Fakaʻilekitulōnika Pē: Kakai Lalahi Kei Talavoú

Ko Hono Fakahoko ʻa e Ngāue Toputapú Lolotonga ʻa e Taimi Kolonitiní

Fai ʻe Kaith Ashley Moran

Lolotonga e tāpuni ʻa e ngaahi temipalé, ʻe lava ke hokohoko atu ʻetau tokoni ki he ngāue toputapú mei ʻapi.

ʻĪmisi

Kau fefine ʻoku nau sio ki ha tablet

ʻOku nofo ʻa e tokotaha naʻá ne faʻú ʻi Manila, ʻOtu Filipaini.

Naʻe ʻikai te u ʻamanaki ke fanongo ki ha ngaahi lea ʻo hangē ko ia ne vahevahe ʻe he Kau Palesitenisī ʻUluakí ʻi he māhina kuo ʻosí: “Hili hano fakakaukauʻi fakalelei ʻi he faʻa lotu, pea mo ha loto-holi ke mau hoko ko ha kau tangataʻifonua lelei fakaemāmani lahi, kuo mau fakakaukau ai ke taʻofi fakataimi ʻa e ngāue kotoa pē ʻi he temipalé.”¹

Mahalo ʻokú ke hangē pē ko aú, ʻo fifili pe ʻe fēfē nai haʻaku fehangahangai mo e ngaahi taimi faingataʻa ʻo e ʻaho ní, taʻe kau ai e ngaahi potu māʻoniʻoni ko ʻeni ʻo e melinó. Ne ʻosi tāpuni foki e ngaahi temipale ia ʻi heni ʻi he ʻOtu Filipainí kimuʻa pē ia pea toki fakahoko ʻa e kolonitini ʻi he tukui koló, ko ia ai kuo fuoloa ʻeni ʻeku fakaʻamu ke foki ki he fale ʻo e ʻEikí.

Ka ʻoku ʻi ai ha meʻa mahuʻinga kuó u fakatokangaʻi lolotonga ʻa e taimi kolinitiní. Neongo ʻoku tāpuni ʻa e ngaahi matapā ʻo e temipalé, ka ʻoku ʻikai taʻofi ai e ngāue ki hono teuteu e ngaahi ouaú. ʻOku kei tatali mai ʻetau ngaahi kuí mei he tafaʻaki ʻe taha ʻo e veilí ke tau ako ke lahi ange kau kiate kinautolu. Kapau ʻokú ke fekumi ki ha ngaahi founga ke fakaafeʻi mai ai e ngaahi ongo toputapu ʻo e ngāue fakatemipalé ki hoʻo lotofalé, ko ha ngaahi fakakaukau ʻeni ʻe niʻihi:

Vakaiʻi hoʻo fuʻu ʻakau fakafāmili ʻi he FamilySearch.org.
ʻAhiʻahi fakahoko e fakahokohoko fakamotuʻaleá. ʻOku mātuʻaki fakafiefia ange ia ʻi he ngaahi keimi vitioó!
Fakaʻaongaʻi ʻa e tekinolosiá ke fetuʻutaki ai mo e kāinga ʻoku kei moʻuí.
Hiki ʻa e ngaahi talanoa hoʻo fāmilí.

Kuó u mātā ʻi he hanga ʻe he ngaahi ʻekitivitī ko ʻení ʻo “liliu ʻa e [ngaahi] loto” ʻo e kau mēmipa ʻo hoku fāmilí, ʻo hangē ko ia ʻoku fakamatalaʻi ʻi he Malakai 4:6, pea fakahaofi kimautolu mei he taʻefiemālié, taʻeoliʻiá mo e siva e ʻamanakí. Pea neongo ko e taimi kolonitiní ʻoku ʻikai ko e tuʻunga lelei tahá ia, ka ʻoku ou houngaʻia ʻi he faingamālie ʻokú ne ʻomi ke u tokoni ai ki he ngāue fakatemipale ko ʻeni mei ʻapí.

