Ko ha Pōpoaki Makehe ki he Ngaahi Taimi Faingataʻá

Fakalahi ki he Liahona ʻo Mē 2020

fefine ʻoku ako folofola

Kuo uesia kotoa kitautolu ʻe he mahaki pipihi kimui ní mo e ngaahi faingataʻa kehe ʻi he funga ʻo e māmaní. ʻOku mahino ʻe ala fakatupu ʻe he ngaahi fakatuta ko ʻení ha ngaahi ongo ʻo e loto taʻefiemālie, hohaʻa mo e tailiili. Ka kuo teʻeki siʻaki kitautolu ʻe he ʻOtuá. Te Ne lava ʻo tokoniʻi kitautolu ke tau laka atu ki muʻa ʻi he tui.

Mateuteu ki he Ngaahi Taimi Faingataʻá

“Ko ia, ko au ko e ʻEikí, ʻi heʻeku ʻiloʻi ʻa e fakatuʻutāmaki ʻa ia ʻe hoko mai ki he kakai ʻo e māmaní, naʻá ku ui ai ki heʻeku tamaioʻeiki ko Siosefa Sāmita, ko e Siʻí, peá u lea kiate ia mei langi, mo fai kiate ia ʻa e ngaahi fekau” (Tokāteline mo e Ngaahi Fuakava 1:17).

ʻOku kei hokohoko atu pē ʻi he ʻahó ni e sīpinga ʻo e fakahā ʻo e fakahinohinó. Kuo teuteuʻi kitautolu ʻe he ʻEikí ki ha ngaahi meʻa hangē ko ʻení ʻo fakafou ʻi he kau palōfita ʻo onopōní, kau ai hotau taki lolotonga ko Palesiteni Lāsolo M. Nalesoní.

Naʻe toki fakamoʻoniʻi ʻe he palōfitá ʻi ha foʻi vitiō he ʻinitanetí, “ʻOku tau moʻuí ʻi ha taimi fakaofo ʻoku tau toutou mātā ai e toʻukupu ʻo e ʻEikí ʻi he moʻui ʻa ʻEne fānaú. “ʻOku ʻafioʻi, ʻofaʻi mo tokangaʻi kitautolu ʻe heʻetau Tamai Hēvaní mo Hono ʻAlo ko Sīsū Kalaisí.”

ʻOku ʻomi ʻe he ngaahi faingataʻa ko ʻení ha faingamālie ke tau fakaʻaongaʻi e meʻa kuo tau ako fekauʻaki mo e moihū ʻi he ongoongolelei ʻoku fakatefito-ʻi-ʻapí. Te tau lava ʻi he loto fie ngāue fakaetauhí, ʻo alanima atu ʻi he manavaʻofa kiate kinautolu ʻi hotau ʻātakaí.

Melino ʻia Kalaisí

ʻI he ngaahi meʻá ni kotoa, ʻoku foaki mai ʻe he ʻEikí ha melino ʻoku mālohi ange ʻi he loto-hohaʻá.

“ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia” (Sione14:27).

ʻOku ʻoatu ʻi lalo ha ngaahi maʻuʻanga tokoni ʻa ia ʻoku mau ʻamanaki ʻe tokoni atu ʻi hoʻo fehangahangai mo e ngaahi faingataʻa ʻo e ʻaho ní. ʻIloʻi ʻoku ʻofaʻi koe. ʻI heʻetau hoko ko e fānau ʻa e ʻOtuá, te tau ikunaʻi fakataha e faingataʻa ko ʻení.

