel, mi filim olsem we mi wan prisena pijin we mi kam fri. Hae blong mi i fulap long glad. … Mi gat stret save ia se God i lavem mi.”9
Blong stap obei long ol komanmen blong Lod, i mekem se i moa isi long yumi, mo yumi filim lav blong Hem moa fulwan. Rod ia we i stret mo i no isi, we i rod blong ol komanmen, i lidim yumi i go stret long tri blong laef; mo tri ia mo ol frut blong hem, oli swit olgeta, mo “yumi wantem i bitim evri samting,”10 mo oli ripresentem lav blong God, mo i fulumap sol “wetem wan bigfala glad.”11 Sevya i talem:
“Sapos yufala i stap obei long ol tok blong mi, bambae mi lavem yufala olwe, stret olsem we mi stap obei long ol tok blong papa blong mi, nao oltaem hem i stap lavem mi.
“Mi mi stap talemaot ol tok ya long yufala, blong yufala i save glad oltaem, olsem we oltaem mi mi glad, nao bambae yufala i glad we i glad.”12
Glad Ia blong Winim Samting tru long Kraes
Iven taem we yumi stap fetful blong obei ol komanmen, i gat ol tes mo ol nogud taem we oli save kam stopem glad blong yumi. Be, taem yumi stap traehad blong winim ol jalenj ia wetem help blong Sevya, i holemtaet glad we yumi filim naoia, mo glad we yumi stap wet from. God i talem gud long ol disaepol blong Hem: “Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.”13 Hem i long taem we bae yumi tanem yumi i go long Hem, stap obei long Hem, joenem yumi long Hem, bae tes mo harem nogud ia i kam wan glad. Hemia wan eksampol.
Long 1989, Jack Rushton i bin stap olsem presiden blong Aeven Kalifonia Stek long Yunaeted Stet. Long wan famli holidei long saed solwota long Kalifonia, Jack i stap mekem bodi ski long wota, mo wan wef i sakem hem long wan ston we i stap andanit wota, i brekem nek mo givim bigfala kil long bakbun blong hem. Afta long hemia, Jack i talem: “Taem mi faerap long ston, mi save se mi paralaes.”14 Hem i nomo save toktok o pulum win hemwan.15
Ol famli, fren, mo memba blong stek oli kam raon long Brata Rushton mo waef blong hem, Jo Anne, mo wetem sam moa samting, oli jenisim wan pat blong hom blong i stret long wiljea blong Jack. Jo Anne i kam nambawan woman blong lukaot long Jack long ol nekis 23 yia. Taem hem i gobak long ol stori long Buk blong Momon abaot wei we Lod i bin visitim ol pipol blong Hem long hadtaem blong olgeta, mo i mekem trabol blong olgeta i nomo hevi,16 Jo Anne i talem: “Plante taem, mi sapraes we hat blong mi i no hevi taem mi stap kea long hasban blong mi.”17
Oli mekem wan jenis long wei we Jack i pulum win, nao i mekem hem i save toktok, mo long yia ia, oli singaotem Jack i kam tija blong Gospel Doktrin mo wan stek petriak. Taem bae hem i givim wan petriakel blesing, wan nara man we i holem prishud i putum han blong Brata Rushton antap long hed blong hem ia we i stap kasem blesing, mo i sapotem han blong hem long taem blong blesing. Jack i ded long Krismes dei long 2012, afta 22 yia blong fetful seves.
