Ongoʻi Foʻou
ʻOku nofo ʻa e tokotaha naʻá ne faʻú ʻi Tekisisi, USA.
ʻEsitōnia
ʻOku ʻi ai ha meʻa fakafiefia ke u talaatu!” Ko e lea ange ia ʻa ʻEma (faʻē) ʻi heʻene ʻave ʻa Leimasi mei he akó. Ne na lue fakataha atu ʻi he ngaahi hala fāsiʻi ne ʻotu ai e ʻū fale lanu kehekehé.
“Te tau kai salati Rosolje ʻa efiafi?” He naʻe fakaʻamu pehē ʻa Leimasi. Ne nau kai ia ʻi he uike kuoʻosí ʻi hono ʻaho fāʻeleʻi taʻu fitú. Ka naʻá ne manako ke kai maʻu pē ʻa e salati patetá ʻaki ʻa e ika faʻo hiná.
Naʻe kalokalo ange ʻa ʻEma mo malimali. “Ne u fetaulaki mo ha ongo finemui ʻe toko ua ʻi he pasí he pongipongí ni. Ongo Faifekau. ʻOkú na haʻu he efiafí ni ke talanoa fekauʻaki mo hona siasí.”
Naʻe sio fakafehuʻi hake ʻa Leimasi. Kuo teʻeki ke ne fetaulaki mo ha ongo faifekau.
Naʻá ne ʻi hono lokí ʻo vaʻinga mo ʻene kiʻi loli tāmate afí ʻi he haʻu ʻa e ongo faifekaú. “Tere! Tere! Mālō e leleí!” ko ʻena fakafeʻiloaki ia kia ʻEma ʻi heʻena hū ki he loto fale nofo totongi. Ne na vete hona ongo puti mamafá pea tui e ngaahi silipa fale ne tuku ʻe ʻEma ki he kau ʻaʻahí. Naʻe taki kinaua ʻe ʻEma ki he sea sofa lanu molí. Ka naʻe fakasiosio mai ʻa Leimasi mei he matapaá.
Naʻe fakatokangaʻi atu ia ʻe he fefine lōloa angé mo malimali. Naʻe ʻasi ʻi hono pine hingoá ʻa e Õde Craig (Sisitā Keleki). Naʻá ne pehē ange, “Talamai ʻe hoʻo faʻeé naʻe toki hoko pē ho ʻaho fāʻeleʻí.” “Ne ma ʻomi ha meʻa maʻau.” Naʻá ne toʻo hake ha kiʻi kaati siʻisiʻi. Naʻe sio fakalelei ki ai ʻa Leimasi.
Ko ha fakatātā ʻo ha tangata. Naʻá ne tui ha kofu tōtōlofa lanu hinehina, pea naʻe mafao mai hono ongo nimá.
“ʻOkú ke ʻilo ko hai ia?” Ko e fehuʻi ange ia ʻa Õde Craig.
Naʻe ʻikai ʻilo ʻe Leimasi e hingoa ʻo e tangatá. Kuo teʻeki ke ne sio he fakatātā ko ʻení kimuʻa. Ka naʻe fofonga angalelei mo mālohi ʻa e tangatá. “ʻOku ou fakakaukau ko ha tuʻi ia!” Ko e tali ange ia ʻa Leimasí.
Naʻe malimali e ongo faifekaú. “ʻIo, ko e moʻoni! Ko e Tuʻi Ia ʻo e Ngaahi Tuʻí! Ko hono hingoá ko Sīsū Kalaisi.” Naʻe toʻo hake ʻe Õde Craig ha tohi takafi lanu pulū. “Pea ko e tohi ʻeni ʻoku akoʻi ai fekauʻaki mo Iá, ko e Mormoni Raamat. Ko e Tohi ʻa Molomoná.”
Naʻá ne kamata lau mo ʻEma e Tohi ʻa Molomoná he ʻaho kotoa pē kimuʻa pea ʻalu ki he akó. Lolotonga e akó, naʻe luelue ʻa Leimasi ʻi tuʻa pea fetongi ʻo tui ha vala mohe ke kiʻi mālōlō taimi siʻi ʻi he hoʻataá. ʻI he tuku ʻa e akó, naʻá ne faʻa fakataha mo ʻEma mo e ongo faifekaú. Ne na talanoa mo e ongo faifekaú fekauʻaki mo e meʻa kuó na lau ʻi he Tohi ʻa Molomoná. Taimi ʻe niʻihi ne fafanga ʻe ʻEma e tokotaha kotoa ʻaki ʻa e mā sinamoni vilovilo kilingikoló. ʻI he fakaʻosinga ʻo e ngaahi uiké, te na heka pasikala mo ʻEma pe te na kaimeʻakai he veʻe matātahí. Taimi ʻe niʻihi te na lue ʻi he vaotaá pe ʻi he veʻe vaitafe ʻokú na manako taha aí.
ʻI ha taha ʻo e ngaahi lue ko ia ʻi he vaotaá, naʻe talaange ʻe ʻEma ki ai ʻokú ne fie papitaiso. Naʻe malimali ʻa Leimasi. Naʻe kole ange ʻe he ongo faifekaú kia ʻEma ke lotu pe ʻe papi pe ʻikai. Ne ngali hangē kuó ne maʻu ʻa e talí!
Pea naʻá ne talaange mo malimali pē, “Pea ʻoku ou ʻilo ʻa e feituʻu ke u papi aí.” “Te ke lava ʻo mateʻi mai?”
Naʻe fakakaukau ʻa Leimasi ki he lēsoni ʻa e ongo faifekaú fekauʻaki mo e papitaisó. Ne na puke hake ha lauʻi tā ʻo Sīsū mo Sione Papitaiso ʻi ha vaitafe. …
Naʻá ne kalanga, “Ko e vaitafé!” “Ko e vaitafe ʻokú ta manako taha aí.”
Hili ha uike ʻe taha, naʻe tuʻu ʻa Leimasi ʻi he veʻe vaitafé mo e ongo faifekaú mo ha kakai kehe mei he siasi. Naʻe mateuteu ʻa ʻEma ke papitaiso ia. Naʻe fakauku ia ʻo puli kotoa ki he vaí, ʻo hangē pē ko Sīsū Kalaisí. ʻI heʻene tuʻu haké, naʻá ne malimali. Naʻe loto ʻa Leimasi ke ne manatuʻi e mōmeniti ko iá ʻo taʻengata—ʻa e vai lanu puluú, ʻa e ngaahi matalaʻi ʻakau hinehina ʻi he musie lanu maʻuiʻuí, mo e fofonga malimali ʻene faʻeé.
Naʻá ne fehuʻi kimui ange ʻi he taimi naʻe kai ai ʻe he tokotaha kotoa e kūkisi naʻe ʻomi ʻe he ongo faifekaú, “Naʻe fēfē ʻa e ongo ʻi he papitaisó?”
Naʻá ne talaange, “Fakaʻofoʻofa.” “Ne u loto ke u nofo ʻi he vaitafé ʻo taʻengata. ʻOku ou ongoʻi ha moʻui foʻou ʻaupito!” Naʻá ne fāʻofua kiate ia.
Naʻe talaange ʻe Leimasi ki heʻene faʻeé, “ʻOku ou fie maʻu ʻi hoku faiʻaho hokó ke u papitaiso, ʻo hangē pē ko koe mo Sīsuú.” “ʻOku ou fie ongoʻi foʻou pē mo au!”