Ngaahi Fehuʻí mo e Talí

1. Te u maʻu ʻi fē e ngaahi fakahinohino fakamuimuitaha fekauʻaki mo e ngaahi ʻekitivitī ʻa e Siasí?

ʻE toutou ʻoatu ʻi he peesi ʻuluaki ʻa e Siasí (ChurchofJesusChrist.org) e ngaahi fakamatala fakamuimuitaha fekauʻaki mo e ngaahi fakatahaʻanga ʻo e Sāpaté mo e ngaahi ʻekitivitī faka-Siasi kehé. Hangē ko ʻení, kuo kole ʻe he Kau Palesitenisī ʻUluakí ki he kau pīsopé mo e kau palesiteni siteikí ke nau fakakaukauʻi fakataha e founga ke fakaaʻu tuʻo taha ʻi he māhina e sākalamēnití ki he kāingalotú. ʻOku ʻoatu foki ʻi he peesi ʻuluakí ha ngaahi pōpoaki fakafiemālie ʻe lava ke ke fakaʻaongaʻi ke vahevahe e ʻamanaki leleí mo kinautolu ʻoku mou feohí. Manatuʻi ko hoʻo maʻuʻanga tokoni maʻongoʻonga tahá ʻa e Laumālie Māʻoniʻoní, ʻa ia te Ne lava ʻo ʻoatu ha fakahā fakataautaha fekauʻaki mo hono tokoniʻi e kakai ʻokú ke tatakí.

ʻAlu ki he konga “Ngaahi Pōpoaki ʻo e ʻAmanaki Leleí mo e Fakafiemālié” ʻi laló ki ha lisi ʻo e ngaahi fakamatala fekauʻaki mo e mamahí, ko hono tali e finangalo ʻo e ʻEikí, tokoniʻi e fānaú ke nau lava ʻo matuʻuaki, mo ha ngaahi pōpoaki fakafiemālie kehe te ke lava ʻo vahevahe.

2. Te u lava fēfē ʻo ngāue fakaetauhi ki he niʻihi kehé ʻi he malu, lolotonga e taimi ko ʻení?

Kiate kinautolu ʻoku nofo mo e kakai ʻoku nau ʻofa aí, ʻe lava ke fakahoko ʻi hotau ngaahi lotofalé hotau ngaahi ʻapí ha niʻihi ʻo e ngaahi ngāue fakaetauhi mahuʻinga tahá. ʻE lava ke maʻu e ngaahi fokotuʻu ki hono tokoniʻi e toʻu tupú mo e fānaú ʻi he fakaʻosinga ʻo e fakamatala ko ʻení. ʻOku ʻomi ʻe he tekinolosiá ha ngaahi founga kehekehe ke fetuʻutaki ai mo kinautolu ʻoku nofo mavahe mei ʻapí. Telefoni, ʻave ha pōpoaki telefoni, pe kumi ha ngaahi founga kehe ke ke alanima atu ai kiate kinautolu ʻokú ke tokanga ki aí. Makehe mei hono vakaiʻi ʻenau ngaahi fie maʻu fakatuʻasinó, fakakaukau ki he meʻa te ke lava ʻo fai ke tokoni ke nau ongoʻi fehokotaki mo siʻi ange ai ʻenau ongoʻi tuenoá.

ʻOku totonu foki ke fakakaukauʻi ʻe he kau takí ki he founga ʻe lava ke tokoni ai e tekinolosiá ke fakapapauʻi ʻoku feau e ngaahi fie maʻu ʻa e mēmipa takitaha. ʻOku kau ʻi he ngaahi maʻuʻanga tokoni pōpoakí e polokalama Member Tools, Gospel Living app circles, mo e Maʻuʻanga Tokoni ki he Takí mo e Kalaké.

Talu mei Sune ʻo e 2018, kuo fakakau ʻi he Liahona takitaha ha fakamatala ʻo e “Ngaahi Tefitoʻi Moʻoni ʻo e Ngāue Fakaetauhí” ʻe ala ʻaonga atu kiate koe. Hangē ko ʻení, ʻoku vahevahe ʻi he fakamatala ʻi Tīsema 2018 ha ngaahi fakakaukau ki he ngaahi founga kehekehe ke fakahoko ki he niʻihi kehé ʻokú ke tokanga ange. Manatuʻi ʻoku mālohi fau hono lotua ʻo e kakaí ʻaki honau hingoá.

