Las Toktok
Blong wanwan i stap klin inaf, i nidim blong wan i jenisim maen mo hat fulwan blong kam moa olsem Lod.
Ol brata mo sista we mi lavem. Taem yumi stap kam blong klosem histri konfrens ia, yumi talem tangkyu long Lod from ol mesej blong insperesen mo miusik we i bin leftemap yumi. I tru, yumi bin glad long lafet ia long saed blong spirit.
Yumi save se gospel blong Jisas Kraes bae i tekem hop mo glad i go long ol pipol we bae oli harem mo mekem folem doktrin blong Hem. Yumi save tu se, hom blong wanwan memba bae i wan sef haos blong fet, ples we pis, lav, mo Spirit blong Lod i save stastap long hem.
I tru, hae impoten samting blong Kambak blong gospel blong Jisas Kraes, hem i tabu tempol. Ol tabu odinens mo kavenan blong tempol oli plei bigfala pat blong mekem wan pipol i rere blong welkamem Sevya long Seken Kaming blong Hem. Naoia i stap, yumi gat 166 tempol we i open, mo oli stap bildim moa yet.
Bae oli holem wan open haos bifo oli dediketem wanwan long ol niu tempol ia bakegen. Plante fren we oli no fet blong yumi, bae oli tekpat long ol tua ia insaed long ol tempol ia, mo bae oli lanem wan samting abaot ol blesing blong tempol. Mo sam long ol visita ia, bae oli wantem tumas blong save moa. Sam, bae oli gat tru tingting mo askem hao oli kwalifae from ol blesing blong tempol.
Olsem ol memba blong Jos, yumi nid blong yumi mas rere blong ansarem ol kwestin blong olgeta. Yumi save eksplenem se ol blesing blong tempol oli stap long eniwan mo evri pipol we bae oli mekem olgeta oli rere. Be bifo oli save go insaed long wan tempol we oli dediketem, oli nid blong kwalifae. Lod i wantem evriwan long ol pikinini blong Hem blong gat pat long ol blesing we oli no save finis we oli stap insaed long tempol blong Hem. Hem i bin talem finis wanem wanwan man o woman i mas mekem blong kwalifae blong go insaed long tabu haos blong Hem.
Wan gud ples blong statem wan janis olsem blong tij, hem i blong lukluk gud long ol toktok we oli raetem long ol wol aotsaed long tempol: “I Tabu I blong Hae God: Haos blong Lod.” Mesej blong Presiden Eyring tedei, mo blong plante narawan, oli bin givim yumi insperesen blong kam moa tabu. Wanwan tempol i wan tabu ples; wanwan we i go long tempol i traehad blong kam moa tabu.
Evri samting we yu mas mekem blong go insaed long tempol, hem i abaot tabu fasin blong yuwan. Blong skelem hamas wan i rere o no, wanwan we i wantem glad long ol blesing blong tempol, bae i gotru long ol intaviu: faswan, wetem bisop, bisoprik kaonsela, o branj presiden; sekenwan, wetem stek o misin presiden, o wan kaonsela blong hem. Long ol intaviu ia, bae oli askem samfala kwestin.
Sam long ol kwestin ia, oli jes jenisim smol blong i klia moa. Mi wantem luklukbak long olgeta wetem yufala naoia:
-
?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?
-
?Yu yu gat wan testemoni abaot Atonmen blong Jisas Kraes mo wok blong Hem olsem Sevya mo Ridima?
-
?Yu yu gat wan testemoni long saed blong Kambak blong gospel blong Jisas Kraes?
-
?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki?
?Yu yu sastenem ol memba blong Fas Presidensi mo Kworom blong Olgeta Twelef Aposol olsem ol profet, sia, mo reveleta?
?Yu yu sastenem ol nara Jeneral Atoriti mo ol lokol lida blong Jos?
-
Lod i bin talem se evri samting, oli mas mekem “long klin fasin” long fored blong Hem (Doktrin mo Ol Kavenan 42:41).
?Yu yu traehad blong stap laef long klin fasin long ol tingting mo long ol aksen blong yu?
?Yu yu stap obei long loa blong jastiti?
-
?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?
-
?Yu yu stap sapotem o promotem eni tijing, praktis, o doktrin we i agensem hemia blong Jos Ia blong Jisas Kraes blong Ol Lata-dei Sent?
-
?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?
-
?Yu yu stap traehad blong stap ones long evri samting we yu stap mekem?
-
?Yu yu stap pem ful taeting?
-
?Yu yu stap andastanem mo stap obei long Tok blong Waes?
-
Yu yu gat sam mane o sam narafala samting we yu mas pem i go long hasban/waef blong yu blong fastaem, o yu yu gat eni mane blong pem long saed blong ol pikinini blong yu?
Sapos yes, yu yu stap pem gud ol mane ia, o yu yu stap mekem ol samting we yu mas mekem long olgeta?
-
?Yu yu stap kipim ol kavenan we yu bin mekem insaed long tempol, olsem blong stap werem gamen blong tempol olsem we oli givim instraksen long yu long endaomen?
-
?I gat eni series sin, o nogud fasin insaed long laef blong yu we yu nidim blong stretem wetem ol prishud atoriti olsem pat blong yu blong sakem sin?
-
?Yu yu ting se yu yu klin inaf blong go insaed long haos blong Lod mo tekempat long ol odinens blong tempol?
Tumoro, bae oli serem ol niu kwestin blong tempol rekomen ia long ol lida blong Jos raon long wol.