Wan taem, long wan intaviu, Jack i talem: “Ol problem bae oli kam long ful laef blong yumi; hem i pat blong stap ia long wol ia. Mo sam pipol oli ting se relijin o gat fet long God bae i protektem yumi long ol nogud samting. Mi no ting se poen i hemia. Mi ting se poen, i we, sapos fet blong yumi i strong, taem ol nogud samting oli hapen, mo bae oli hapen, bae yumi save fesem olgeta. Fet blong mi i neva muvmuv, be hemia i no minim se mi no bin gat taem we mi sik long tingting. Mi ting se, blong fas taem long laef blong mi, oli pusum mi kasem mak blong mi, mo i no gat ples nating blong go long hem, mekem mi tanem mi i go long Lod, mo kasem tedei, mi filim glad oltaem.”18
Hemia i taem we, samtaem, ol atak we i no gat sore oli gohed long sosol media, mo agensem olgeta we oli holemtaet standet blong Lod long fasin blong dresap, entetenmen, mo stap klin long saed blong seks. Plante taem, ol yut mo ol yang adalt nao long medel blong Ol Sent, mo tu, ol woman mo mama nao oli stap tekem kros ia blong fasin blong jik mo kasem hadtaem. Hem i no isi blong go ova long ol kaen abius ia, be tingbaot ol toktok blong Pita: “Sapos ol man oli tok nogud long yufala from we yufala i man blong Kraes, yufala i save harem gud. Hemia i min se Spirit ya blong heven, we i Spirit blong God, hem i kamdaon finis, i stap long yufala. [Olgeta oli tokbaot hem, be yufala i stap givim glori long hem.”19
Long Garen blong Iden, Adam mo Iv, tufala i stap long “wan ples we oli no gat rong from oli no save samting, oli no gat glad, from oli no save wanem i bigfala harem nogud.”20 Nao. Olsem ol man we yumi akaontebol, yumi faenem glad taem yumi winim bigfala harem nogud, long eni kaen wei, olsem sin, tes, wiknes, o eni nara samting we i kam blokem hapines. Hemia i glad blong filim progres long rod ia blong stap wan disaepol; glad ia blong “from oli bin kam klin aot long ol sin blong olgeta, mo oli bin kasem pis long tingting;”21 glad ia blong filim sol blong wan i gro bigwan mo i groap tru long gladhat blong Kraes.22
Glad Ia blong Givim Seves Semmak Olsem Kraes
Sevya i faenem glad blong mekem man i nomo save ded mo i kasem laef we i no save finis.23 Taem hem i tokbaot Atonmen blong Sevya, Presiden Russel M. Nelson i talem:
“Semmak long evri samting, Jisas Kraes i stamba eksampol blong yumi, ‘taem hem i go blong i ded long kros, hem i luksave finis we bambae i save harem gud’” [Hibrus 12:2]. !Tingting long hemia! Blong Hem i stap gotru long ol bigfala nogud eksperiens ia we man i eva fesem long wol ia, !Sevya i bin lukluk nomo long glad!
“Mo ?wanem glad nao i bin stap long fored blong Hem? Yes, i bin gat glad blong kam klin, blong hilim man, mo blong mekem yumi kam strong moa; glad blong pem sin blong evriwan we bae i sakem sin; glad blong mekem i posibol blong yu mo mi blong gobak hom—we yumi klin mo inaf—blong stap laef wetem Papa mo Mama blong yumi long Heven mo ol famli.”24
Semmak, glad ia we i stap long fored blong yumi, i glad ia blong helpem Sevya long wok blong Hem blong pemaot man. Olsem laen mo ol pikinini blong Ebraham,25 yumi stap tekpat long wok blong blesem evri famli blong wol ia wetem “ol blesing blong Gospel, we oli ol blesing blong fasin blong sevem man, we i laef we i no save finis.”26
Ol toktok blong Alma oli kam long maen blong mi:
“Hemia glori blong mi, se maet mi save kam wan tul long ol han blong God blong tekem sam sol oli kam blong sakem sin; mo hemia i glad blong mi.
“Mo luk, taem we mi luk plante long ol brata blong mi oli sakem sin long tru fasin, mo oli kam long Lod, God blong olgeta, ale sol blong mi i fulap long glad; …
“Be mi no glad long sakses blong miwan nomo, be glad blong mi i moa bigwan from sakses blong ol brata blong mi, we oli bin go antap long graon blong Nifae. …
“Nao, taem we mi tingbaot sakses blong olgeta ia, we oli ol brata blong mi, glad blong mi i tekem mi i go bitim mak we i olsem se hem i kamaot long bodi blong mi, from glad blong mi i bigwan tumas.”27
Ol frut blong seves blong yumi i go long wanwan long yumi insaed long Jos, oli pat blong glad ia we i stap long fored blong yumi. Iven long ol taem we tingting i slak, o i fasfas, yumi save givhan wetem longfala tingting sapos yumi lukluk nomo long glad ia blong stap mekem gud long God mo tekem laet, help, mo hapines i go long ol pikinini blong Hem, ol brata mo sista blong yumi.
Taem mi bin stap long Haiti las manis, blong dedikesen blong Potoprins Tempol, Elda David mo Sista Susan Bednar oli bin mitim wan yang sista we man blong hem i jes ded sam dei bifo long wan bigfala aksiden. Oli bin krae tugeta wetem hem. Yet, long Sandei, dia woman ia i bin stanap long ples blong hem, olsem wan blong welkamem ol pipol long dedikesen seves, wetem wan naes smael blong evriwan we i go insaed long tempol.
Mi biliv se bigfala “glad blong ol sent” i kam taem oli save se Sevya i stap toktok from olgeta,28 mo i no gat man i save talemaot glad we [bae] i fulumap sol blong mifala long taem we mifala i harem [Jisas] i prea from mifala long Papa.”29 Wetem Presiden Russell M. Nelson, mi testifae, se glad i wan presen we i blong ol fetful Sent “we oli bin stap tekem ol kros blong wol ia i gotru”30 mo oli bin “minim blong traem laef long wan stret mo gud laef, olsem we Jisas Kraes i bin tijim.”31 Blong glad blong yumi i fulwan, mi prea long nem blong Jisas Kraes, amen.