Fakaʻilekitulōnika Pē: Kakai Lalahi Kei Talavoú
Ngaahi Lēsoni ʻe Fā ʻo e Māmá ki he Ngaahi Taimi Fakapoʻulí
Lolotonga ʻa e maluʻaki mai ʻa e mahaki fakaemāmani lahí ʻo hangē ha konga ʻao fakapōpōʻuli ʻi he māmaní, ʻoku kei ʻi ai pē ha ngaahi founga ke hū mai ai ʻa e māmá.
ʻOku nofo ʻa e tokotaha naʻá ne faʻú ʻi Volonesi ʻOpalasi, Lūsia.
Lolotonga haʻaku luelue mo ʻeku kulií kimuí ni mai, naʻá ku fakatokangaʻi atu ha konga ʻao lanu kulei ʻoku tutui mai ai ʻa e ngaahi huelo ʻo e laʻaá. Naʻá ne fakamanatu mai kiate au ʻa e mahaki fakaemāmani lahi ʻoku lolotonga hokó. Neongo ʻe hā ngali fakapōpōʻuli mo fakataʻelata ʻa e ngaahi tūkungá ʻo hangē ko e konga ʻaó, ka ʻoku toe mālohi ange ʻa e ʻofa ʻa e ʻEikí ʻiate kitautolu ʻo hangē ko e laʻaá.
ʻOku ʻi ai ha konga lea faka-Pilitānia ʻiloa ʻoku faʻa taku ʻo pehē, “ʻOku ʻi ai e laine siliva ʻi he konga ʻao kotoa pē,” ʻa ia ko hono ʻuhingá, ʻoku malava ke akoʻi mai ʻe he faingataʻa kotoa pē ha meʻa ʻoku ʻaonga. ʻI heʻeku fakakaukau ki he meʻa naʻá ne tokoniʻi au ke u nonga lolotonga e ngaahi māhina siʻi kuohilí mo e ngaahi meʻa ne ʻikai ke loko tokoní, naʻá ku fakatokangaʻi ʻoku ʻi ai ha ngaahi moʻoni mahuʻinga ʻe fā ʻoku ou ongoʻi ʻe hokohoko atu ʻene tāpuekina ʻeku moʻuí ʻo ka hili e ʻosi ʻa e faingataʻa ko ʻení.
1. ʻOku ʻI Ai ʻa e Malu ʻi he Muimui ki he Palōfitá
Naʻe hoko ʻa e ngaahi fakamatala ʻi he mītia fakasōsialé fekauʻaki mo e ngataʻanga ʻo māmaní mo e ngaahi ongoongo loi fekauʻaki mo e ngaahi founga ke fakaʻauha ʻaki e vailasí, ke ʻikai ke u ongoʻi leleiʻia ʻi he moʻuí. Neongo naʻe fakataumuʻa e ngaahi pōpoakí ni ke tokoni ki he kakaí ke nau nofo malu mo moʻui lelei, ka ne nau ʻai ke u ilifia lahi ange ʻi he tuʻunga ne u ʻosi ʻi aí. Hangē ko ʻení, ʻi he hili pē ʻeku lau e talanoa hono ono fekauʻaki mo e ngaahi sipaisi ʻoku pehē te ne lava ʻo tamateʻi ʻa e kolona vailasí, naʻá ku manatuʻi ʻeku hohaʻa pe naʻe lahi nai e sipaisi ʻi he loki tukuʻanga meʻakaí, ʻo kehe ia mei heʻeku fifili pe ʻoku ofi nai hoku ʻaho maté.
Lolotonga e konifelenisi lahi ʻi ha ngaahi taʻu siʻi he kuohilí, naʻe fakaafeʻi kitautolu ʻe Palesiteni Lāsolo M. Nalesoni ke tau kau atu ki ha ʻaukai ʻaho-10 mei ha faʻahinga mītia pē ʻokú ne ʻomi ha ngaahi fakakaukau ʻoku kovi mo taʻemaʻa ki he ʻatamaí.1 Naʻe ongo mai ʻene faleʻí ʻo hangē ha fakatokanga kiate aú, ko ia ai naʻá ku taʻofi leva hono fakaʻaongaʻi ha ʻū polokalama mītia fakasōsiale ʻe niʻihi, ʻa ia naʻá ne toʻo ʻa e konga lahi ʻo hoku taimi ʻataá. Ne u fiefia ange ai pea siʻisiʻi ange mo ʻeku loto-tailiilí.
