Frut
Kipim ae mo hat blong yu oltaem i stap long Sevya, Jisas Kraes, mo glad ia we i no save finis we i kam tru long Hem nomo.
!Mi save tingting blong yufala! Jes wan moa spika nomo afta bae yumi harem Presiden Nelson. Mi hop se toktok blong mi i kipim yufala i wekap blong sam minit blong wet long profet we yumi lavem, mo mi jusum wan swit topik: Hem i frut.
Wetem kala, tes, mo swit blong ol beri, banana, wotamelen, mo ol manggo, mo sam moa olsem yelo kiwi, o Jaenis gwava, longtaem finis, frut, longtaem finis i wan naes kaekae.
Long seves blong Hem long wol ia, Sevya i bin komperem ol gud frut long ol samting we i impoten blong taem we i no save finis. Hem i talem: “Bambae yufala i save makem olgeta long frut blong laef blong olgeta.”1 “Gudfala tri, hem i save karem gudfala frut nomo.”2 Hem i leftemap tingting blong yumi blong hivimap “kakae ya [we i] blong laef ya we i no save finis.”3
Long wan laef drim we yumi save gud insaed long Buk blong Momon, profet Lihae i stap long wan “wan dak mo sore waelples.” I gat doti wota, klaod blong tudak, ol strenj rod, ol rod blong no folem, mo tu, wan aean rel4 we i folem wan stret rod we i no isi we i lidim man i go long wan naesfala tri, we i fulap long “frut [we i mekem] man i hapi.” Taem hem i talembak drim ia, Lihae i talem: “Mi go, … mi bin tekem mo kakae frut ia; … i moa swit bitim evri frut we mi bin testem bifo. … Mo hem i fulumap sol blong mi wetem bigfala glad we i bigwan tumas;” Frut ia i “gud i bitim tes blong evri narafala frut.”5
Mining blong Tri mo blong Frut
?Tri ia we i gat frut ia we i tes gud evriwan, i simbol blong wanem? Hem i ripresentem “lav blong God”6 mo i taltalemaot gudfala plan blong pemaot man we i kam long Papa long Heven. “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”7
Gudfala frut ia i simbol blong ol bigfala blesing blong Atonmen blong Sevya we i no gat nara samting i semmak long hem. Bae yumi laef bakegen afta laef long wol ia, be tu, tru long fet blong yumi long Jisas Kraes, from yumi sakem sin, mo stap obei long ol komanmen, bae yumi save kasem fogivnes from ol sin blong yumi, mo wan dei, yumi stanap klin mo klin evriwan long fes blong Papa mo Pikinini blong Hem.
Blong stap tekem mo kakae frut blong tri ia, i simbol tu se yumi akseptem ol odinens mo ol kavenan blong gospel we i kambak—we yumi baptaes, yumi kasem presen we i Tabu Spirit, mo go insaed long haos blong Lod blong Hem i kavremap yumi wetem paoa we i kam long heven. Tru long gladhat blong Jisas Kraes, mo tru long fasin blong ona long ol kavenan blong yumi, yumi kasem promes ia we i no gat samting i save makem, blong stap laef wetem stret mo gud famli blong yumi blong ol taem we i no save finis.8
From hemia nao, enjel i talem se frut ia, “hem i wan glad we i bigwan olgeta long sol.”9 !I rili wan glad!
Jalenj Ia blong Stap Tru
Olsem we yumi evriwan i lanem, iven afta we yumi kakae gud long gudfala frut blong gospel we i kambak, blong stap tru mo fetful long Lod Jisas Kraes, i stil i no isi blong mekem. Yumi gohed blong fesem samting we i pulumaot yumi mo trikim yumi, i mekem yumi konfius mo muvmuv olbaot, i switim yumi, mo ol temtesen we i traem blong pulum hat blong yumi longwe long Sevya mo long ol glad mo naes samting we yumi gotru long ol taem yumi stap folem Hem.
From samting ia we i save kam agens, !drim blong Lihae i kam tu wetem wan woning! Long nara saed blong reva, i gat wan bigfala bilding wetem plante rum, wetem ol pipol blong eni kaen yia, we oli poenem fingga, oli jik, mo oli laf long ol stret mo gud man we oli folem Jisas Kraes.