3. Fēfē e konifelenisi lahí?

Kuo fakaafeʻi kotoa kitautolu ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ke tau teuteu mo kau atu ki he konifelenisi lahí. Neongo he ʻikai fakatahataha mai e Kāingalotú ki he Senitā Konifelenisí pe ngaahi fale lotú ʻi he ʻaho 4–5 ʻo ʻEpelelí, ka te tau lava ʻi hono fakaʻaongaʻi e tekinolosiá ʻo fakatahataha mo uouongataha ʻi he laumālie, ʻi heʻetau lau, mamata mo fanongo fakatahá. ʻE tokoni e konifelenisi ko ʻení ke tau manatuʻi mo kātoangaʻi e ʻUluaki Mata Meʻa-Hā-Maí, ʻa ia ne hoko he taʻu ʻe 200 kuo hilí, pea mo e hokohoko atu hono Fakafoki Mai ʻo e Ongoongolelei ʻo Sīsū Kalaisí ʻi he ngaahi ʻaho kimui ní.

Ki ha fakamatala lahi ange kau ki he teuteu mo e kau atu ki he konifelenisí, ʻalu ki he gc.ChurchofJesusChrist.org.

4. Ko e hā e founga lelei taha te u lava ai ʻo moihū ʻo mavahe mei he ngaahi houalotu ʻa e Siasí?

ko ha fāmili ʻoku nau sio ki ha tohi

ʻOku fakaʻaongaʻi ʻe he Kāingalotu ʻi he funga ʻo e māmaní e folofolá, mūsika ʻo e ongoongoleleí, Haʻu, ʻo Muimui ʻIate Aú, ngaahi makasini ʻa e Siasí, Sabbath.ChurchofJesusChrist.org, mo e ngaahi maʻuʻanga tokoni ʻa e Siasí ke fakahoko ʻaki ʻenau ngaahi moihū ʻi he ʻaho Sāpaté. Kuo pehē ʻe ha ngaahi fāmili ʻe niʻihi ʻoku kau e ngaahi fakataha ko ʻeni ʻoku fakatefito ʻi ʻapí he ngaahi aʻusia fakalaumālie taha kuo nau maʻu ko ha fāmilí! Kapau ʻokú ke ongoʻi lōmekina, ʻoua ʻe loto-foʻí. ʻE lelei ke fakafaingofuaʻi pē e meʻa kotoa—ʻe lava ke hoko ha hiva, talanoa mei he folofolá, mo ha fakamoʻoni nounou ko ha aʻusia moihū fakaʻofoʻofa moʻoni.

Ke ako fekauʻaki mo e founga ne moihū ai e Kāingalotu ʻi Kaná mei ʻapi lolotonga hano “taʻofi” ʻo e lotú, vakai, “ ʻE ʻIkai Ke Ke Lava ʻo Taʻofi e Meʻa ʻi Hoku Lotó” (Fēpueli 2018 Liahona).

Ngaahi Pōpoaki ʻo e ʻAmanaki Leleí mo e Fakafiemālié

ʻI hono ʻākilotoa kitautolu ʻe he ngaahi ongoongo fakamamahí, ʻoku fie maʻu ke ʻi ai hatau taimi ke mavahe mei he loto-hohaʻá pea fakamālohia hotau ngaahi laumālié. ʻE lava ʻe he fakamatala ʻi laló ʻo fakaafea e Laumālié mo vakai lelei ki he faingataʻá. Tau mātuʻaki tokanga ki he meʻa ʻoku aʻusia ʻe he fānaú mo e toʻu tupú he ʻaho ní, pea mo ongoʻi ngofua kau ki he ngaahi mamahi ʻoku nau fehangahangai mo iá. ʻI heʻetau hoko ko ha kakai lalahí, ko hotau fatongiá ke ʻoange kiate kinautolu e ngaahi tali mo e tokoni ʻoku nau fie maʻú.

Mei he Ngaahi Konifelenisi ʻo e Kuohilí

• ʻAlu ki he gc.ChurchofJesusChrist.org pea lomiʻi ʻi he “Ngaahi Tefitó” ke faingofua hono maʻu ʻo e ngaahi lea ʻo e kuohilí kuo fakahokohoko fakatatau ki he ngaahi tefitó ʻo hangē ko e fakamoʻuí, loto-houngaʻiá, mo e ʻofá.