ʻI he taimi ní, ʻoku ou fakatokangaʻi ʻoku toe fie maʻu pē ke u liliu ʻeku ngaahi tōʻonga fakaʻaongaʻi ʻo e meʻa fakaʻilekitulōniká. ʻOku ou sio kimui ʻo ʻohovale mo fifili: Naʻe ʻiloʻi nai ʻe Palesiteni Nalesoni ʻi he taimi ko iá ʻe lava ke hoko ʻa e mītia fakasōsialé ko ha maʻuʻanga ia ʻo e mamahi mo e fakalotosiʻi ʻi he ʻahó ni, lolotonga e taimi faingataʻa ko ʻení? ʻOku ʻi ai ʻa e malu moʻoni ʻi he muimui ki he palōfitá. ʻOku hangē ʻa e lea ʻa hotau kau taki ʻi he Siasí ko ha huelo ʻo e laʻaá, ʻokú ne tutui mai ʻi he puputuʻú pea fakamaama ha hala ki he nongá.
2. ʻOku Fakafepakiʻi ʻe he Mateuteú ʻa e Manavaheé
Ko ha meʻa ʻe taha ʻoku ou ongoʻi taʻefiemālie ai ko e fanongo ki he kakaí ʻoku nau manukiʻi e niʻihi kehé, hangē ko e kuonga ʻo Noá, ʻi heʻenau tokateú mo e fakamātoató. ʻOku ou tui kuo fakatupulaki ʻe ha kakai ʻe niʻihi ha ngaahi tōʻonga taʻetokanga kau ki he kahaʻú. Ko kinautolu ʻoku poto moʻoní ʻoku nau muimui ki he faleʻi ʻa e kau palōfitá pea feinga fakamātoato ke lava ʻo moʻui fakafalala pē kiate kinautolu.
ʻI ha laui taʻu lahi, kuo akoʻi kitautolu ʻe he kau taki ʻo e Siasí ke ʻoua naʻa ʻi ai haʻatau moʻua, ke tau ako fakaʻatamai ke lava ʻo tauhi pē kitautolu mo e niʻihi kehé, ke tānaki ha meʻakai mo e vai, pea fakahaofi mo ha paʻanga ʻo ka lava. ʻOku ou ʻiloʻi ʻoku kehekehe ʻa e tūkunga kotoa pē, pea ʻoku ʻi ai e ngaahi fonua ʻoku ʻikai ke nau fakaʻatā ʻa e kakai ʻo e fonuá ke nau tauhi ha meʻakai pe ʻū koloa fakatuʻasino kehe. Ka naʻa mo e ngaahi fakangatangata pehení, ʻoku hangē ʻoku ʻi ai pē ha meʻa te tau lava ʻo fai ke tau toe mateuteu ange ai ki he kahaʻú.
ʻOku ou toe ongoʻi malu ange ʻi he taimi ʻoku ou feinga ai ke talangofua pea lava ʻo hū ki he ʻEikí ʻi he loto-falala ʻi he taimi ʻoku ou kole tokoni aí. ʻOku hangē pē ʻa e teuteu ia ko ʻení ko ha foʻi huelo ʻe taha ʻo e laʻaá, ʻokú ne tutui atu ʻa e manavaheé kae huluʻi mai ʻa e ʻamanaki leleí.
3. ʻOku Fai ʻe he ʻUlungāngá ha Liliu
Kuo hoko ʻa e mahaki fakaemāmani lahi ko ʻení ke u houngaʻia ange ai ʻi he kakai ʻoku nau poupouʻi au ʻaki e ngaahi pōpoaki langaki moʻuí, ngaahi ʻilo fakalaumālié mo e tukuhua ʻoku leleí. ʻOku fakafiefiaʻi maʻu pē ʻe he ngaahi kaungāmeʻa ʻofa ko ʻení ʻa hoku ʻahó. ʻOku nau fakamanatu mai kiate au te tau lava pē ke fili ʻa e founga te tau tali ʻaki ha meʻa pē ʻoku hoko ʻi hotau ʻātakaí.
