Mei he Kau Palesitenisī ʻUluakí
Ko e Meʻaʻofa Maʻongoʻonga ʻa e ʻOtuá
Fai ʻe Palesiteni Russell M. Nelson
Mei he “Fakafetaʻi ki he ʻOtuá,” Liahona, Mē 2012, 77-80.
Ne ma fakaʻofoʻofaʻia mo Sisitā Nalesoni ʻi ha ʻaho ʻe taha ʻi he fanga kiʻi ika mei he talopikí ne tuku ʻi ha kiʻi puha sioʻata. Ko ha fanga ika lanu maama mo fuo kehekehe mo lalahi kehekehe ne nau felēleaki holo aí. Ne u ʻeke ki ha tokotaha ngāue ne ofi mai, “Ko hai ʻokú ne fafanga e fanga ika fakaʻofoʻofa ko ʻení?”
Naʻá ne tali mai, “Ko au.”
Ne u ʻeke ange leva, “Kuo nau fakamālō tuʻo taha atu?”
Tali mai ʻe ia, “Teʻeki ai!”
ʻOku ʻi ai ha kakai ʻe niʻihi ʻoku hangē ko e fanga ika ko iá. ʻOku ʻikai ke nau ʻiloʻi e ʻOtuá mo ʻEne ʻaloʻofa kiate kinautolú. Hono ʻikai lelei ange kapau te tau maʻu kotoa ha mahino lahi ange ki he ʻofa ʻa e ʻOtuá pea tau fakahaaʻi ʻetau loto houngaʻiá kiate Ia.
Fakahoungaʻi ʻa Sīsū Kalaisi
Ne fekauʻi mai ʻe he ʻOtuá Hono ʻAlo ko Sīsū Kalaisí, ke tokoniʻi kitautolu. Naʻá Ne fai ia koeʻuhi ko ʻEne ʻofa lahi ʻiate kitautolú.
Naʻe hāʻele mai ʻa Sīsū ke huhuʻi kitautolu.
Koeʻuhi ko ʻEne Fakaleleí, te tau lava ai ʻo toetuʻu hili ʻetau maté.
Koeʻuhí ko ʻEne Toetuʻú, te tau lava ai ʻo foki ʻo nofo taʻengata mo ʻetau Tamai Hēvaní.
Naʻe folofola ʻa Sīsū ʻo pehē:
“Ko au ko e toetuʻu mo e moʻui; ko ia ʻoku tui kiate aú, ka ne mate ia, ʻe moʻui pē ia; pea ko ia ʻoku moʻui mo tui kiate aú ʻe ʻikai ʻaupito mate ia” (Sione 11:25–26).
Ko e pōpōaki fakaofo ʻeni ʻo e Toetuʻú!
Ko Sīsū Hoku Fakamoʻuí
Naʻe toetuʻu ʻa Sīsū ʻi he pongipongi Toetuʻú. Lau e ngaahi sētesí ke ke ʻilo e meʻa kuó Ne fai maʻatautolú. Valivali e huelo ʻo e laʻaá hili hoʻo lau e sētesi takitaha. Pea valivali e toenga ʻo e ngaahi fakatātaá.
-
Naʻe mamahi ʻa Sīsū ʻi Ketisemani pea ʻi he kolosí ke fakahaofi kitautolu mei heʻetau ngaahi angahalá.
-
Naʻe pekia ʻa Sīsū pea toetuʻu ke fakahaofi kitautolu mei he maté.
-
Ne ʻomi ʻe Sīsū e sākalamēnití ke tokoniʻi kitautolu ke tau manatuʻi Ia.
-
Naʻe akoʻi kitautolu ʻe Sīsū ke tau fakamolemoleʻi e niʻihi kehé.
-
Naʻe fakahā mai ʻe Sīsū e founga ke tau angaʻofa aí.
-
Koeʻuhí ko Sīsū, te tau toetuʻu kotoa hili ʻetau maté.