ʻE lava ke hoko ʻeni ko ha taimi toputapu ia ʻi heʻetau moʻuí. Mahalo ʻe fakamanatu mai ʻe he mahaki fakaemāmani lahi ko ʻení ʻa hono mahuʻinga ʻo e ngaahi temipalé. Mahalo te tau houngaʻia ʻi he faingamālie ke ʻalu ai ki he temipalé ʻo lahi ange ʻi he taimi kimuʻá. Hangē ko ia ne fakahaaʻi ʻi he fanongonongo ʻa e Kau Palesitenisī ʻUluakí, “Ko ha liliu fakataimi pē ʻeni, pea ʻoku mau hanganaki atu ki he ʻaho ʻe toe fakaava ai ʻa e ngaahi temipalé.”²

ʻOku ʻikai ke u faʻa tatali ki he ʻaho ko ia te tau lava ai ʻo toe fakahoko e ngaahi ouau faifakamoʻuí ki heʻetau ngaahi kuí! ʻOku lahi ʻaupito e ngāue te tau kei lava ʻo fai kimuʻa pea tau toki aʻu ki he ʻaho ko iá.

Ngaahi Tāpuaki Fakamoʻuí

Naʻe pehē ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá, “i heʻetau kau he ʻahó ni ʻi he hisitōlia fakafāmilí mo e ngāue fakatemipalé, ʻoku tau feʻunga foki ai ki he ngaahi tāpuaki ‘fai fakamoʻui’ ne talaʻofa ʻe he kau palōfitá mo e kau ʻaposetoló.… ʻOku kau ʻi he lisi lōloá ni ʻa e ngaahi tāpuakí ni:

Mahino lahi ange ki he Fakamoʻuí mo ʻEne feilaulau fakaleleí;
Ivi tākiekina lahi ange ʻo e Laumālie Māʻoniʻoní ke fakamālohia mo ʻomi ha fakahinohino ki heʻetau moʻuí;
Tui lahi ange, kae hoko ʻo loloto mo tolonga ʻa e ului ki he Fakamoʻuí;
Lahi ange ʻetau malava mo e fakaʻaiʻai ke ako mo fakatomalá koeʻuhi ko e mahino ko hai kitautolu, feituʻu naʻa tau haʻu mei aí, mo ha vīsone mahino ange ʻo e feituʻu ʻoku tau fakataumuʻa ki aí;
Tupulaki e ngaahi ivi tākiekina ʻo e fakaleleí, fakamāʻoniʻoniʻí, mo e mapuleʻí ʻi hotau lotó,
Tupulaki e fiefiá ʻi he malava lahi ange ke ongoʻi e ʻofa ʻa e ʻEikí;
Tupulaki e ngaahi tāpuaki fakafāmilí, neongo pe ko e hā hotau tūkunga fakafāmili he lolotongá, kuohilí, mo e kahaʻú pe taʻe-kakato ʻetau ʻakau fakafāmilí;
Tupulaki e ʻofa mo e fakahoungaʻi ʻetau ngaahi kuí mo e kāinga kei moʻuí, koeʻuhí ke ʻoua naʻa tau toe ongoʻi taʻelata;
Tupulaki e mālohi ke ʻiloʻi e taha ʻoku fie maʻu ke fakamoʻuí, pea ʻi he tokoni ʻa e ʻEikí, tokoniʻi e niʻihi kehé;
Tupulaki e maluʻi mei he ngaahi ʻahiʻahí pea mo e ivi tākiekina lahi fau ʻa e filí; pea mo e
Tokoni lahi ange ke fakaleleiʻi e ngaahi loto palopalemá, laveá, pe hohaʻá pea mo fakamoʻui ʻa e kafó” (“Hisitōlia Fakafāmilí mo e Ngāue Fakatemipalé: Silá mo e Fakamoʻuí,” Ensign pe Liahona, Mē 2018, 47).