Ko Hotau Ngaahi ʻApí, Hotau Ngaahi Fāmilí
Ko Hota Fohá ko e Foha ia ʻa e Tamai Hēvaní
ʻOku nofo ʻa e tokotaha naʻá ne faʻú ʻi ʻAlesona, USA.
Ne haʻu ki heʻeku fakakaukaú ha ngaahi lea ne ʻikai ʻaʻaku: “ʻOkú ke pehē ʻoku lahi ange hoʻo ʻofa aí ʻiate Au?”
Lauʻi tā ʻo e tokotaha naʻá ne faʻu e talanoá mo hono fohá
Naʻe haʻu homa kiʻi foha pele ko Heitení ki he māmaní ʻoku lanu pulū, ʻikai lava ʻo mānava, pea fāifeinga ke moʻui. Ne ʻikai tangi. Ne ʻikai ngāue.
ʻI he fakatovave holo ʻa e kau nēsí mo e kau toketaá he loto loki ʻo e falemahakí, ne u ʻilo ʻoku ʻi ai ha meʻa ʻoku fuʻu fehalaaki. Naʻe foaki leva ʻe hoku husepānití mo ʻeku tangataʻeikí kia Heiteni ha tāpuaki lakanga fakataulaʻeiki, pea naʻe ʻave fakavave atu leva ʻa Heiteni ki he tafaʻaki tokangaekina makehé. Naʻe ʻiloʻi ai ʻokú ne maʻu ha mahaki hāhāmolofia ʻo e mafú. Naʻe fai kiate ia ʻi loto ʻi ha ngaahi ʻaho siʻi ha ngaahi tafa mafu.
Naʻe ikunaʻi ʻe Heiteni e ngaahi faingataʻa kotoa pē peá ne moʻui ʻo fakafou he mālohi fakaofo ʻo e ngaahi tāpuaki lakanga fakataulaʻeikí, ʻaukaí, mo e ngaahi lotú. Ne ma fuʻu fiefia ʻaupito ke foki mo homa fohá ki ʻapi mo kamata fakataha ʻemau moʻui foʻoú.
Ne ʻomi ʻe Heiteni ha fiefia taʻe hano-tatau ki heʻema moʻuí. Ne ma ʻofa lahi ʻaupito ʻiate ia. Ka ʻi he fakalau ʻa e taimí, ne kamata ke u hohaʻa ʻi he ʻikai ke ne fakalakalaka ʻo hangē ko ʻemau fakaʻamú. Neongo naʻe fakapapauʻi mai ʻe he kau mataotaó kiate kimaua ʻe faifai pē pea saí, naʻe hokohoko atu ʻeku hohaʻá ʻi heʻeku faingataʻaʻia he feinga ke tokoniʻi hoku fohá.
Ne u ako mo hoku husepānití e ngaahi meʻa kotoa pē ne ma lava fekauʻaki mo e mahaki ʻo Heitení. Ne ma fai e meʻa kotoa pē ne talamai ʻe he toketaá. Ka naʻe ʻikai ha fakalakalaka.
Ne fakaʻau ke u helaʻia mo loto-foʻi. Ne u tautapa ki he Tamai Hēvaní ke tokoni mai ke u maʻu ha taha te ne lava ʻo tokoniʻi ʻa Heitení, ka naʻe ʻikai ha tokoni ʻe haʻu. Naʻe fakaʻau ke kovi ange e tūkunga ʻo Heitení. Naʻe kamata ke hamu. Ne ma ilifia. Naʻá ma pehē ʻe mole meiate kimaua.
ʻI ha pō ʻe taha, ne u ʻā fuoloa ai he fekumi ki ha ngaahi talí. Ne u fai ha tohi kia Heiteni. Ne u fakahā kiate ia e lahi ʻo ʻeku ʻofa aí mo ʻeku feinga mālohi ke fakafaingofuaʻi ange ʻene moʻuí. Ne u palōmesi ange te u feinga he toenga ʻeku moʻuí ke ne maʻu ʻa e tokoni ʻokú ne fie maʻú.