Ol pipol insaed long bilding ia oli daonem man, tok nogud, mo stap laf long olgeta we oli stap obei ol komanmen, mo ol pipol ia oli hop se bae ol narawan ia oli nomo gat ona mo respek long fet blong olgeta long Jisas Kraes mo long gospel blong Hem. Mo from ol rabis toktok, mo ol toktok nogud we ol man ia oli sakem i go long ol man we oli biliv, sam long olgeta we oli bin testem frut ia, oli stat blong sem long gospel ia we oli bin akseptem. Ol giaman samting ia blong wol oli switim olgeta; oli gowe long tri mo frut, mo olsem toktok blong Lod i talem: oli “foldaon i go long ol rod we i no blong folem, mo oli … lus.”10
Long wol tedei, enemi i karem ol wokman we oli topman we oli wok ovataem, mo kwiktaem sendem man i go long bigfala bilding ia wetem fulap rum. Ol niu rum oli go krosem reva, wetem hop blong go insaed long ol hom, mo ol man blong poenem fingga mo jik oli singaot dei mo naet wetem intanet hela blong olgeta.11
Presiden Nelson i eksplenem: “Enemi i stap dabdabolem ol traehad blong hem blong spolem ol testemoni blong yumi, mo blong stopem wok blong Lod.”12 Bae yumi tingbaot ol toktok blong Lihae: “Mifala i no lisin long olgeta.”13
Nomata yumi no nid blong stap fraet, be yumi mas lukaot gud. Samtaem, ol smol samting oli save mekem yumi nomo gat balens long saed blong spirit. Plis. No letem ol kwestin, ol swea blong ol narawan, ol fren we oli nomo gat fet, o ol mistek o ol harem nogud oli tanem yu blong lukluk longwe long swit, klin blesing we i stretem sol, we i kam long gudfala frut blong tri ia. Kipim ae mo hat blong yu oltaem i stap long Sevya, Jisas Kraes, mo glad ia we i no save finis we i kam tru long Hem nomo.
Fet blong Jason Hall
Long Jun, waef blong mi, Kathy mo mi i go long fenerol blong Jason Hall. Long taem we bae hem i ded, hem i 48 yia, mo i stap olsem wan presiden blong kworom blong ol elda.
Hemia ol toktok blong Jason abaot wan taem we i bin jenisim laef blong hem:
“Taem mi gat 15 yia, mi kasem aksiden taem mi bin daeva. … Mi brekem nek blong mo mi paralaes stat long jes i go daon. Mi lusum kontrol fulwan blong leg mo sam kontrol blong ol han. Mi nomo save wokbaot, stanap, … o fidim miwan. Mi no save pulum gud win o toktok.”14
Mi plis: “Dia Papa we i stap long Heven, sapos mi save gat han blong mi nomo, bae mi oraet. Plis Papa, plis. …
“Yu tekem leg blong mi, Papa; mi jes prea blong mi save yusum han blong mi.”15
Jason i neva save yusum ol han blong hem bakegen. ?Yu yu save harem ol voes we oli kam long bigfala bilding ia? “Jason Hall, !God i no stap harem prea blong yu! Sapos God i wan God blong lav, ?Hao nao bae i lego yu olsem? ?From wanem yumi mas gat fet long Kraes?” Jason Hall i bin harem ol voes ia be i no lisin long olgeta. Be hem i bin lafet long frut blong tri ia. Fet blong hem long Jisas Kraes, i nomo muvmuv. Hem i graduet long yunivesiti, mo i maredem Kolette Coleman long tempol, mo i talem se hemia lav blong laef blong hem.16 Afta long 16 yia blong mared, wan nara merikel, gudfala boe blong tufala, Coleman, i bon.
?Olsem wanem oli bin mekem fet i groap? Kolette i eksplenem: “Mifala i trastem plan blong God. Mo i givim hop long mifala. Mifala i bin save se Jason, bae i oraet wan dei mo i kam gud evriwan. Mifala i bin save se God i givim wan Sevya, Jisas Kraes, we sakrifaes blong hem we i pem praes, i mekem se yumi save luk fored taem yumi wantem blong givap.”17
Taem hem i toktok long fenerol blong Jason, Coleman we i gat 10 yia i talem se papa blong hem i tijim hem “se Papa long Heven i gat wan plan blong mifala, se laef long wol bae i gud tumas, mo mifala i laef insaed ol famli. … Be, bae mifala i go tru long sam had samting, mo bae mifala i mekem ol mistek.”
