“Ko ʻEni Ia!”
Richard J. Anderson
Utah, USA
Tā fakatātaaʻi ʻe John Kachik
Ne u aʻu atu ki ʻapi kuo fuoloa e poʻulí hili ia hono fakahoko ha ngaahi ʻinitaviu lahi ko ha pīsope. Ne u ongosia. Naʻe fakamafasia e ngāué ʻi ha ngaahi uike lahi, pea ne u ongoʻi ne lahi ange e ngaahi fatongia fakafāmili mo faka-Siasí ʻi he meʻa ʻoku ou lavá.
ʻI he efiafí ko iá, naʻe pau ke u ngaohi ʻeku kaá ke u lava ʻo ʻalu ki he ngāué he ʻaho hono hokó. ʻI heʻeku tui hoku ʻovaloló, ne liliu hoku ngaahi fatongia mei he pīsopé ki ha tokotaha ʻenisinia. Ne u tokoto he faliki sima momokó ʻi he lalo kaá ʻo kamata ngāue. Ko e hā ʻoku fie maʻu ai ke u mokosia, helaʻia, mo ongosia hili iá kuó u ʻosi ngāue mālohi he ʻaho ko iá? Naʻe siʻi ʻeku kātakí peá u kamata lāunga, ʻo tautapa ki he Tamai Hēvaní ʻi ha lotu.
“ʻE malava nai ke Ke kiʻi tokoni mai kiate au?” Ko ʻeku kolé ia. “ʻOku ou feinga hoku lelei tahá ke u hoko ko ha tamai, husepāniti, mo ha pīsope lelei pea ke moʻui ʻaki e ngaahi fekaú. Te u ngāue lelei ange kapau te u maʻu ha kiʻi mālōlō? Fakamolemole ʻo tokoni mai ke fakaʻosi ʻeni kau ʻalu ʻo mālōlō.”
Naʻe faifai pea haʻu ki heʻeku fakakaukaú ha foʻi lea mahino ʻe tolu: “Ko ʻeni ia!”
“Ko e hā?” Ko ʻeku talí ange ia.
Ne toe haʻu ki heʻeku fakakaukaú e ngaahi foʻi leá: “Ko ʻeni ia!”
Naʻe kamata ke haʻu ʻa e mahinó ki heʻeku fakakaukaú mo hoku lotó ʻi he taimi naʻe ongo tuʻo tolu mai ai e ngaahi leá: “Ko ʻeni ia!” Naʻe ʻomi ʻe he ngaahi lea ko ʻení ha pōpoaki ki hoku laumālié. Ko e moʻui fakamatelié “ia”, pea ne u aʻusia ha mōmeniti ʻo e tupulakí ʻa ia naʻe fokotuʻutuʻu ke ne tokoniʻi au ke u hokosia e tuʻunga ʻoku finangalo ki ai ʻa e Tamai Hēvaní. Naʻe hangē ia ne pehē mai e Laumālié kiate au, “Naʻá ke pehē he ʻikai ʻi ai ha ngaahi faingataʻa ʻi he fononga fakamatelie ko ʻení?” ʻI he taimi ne u tuʻu hake ai mei he laʻisima momoko ko iá, kuó u liliu.
Fakatatau mo e founga ʻetau tali e ngaahi faingataʻá, ʻe lava ke tau sio ki ai ko ha ngaahi meʻaʻofa mei ha Tamai Hēvani ʻofa. ʻOkú Ne ʻomi maʻatautolu ʻa e faingamālie ke fehangahangai mo e ngaahi faingataʻá kae lava ke tau ako ke tafoki kiate Ia. ʻI heʻetau fai iá, ʻoku tāpuekina ʻaki ai kitautolu ʻa e ʻiló mo e tupulaki fakalaumālié.
Kuo faitāpuekina au ʻe he ngaahi foʻi lea ʻe tolu ne haʻu ki heʻeku fakakaukaú he pō momoko ko ia ʻi he laʻisima ʻeku tauʻanga meʻalelé ʻo laka hake ʻi ha taʻu ʻe 35. ʻOku ou feinga mālohi ke u sio ʻoku ʻikai hoko noa pē ha faingataʻa. ʻOku ou vakai ki he ngaahi faingataʻá ko ha ngaahi faingamālie ke ako e ngaahi meʻa he ʻikai ke u lava ʻo ako ʻi ha toe faʻahinga founga kehe.