Naʻe lōmekina au ʻe he loto-foʻí mo e puputuʻú he taimi ko ia. Ne u tūʻulutui mo fehuʻi ki he Tamai Hēvaní, “Ko e hā hono ʻuhingá?” Naʻá ku pehē naʻá Ne ʻomi ʻa Heiteni kiate aú koeʻuhí naʻá Ne ʻafioʻi he ʻikai ke u teitei foʻi he feinga ke tokoniʻi hoku fohá. Ko e hā leva ne ʻikai ke u lava ai ʻo maʻu ha talí? Ko e hā naʻe ʻikai ola lelei ai e toketā foʻou mo e faitoʻo foʻou kotoa pē? Ne ʻikai ʻofa nai e Tamai Hēvaní ia ʻia Heiteni?
He ʻikai toe ngalo ʻiate au e mōmeniti ko iá. Naʻe ʻōʻōfaki au ʻe ha ongo lōmekina ʻo e ʻofá. Ne haʻu ki heʻeku fakakaukaú ha ngaahi lea ne ʻikai ʻaʻaku: “Sēlini, ʻokú ke pehē ʻoku lahi ange hoʻo ʻofa aí ʻiate Au?”
Naʻá ku ʻohovale. Ne ʻikai toe ngāue ha meʻa. Naʻe mokulu noaʻia hoku loʻimatá—ʻo ʻikai ko ha puputuʻu hangē ko ia kimuʻá, ka ʻi he ʻamanaki lelei, mahino, mo e ʻofa.
ʻI he miniti ʻe taha ko iá, naʻe liliu e meʻa kotoa pē. Naʻe molū hoku lotó. Naʻe liliu ʻeku fehuʻí. Kuo mahino ʻeni kiate au ʻoku ʻofa ʻa e Tamai Hēvaní ʻia Heiteni ʻi ha ʻofa haohaoa. Naʻe ʻomi ʻa Heiteni ki heni ʻi ha sino ʻoku feʻunga pē mo ʻene ngaahi fie maʻú mo hono ngaahi faingamālie ke tupulaki mo ako aí. ʻOkú ne maʻu ha ngaahi founga mo ha ngaahi faingataʻa makehe, ʻo hangē pē ko kitautolú takitaha. Kuó u ʻilo ʻeni ko e fānau faingataʻaʻiá ko ha fānau mahuʻinga mo ʻofeina kinautolu ʻa e Tamai Hēvaní ʻa ia ʻoku nau maʻu ha misiona makehe ʻi heni he māmani ko ʻení.
ʻOku ou maʻu maʻu pē mo hoku husepānití ha ngaahi tali mo ha ngaahi tāpuaki, ka ʻoku nau hoko mai ʻi he taimi ʻa e ʻEikí, kae ʻikai ʻa mauá. Kuo takiekina kimaua ki he ngaahi tohi, tokoni makehe, ngaahi ako, mo e ngaahi faiako totonú ke nau tokoniʻi ʻa Heiteni ke lavameʻa ʻi he moʻui fakamatelie ko ʻení. ʻOkú ma feinga ki he hala kuo teuteu ʻe he Tamai Hēvaní maʻa Heitení kae ʻikai ko e hala ne ma loto ke fou aí. ʻOkú ma fai ʻa e meʻa kotoa pē ʻokú ma lavá ke tokoniʻi ʻa Heiteni ke ne aʻusia e meʻa te ne malava fakalangí pea maʻu ʻa e moʻui kuo fokotuʻutuʻu ʻe he Tamai Hēvaní maʻaná. Kuo lelei ange ʻeni e mahino ʻokú ma maʻu fekauʻaki mo e palani ʻa e Tamai Hēvaní naʻe ʻAʻana ʻa Heiteni kimuʻa pea toki ʻa mauá.