Coleman i gohed: “Papa long Heven i bin sendem Pikinini blong Hem, Jisas Kraes, blong kam long wol ia. Wok blong hem i blong hem i mas stret evriwan. Blong hilim ol man. Blong lavem olgeta. Mo afta, blong safa from evri sobodi, harem nogud, mo sin. Afta, Hem i bin ded from yumi.” Be Coleman i ademap: “From Hem i mekem hemia, Jisas i save olsem wanem mi filim naoia.”
“Tri dei afta Jisas i ded, Hem i kam laef bakegen wetem wan bodi we i stret evriwan. Hemia i impoten long mi from mi save se bodi blong papa blong mi bae i stret evriwan, mo bae mifala i stap tugeta olsem wan famli.”
Coleman i endem: “Evri naet, taem mi smol bebi i kam,” Coleman i talem, “papa i talem long mi: ‘Papa i lavem yu, Papa long Heven i lavem yu, mo yu yu wan gud boe.’”18
Glad I Kam, From Jisas Kraes
Presiden Russell M. Nelson i tokbaot from wanem Hall famli i gat glad mo hop. Hem i talem:
Hem i talem: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.
“Taem we, long laef blong yumi, yumi stap lukluk nomo long plan blong God blong fasin blong sevem man, mo Jisas Kraes mo gospel blong Hem, yumi save filim glad nomata wantem i stap hapen—o i no stap hapen—long laef blong yumi. Glad i kam long Hem mo from Hem. Hem i stamba blong evri glad. …
“Sapos yumi lukluk long wol ia, … bae yumi neva save wanem i glad. … [Glad] hem i presen we i kam taem wan i wantem mo minim blong traem laef long wan stret mo gud laef, olsem we Jisas Kraes i tijim.”19
Wan Promes Taem Yu Gobak
Sapos yu no kakae frut blong tri ia blong sam taem, plis save se ol han blong Sevya oli open oltaem long yu. Wetem lav, Hem i singaot: “sakem sin mo kam long mi.”20 Frut blong hem i plante i stap mo tri i karem frut oltaem. Oli no save pem wetem mane, mo i blong evriwan we i rili ones blong wantem frut ia.21
Long eniwan we i wantem blong kambak long tri ia mo testem frut ia bakegen, stat blong prea long Papa long Heven. Biliv long Jisas Kraes mo paoa blong sakrifaes we i pem praes from sin. Mi promesem yufala se, taem yufala i luk long Sevya, “long evri tingting,”22 frut blong tri ia bae i blong yu, i gat gud tes, i mekem sol i glad, i “presen we i hae moa long evri presen blong God.”23
Tri wik i pas tedei, mi bin luk glad blong frut blong Sevya i kamaot, taem we Kathy mo mi, mitufala i go long dedikesen blong Lisbon Potugal Tempol. Ol trutok blong gospel we i kambak oli open long Potugal long 1975 taem we oli kasem fridom blong relijin. I gat plante gudfala Sent ia we oli testem frut faswan taem i no gat kongregesen, i no gat japel, mo tempol we i kolosap moa bitim 1600 kilometa, naoia oli stap glad from se oli save faenem gudfala frut blong tri ia i plante we i plante insaed long haos blong Lod long Lisbon, Potugal. Mi givim ona mo respektem ol Lata-dei Sent ia we oli kipim hat blong olgeta i stap nomo long Sevya.
Sevya i talem: “Man we i joen gud long mi, mo mi … long hem, bambae hem i save karem plante frut long laef blong hem. Be sapos [no], yufala i no save mekem wan samting nating.24
Taem hem i stap toktok long moning ia long ol memba blong Jos raon long wol, Presiden Nelson i talem: “Ol dia brata mo sista blong mi. Yufala i ol laef eksampol blong ol frut we oli kam taem wan i stap folem ol tijing blong Jisas Kraes.” Afta, hem i ademap: !Mi talem tangkyu! !Mi lavem yufala!”25
Mifala i lavem yu, Presiden Nelson.
Mi mi wan ae witnes long paoa blong revelesen we i stap long dia Presiden. Hem i profet blong God. Olsem Lihae bifo, Presiden Russell M. Nelson i singaotem yumi, mo evri famli blong God, blong kam mo tekem mo kaekae frut blong tri ia. Bae yumi gat tingting i stap daon mo paoa blong folem advaes blong hem.
Wetem tingting i stap daon mi mi wan witnes, se Jisas Kraes i Pikinini blong God. Lav, paoa mo gladhat blong Hem oli mekem evri samting we oli gud, i stap olwe. Mi testifae long hemia, long nem blong Jisas Kraes, amen.