Fekauʻaki mo hono Maʻu ha Nongá

• “Nonga ʻi he Moʻuí ni” (Tīsema 2016 Liahona): ʻOku fakamoʻoni ʻa Palesiteni ʻAealingi kau ki he sākalamēnití mo e nonga ʻo e ngaahi talaʻofa ʻa e Fakamoʻuí.

• “Ngaahi Maʻuʻanga ʻo e Nongá mo e Mālohí” (Māʻasi 2019 Liahona): Ko e poupouʻi kitautolu ʻe ʻEletā Kotoi ke tau foaki ki he ʻEikí hotau lelei tahá pea falala ki Heʻene ʻaloʻofá.

• “Ko Hono Maʻu ʻo e Nongá Maʻau mo e Niʻihi Kehé ʻi he Ngaahi Taimi Faingataʻá” (ʻEpeleli 2019 Liahona): Ngaahi fokotuʻu ʻe valu ki hono maʻu mo vahevahe ʻo e nongá.

ʻĪmisi ʻo e Fakamoʻuí, tā fakatātaaʻi ʻe Heinrich Hofmann

ʻĪmisi ʻo Kalaisí, tā fakatātaaʻi ʻe Heinrich Hofmann

“ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia” (Sione14:27).

Fekauʻaki mo e Fehangahangai mo e Ngaahi Fakatamaki Fakanatulá

• “Ngaahi Fakatamaki Fakanatulá—ʻOku ʻIkai Fie Maʻu ke Tau Ilifia” (ʻAokosi 2012 Liahona): Ko e vahevahe ʻe ʻEletā ʻElisi ha ngaahi fokotuʻu ke fakahoko kimuʻa, lolotonga pea ʻi he hili e hoko mai ʻa e ngaahi fakatamakí.

Fekauʻaki mo hono Tali e Finangalo ʻo e ʻEikí

• “Ko Hono Tali e Finangalo mo e Taimi ʻa e ʻEikí” (ʻAokosi 2016 Liahona): Ko e vahevahe ʻe ʻEletā Petinā ha ngaahi talanoa ʻo ha Kāingalotu faivelenga.

• “But If Not” (October 2002 general conference): ʻOku poupouʻi kitautolu ʻe Eletā Uikimani ke ʻoua naʻa tau veiveiua ki he angalelei ʻa e ʻOtuá, naʻa mo e taimi ʻoku hoko ai ha ngaahi meʻa fakamamahí.

Fekauʻaki mo e Loto-mamahí

• “Sunday Will Come” (konifelenisi lahi ʻi ʻOkatopa 2006): ʻOku fakamanatu mai ʻe ʻEletā Uefilini te tau lava ʻo hanganaki atu ki ha fakamoʻui.

Ki hono Tokoniʻi ʻo e Fānaú

• “Fefaʻuhi mo e Mamahí” (ʻEpeleli 2019 Liahona): Ngaahi Maʻuʻanga Fakamatala ke tokoni ki he toʻu tupú mo e fānaú ke nau aʻusia ha tuʻunga lelei mo fakafiemālié.

• “Te u Toe Mamata Kiate Ia” (ʻEpeleli 2019 Liahona): Ko e fakamoʻoni ʻa Sisitā ʻApeto fekauʻaki mo e Toetuʻú. ʻOku ʻi he peesi hono uá ha ngaahi kaati ʻo ha ngaahi kupuʻi lea fakafiemālie.

• ʻAʻahi ki he lessonhelps.ChurchofJesusChrist.org pea lomiʻi ʻi he ngaahi tefito hangē ko e “Tailiilí/Hohaʻá.”

ʻI heʻetau fakakaukau kia Sīsū Kalaisi lolotonga e faʻahitaʻu Toetuʻu ko ʻení, fakatauange ke tau manatuʻi ʻokú Ne ʻafioʻi ʻetau ngaahi faingataʻaʻiá, mamahí mo e vaivaiʻangá. ʻOkú Ne ʻofa ʻiate kitautolu pea ʻokú Ne feʻao maʻupē mo kitautolu.

Vakai, Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná, 54–57.