Te u Toe Mamata Kiate Ia

fai ʻe Reyna I. Aburto

Tokoni Ua ʻi he Kau Palesitenisī Lahi ʻo e Fineʻofá

Naʻá ku tupu hake ʻi Nikalākuá. ʻI heʻeku kei siʻí, naʻá ku fai e meʻa kotoa pē mo hoku tokoua lahí. Ne ma lue fakataha ki he akó. Ne mau lue fakataha ki fale koloa. Ne ma fakahoko e kalasi kehekehe kotoa pē ʻo e fanga kiʻi meʻa foʻoú ʻi he konga kimui homau ʻapí. Naʻá ma fiefia.

Pea, ʻi heʻeku taʻu hivá, naʻe hoko ha meʻa fakamamahi ʻaupito. Naʻe mālōlō hoku tuongaʻané ʻi ha mofuike. ʻI he kamataʻangá, ne ngali taʻe moʻoni kuó ne mole atu ia. Ne u faʻa fakakaukau ʻe tukituki mai ʻi homau matapā muʻá. Te ne talamai naʻe ʻalu pē ia ki ha feituʻu mamaʻo. Ne u faʻa nofo ʻo siofi e matapaá, mo fakaʻamu pe ke hoko ʻo pehē. Ne u loto moʻoni ke u toe sio kiate ia.

ʻI he fakalau ʻa e taimí, ne ʻalu pē ke kiʻi faingofua ange. Naʻá ku kei ʻofa pē ki hoku tuongaʻané, ka naʻe lava ke u toe ongoʻi fiefia pē.

ʻI he taimi ko iá, ne ʻikai ke u hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka ʻi heʻeku kei tupu haké, naʻá ku ako fekauʻaki mo e Siasí peá u papitaiso. ʻI he ʻaho ʻe taha naʻá ku fufulu ai ʻeku ʻū peletí. Ko e taimi Toetuʻú ia. Naʻá ku fakakaukau ki he Toetuʻú mo hoku tuongaʻané.

Ne fakafokifā pē ʻeku maʻu ha ongo. Ne u manatuʻi ʻeku fakaʻānaua fekauʻaki mo hoku tuongaʻané. Naʻá ku fakatokangaʻi ne ʻikai ko ha meʻa laulaunoa ia! Naʻe haʻu ia mei he Laumālie Māʻoniʻoní, ke fakafiemālieʻi mo tataki au. ʻE toetuʻu moʻoni hoku tuongaʻane ʻi ha ʻaho. Pea te u toe mamata tonu kiate ia.

Kapau kuo pekia ha taha ʻokú ke ʻofa ai, ʻoku SAI pe ia ke ke ʻofa kiate kinautolu mo ongoʻi loto mamahi. Talanoa ki ho fāmilí pe taha matuʻotuʻa ʻi he taimi ʻokú ke ongoʻi mateuteu aí. Lotu ki he Tamai Hēvaní fekauʻaki mo e meʻa ʻokú ke ongoʻí. Te Ne tokoniʻi koe ke ke toe ongoʻi nonga.

Neongo pe ko e hā, manatuʻi ʻoku ʻofa ʻa Sīsū Kalaisi ʻiate koe. ʻOku tau manatu ki Heʻene feilaulau maʻatautolú ʻi he taimi Toetuʻú. Koeʻuhí ko Ia, te tau toetuʻu kotoa mo tau nofo fakataha mo hotau ngaahi fāmilí ʻo taʻengata.

Ngaahi Kaati Fakanonga

Kosi e ngaahi kaati ko ʻení. Te ke lava ʻo peluki vaeua ia pē ngāue ʻaki ia ko ha fakaʻilonga tohi laukonga (bookmarks). Tauhi ia ʻi hoʻo folofolá pe ʻi ha feituʻu kehe ke ke sio ki ai ʻi hoʻo ongoʻi loto mamahí, liʻekiná pē manavaheé.

“ʻE ʻikai te u tuku ke tuenoa ʻa kimoutolu: te u haʻu kiate kimoutolu.”

Sione 14:18

“Pea ʻe holoholo ʻe he ʻOtuá ʻa e loʻimata kotoa pē mei honau matá.”

Fakahā 21:4

“Ko ia, ke mou fiefia, pea ʻoua ʻe manavahē, he ko au ko e ʻEikí ʻoku ou ʻiate kimoutolu, pea te u tuʻu ʻi homou tafaʻakí.”

Tokāteline mo e Ngaahi Fuakava 68:6