Naʻá ku feinga ke muimui ki he sīpingá ni ʻi he taimi naʻe taʻofi fakataimi ai e ngaahi fakatahaʻanga ʻa e Siasí. Ne ʻikai te u tukulolo ki heʻeku ngaahi fehuʻi taʻefakakaukau ʻo e “ko e hā hono ʻuhingá” mo e “ʻe founga fēfē,” ka naʻá ku fili ke nofotaha ʻi he ngaahi tafaʻaki lelei ʻo e fakatefito ʻi ʻapi ʻa hono ako ʻo e ongoongoleleí. ʻOku lava ke u ʻiloʻi he taimí ni, ko hono lehilehiʻi pau ko ia ha ʻulungaanga ʻoku leleí, neongo ʻene faingataʻa ʻi ha ngaahi taimí, ʻokú ne tokoniʻi au ke u mālohi fakalaumālie ʻo laka ange ʻi he tuʻunga ne u mei ʻi aí kapau ne u tuku pē ke lōmekina au ʻe he loto-ʻitá. ʻE lava ʻe ha ʻuluangaanga lelei ʻo huʻi atu ʻa e loto-veiveiuá pea fakafoʻou ʻa hotau laumālié, ʻo hangē ha huelo hono tolu ʻo e laʻaá.
4. Ko e Laumālie Māʻoniʻoní ko ha Tokoni Mālohi
ʻI ha ʻaho ʻe taha ne u ongoʻi loto-mamahi mo tuenoa ai, ne u fakakaukau ke u fanongo ki he sēnolo Kuaea ʻa e Tāpanekalé ʻi he ʻinitanetí. ʻOku tokoni maʻu pē ʻa e mūsiká ke u ongoʻi ʻa e tākiekina ʻa e Laumālie Māʻoniʻoní. Naʻe ʻi ai ha fepōtalanoaʻaki hangatonu (live chat) ʻi he sēnoló, pea naʻe fakafiefia ke mamata ki he kakaí ʻoku nau fakahaaʻi ʻenau ʻofa mo e houngaʻia mei he tapa kotoa ʻo e māmaní! Ne u ongoʻi taha mo kinautolu. ʻI hono fakafiemālieʻi ʻe he ivi tākiekina ʻo e Laumālie Māʻoniʻoní ʻa hoku loto-mamahí, ne u ongoʻi fiefia mo nonga ange.
Kuo tā tuʻo lahi ʻa ʻeku mātātonu kapau te u feinga ke fakaafeʻi e Laumālie Māʻoniʻoní ki heʻeku moʻuí, te Ne tokoniʻi au ʻi ha faʻahinga meʻa pē te u fie maʻu. Ko ha tokoni mālohi Ia ʻokú Ne vēkeveke ke ʻomi kiate kitautolu ʻa e ngaahi meʻaʻofa ʻo e melinó, fiemālié, mo e mahinó. Te Ne lava ʻo tekeʻi atu ʻa e fakapoʻulí kae fakahā mai ʻa e meʻa ʻoku moʻoní, ʻo hangē ha huelo ʻo e laʻaá.
Kumi ʻa e Maama ʻo e Laʻaá
ʻOku mālohi ange ʻa e ʻEikí ʻi ha faʻahinga faingataʻa pē. Hangē ko e lau ʻa e veesi ua ʻo e himi 45:
Ko e ʻEikí ko ʻeku maama; [neongo ka ʻalu hake ʻa e ʻaó],
[ʻOku hanga hake ki he langí ʻa e Tuí, ʻa ia ʻoku mālohi ange ʻi he matá pē]
[ʻA ia ʻoku pule ai ʻa Sīsū ʻo taʻengata ʻi he nāunauʻia.]
[Ko e hā leva ka u ka toe nofo ai ʻi he fakapoʻulí]?2
ʻOku ou fakaʻamu naʻe lava ke tau ʻeveʻeva fakataha ʻi he ʻahó ni. Te tau lava ʻo vakai hake ki he langí, māfana ʻi he maama ʻo e laʻaá, pea talanoa fekauʻaki mo e ngaahi moʻoni ʻokú ne fakamaamaʻi ʻetau moʻuí. ʻOku ou ʻiloʻi fakapapau ʻe ʻi ai hamou ngaahi fakakaukau lelei ki hono vahevahe atu ʻa e maama ko iá mo e niʻihi kehé. Mahalo ʻe lava ke mou fakakaukauloto ki ha ʻeveʻeva peheni ʻi he taimi ʻe tuʻunuku mai ai ha ngaahi matangi fakaeloto ʻi he tafatafaʻaki langí ʻOku kau ʻa e ʻEikí mo kitautolu, pea ʻoku ʻikai fie maʻu ke tau ilifia.