Ko ha Fakaafe kia Likato
Martin Apolo Cordova
Paraná, Brazil
Tā fakatātaaʻi ʻe Katy Dockrill
ʻI he taimi ʻoku ou fanongo ai ʻi ha ʻekitivitī ʻa e Siasí, ʻoku ou fakaafeʻi maʻu pē ha kakai ʻe toko hongofulu ʻoku ʻikai ko ha mēmipa ʻo e Siasí ke nau omi. Kuó u fai ʻeni ʻi ha ngaahi taʻu lahi. ʻOku ou faʻu ha ngaahi tohi fakaafe pea faʻo kinautolu takitaha ʻi ha sila hinehina mo lotu ki he Laumālié ke ne tataki au. ʻOku ou tufa leva e ngaahi fakaafé. ʻOku ʻikai faʻa omi kotoa e toko hongofulú, ka naʻa mo e haʻu ha toko tahá, ʻoku ou ongoʻi ko ha lavameʻa ia.
ʻI he ngaahi taʻu lahi kuo hilí, ne u teuteu ha fakaafe ʻe hongofulu ki ha faeasaiti maʻá e ngaahi hoa ʻosi malí. Ne u tufa ha fakaafe ʻe hiva ki he kakai he ngāueʻangá pea toe ha taha ʻiate au. Ne ʻikai ke u ʻilo pe ko hai ʻe ʻave ki aí. Hili ha ngaahi miniti siʻi, ne fakalaka hake ʻi hoku tesí ʻa Likato, ko ha fakafofonga faifakatau. Ne ueʻi au ke u fakaafeʻi ia, neongo naʻá ne ʻosi fakasītuʻaʻi ha fakaafe ʻa ha kaungā ngāue ʻe taha ke ʻalu ki ha meʻa ʻi honau siasí. Ne ʻikai ke u tui ʻe fie ʻalu ʻa Likato.
Ka ʻi he taimi ne toe fakalaka hake ai ʻa Likato ʻi hoku tesí ʻi heʻene hū ki tuʻá, ne u toe ongoʻi e ueʻi ko iá. Ka neongo ia, naʻá ne hū vave ki tuʻa pea ʻikai ai haku faingamālie ke talanoa ki ai. Ne u lotu ke toe foki mai ʻa Likato kapau ʻoku totonu ke u ʻave kiate ia e tohi fakaafé.
Hili ʻeku lotú, ne toe foki mai ʻa Likato ke ʻeke mai kiate au ha fehuʻi. Hili iá, ne u pehē ange, “Likato, ʻoku fakahoko ha polokalama homau siasí maʻá e ngaahi hoa ʻosi malí. Te mau fevahevaheʻaki ha ngaahi aʻusia fekauʻaki mo e founga ke nofo fiefia ai he ʻaho takitaha. Hili iá, ʻe hoko atu ha hulohula. Kapau te u fakaafeʻi koe, te ke haʻu?”
“Lava lelei!” Ko e lea mai ia ʻa Likató ka naʻe ʻikai fakalotoʻi au ʻe heʻene talí.
Ne u fakakaukau pē, “Koloa kuo fai hoku fatongiá.”
Ne u ʻalu vave mo hoku uaifí ki he polokalamá ke talitali e kakaí ʻi heʻenau aʻu angé. Fakafokifā, ne u sio kia Likato mo hono uaifi ko Lesiná. Ne u fakafeʻiloaki kinaua ki hoku uaifí mo e niʻihi kehe ne omí. ʻI he toenga ʻo e efiafi ko iá, ne hangē ne maʻu e fiefia ʻa Likato mo Lesiná. Ne u ʻohovale ʻi heʻena talamai te na omi ki he lotú he Sāpaté ke ako lahi ange.
Naʻe ako ʻe Likato, Lesina mo ʻena fānau ʻe toko uá ha meʻa lahi ange. Naʻe faifai pea nau kau ki he Siasí. Ne nau sila kimui ange ʻi he temipalé. Ne tuʻo taha hano talamai ʻe Likato kiate au kuó ne faʻa talanoa mo hono uaifí fekauʻaki mo e māvaé, ka naʻe tataki ʻe he ʻEikí ʻa Likato ki hoku ʻōfisí.
Kuó u kole ha fakamolemole mei he ʻOtuá talu mei ai ʻi heʻeku fakakaukau he ʻikai tali ʻe Likato ʻeku fakaafé. Kuó u ako ʻoku mahuʻinga ke fakaafeʻi ʻa e tokotaha kotoa pē. ʻOku ʻikai ke ke teitei ʻilo pe ko hai te ne talí.