Antap long fasin blong ansarem ol kwestin ia long ones fasin, andastaning i stap se wanwan adalt we i go long tempol, bae i werem tabu gamen ia blong prishud andanit long nomol klos blong olgeta. Hemia i wan saen blong wan komitmen we oli mekem insaed long olgeta, blong traehad evri dei blong kam moa olsem Lod. Hem i stap rimaenem yumi blong gohed blong stap fetful long ol kavenan we yumi stap mekem evri dei, mo blong wokbaot long kavenan rod ia, evri dei, long wan moa hae mo tabu wei.
Bae mi tekem smol taem blong toktok long ol yut blong yumi. Mifala i leftemap tingting blong yufala blong kwalifae from wan limit yus tempol rekomen. Bae oli askem nomo ol kwestin ia taem yu stap rere blong tekpat long ol odinens blong proksi baptaes mo proksi konfemesen. Mifala i talem tangkyu tumas from yufala i stap klin inaf mo yufala i glad blong tekpat long tabu tempol wok ia. !Mifala i talem tangkyu!
Blong stap klin inaf blong go insaed long haos blong Lod i askem blong yu rere plante long saed blong spirit. Be wetem help blong Lod, evri samting i posibol. Long sam wei, hem i moa isi blong bildim wan tempol bitim blong bildimap wan pipol we i rere blong go long tempol. Blong wanwan i stap klin inaf, i nidim blong wan i jenisim fulwan maen mo hat blong kam moa olsem Lod, blong i stap olsem wan ones sitisen, blong i stap olsem wan moa gud eksampol, mo i wan moa tabu man o woman.
Mi testifae se wok ia blong stap rere, i tekem plante blesing we yu no save kaontem long laef ia, mo ol blesing we yu no stap ting long hem long laef we bae i kam, mo wan i blong famli blong yu i gohed truaot long fultaem we i no save finis “long wan ples blong hapi we i neva gat en.”1
Naoia, mi wantem tokbaot wan nara topik—ol plan blong yia we i stap kam. Long springtaem blong yia 2020, bae i 200 yia stret stat long taem we Josef Smit i bin gat taem we God i kamaot long hem, we yumi save olsem Fas Visen. God Papa mo Pikinini blong Hem we Hem i Lavem Tumas, Jisas Kraes, Tufala i bin kamaot long Josef, wan yut blong 14 yia. Taem ia i makem stat blong Restoresen blong gospel blong Jisas Kraes, fulwan, stret olsem we Tabu Baebol i tokbaot.2
Afta long hemia, i bin gat sam narafala visit blong ol mesenja blong heven, olsem Moronae, Jon Baptaes, mo ol fas Aposol, Pita, Jemes mo Jon. Ol narawan oli kam afta, olsem Moses, Elaeas, mo Elaeja. Wanwan i tekem wan tabu atoriti i kam blong blesem ol pikinini blong God long wol ia, bakegen.
Olsem wan merikel, yumi bin kasem tu, Buk blong Momon: Wan Narafala Testeman blong Jisas Kraes, wan kampani skripja wetem Tabu Baebol. Ol revelesen ia, we oli pablisim insaed long Doktrin mo Ol Kavenan mo Perel we I Gat Bigfala Praes, oli mekem andastaning blong yumi i kam rij abaot ol komanmen blong God mo trutok we i no save finis.
Ol ki mo ol ofis blong prishud, oli bin putumbak, olsem ol ofis blong Aposol, Seventi, petriak, hae pris, elda, bisop, pris, tija mo dikon. Mo ol woman we oli lavem Lod, oli givim seves strong insaed long Rilif Sosaeti, Praemeri, Yang Woman, Sandei Skul, mo ol nara koling blong Jos—evriwan ia, oli ol stamba pat blong Restoresen blong gospel blong Jisas Kraes, we i fulwan.
Olsem ia nao, yia 2020 bae i stap olsem 200 yia. Jeneral Konfrens, long nekis Epril, bae i defren long eni konfrens bifo. Long ol nekis sikis manis, mi hop se evri memba mo evri famli bae i rere from wan spesel konfrens ia we bae i stap blong tingting long ol stamba fandesen blong gospel ia we i kambak.
Bae yufala i save stat blong rere taem yufala i ridim fulwan bakegen, stori blong Josef Smit abaot Fas Visen olsem we oli raetem insaed long Perel we I Gat Bigfala Praes. Stadi kos blong yumi, nekis yia, long Kam Folem Mi, i Buk blong Momon. Bae yufala i wantem blong tingting hevi long ol impoten kwestin ia olsem: “?Bae laef blong mi i defren long wanem wei sapos, save ia we i kamaot long Buk blong Momon, bae oli tekemaot long mi?” o “Olsem wanem nao ol samting we oli hapen afta long Fas Visen oli mekem samting i defren long laef blong mi mo olgeta we mi lavem olgeta?” Mo tu, wetem ol vidio blong Buk blong Momon we oli stap naoia, bae yufala i wantem yusum olgeta long stadi blong yufalawan o wetem famli.
Jusum ol kwestin blong yuwan. Raetem plan blong yuwan. Draonem yuwan insaed long glori laet ia blong Restoresen. Taem yu stap mekem olsem, jeneral konfrens nekis Epril, bae i no jes wan gud taem, be bae yu neva fogetem.
Blong endem, mi livim wetem yufala lav mo blesing blong mi, se wanwan long yufala bae i moa hapi mo moa tabu long evri dei we bae i pas. Be, mi save talem stret long yufala se revelesen i gohed insaed long Jos mo bambae i gohed anda long daereksen blong Lod kasem taem we “ol stamba tingting blong God oli kamtru, mo Hae Jehova bae i talem se wok i finis.”3
Mi blesem yufala, mo talem tru se mi lavem yufala, mo testifae long yufala se !God i stap laef! !Jisas Hem I Kraes! Hemia Jos blong Hem, mo yumi ol pipol blong Hem. Long tabu nem blong Jisas Kraes, amen.