Naʻa mo ha Matangi He ʻIkai Ke Ne Taʻofi Kimaua
Koraima Santiago de Jesus
San Juan, Puerto Rico
Tā fakatātaaʻi ʻe Suzanne Simmons
Hili ha taimi nounou mei heʻeku foki mai mei he ngāue fakafaifekaú, ne u maʻu ha fakaafe ke ʻalu ki ha hulohula. Ne pulia ʻeku telefoní he hulohulá pea fie tokoni mai ha talavou kiate au hono kumi iá. ʻI heʻema talanoá, ne ma ʻiloʻi ai kuó ma ʻosi ngāue fakafaifekau fakatouʻosi peá ma fevahevaheʻaki ha ngaahi fakakaukau mo ha ngaahi taumuʻa lahi.
Ne hokohoko atu e tupulaki homa vā fetuʻutakí, peá ma fakamaʻu. Ko ʻema ʻamanakí ia ke ma sila ʻi he Temipale Washington D.C. kimuʻa pea toki tāpuni ki hono fakaleleiʻi ʻi Māʻasi 2018. Ka ʻi he hili ʻema fakahoko e fili ko iá, ne siviʻi kimaua. ʻUluakí, ne mole ʻeku ngāué pea ʻikai ha founga ke u fakahū ai ha paʻanga ki heʻema folau ki he temipalé. Hokó, ne ʻi ai ha matangi ne fakatokanga mai ʻe tō ʻi Pueto Liko kimuʻa he ʻaho te ma mali aí.
ʻI he taimi ne tō mai ai e Matangi ko Maliá, naʻá ne maumauʻi homau kiʻi motu fakaʻofoʻofá. Naʻe tāpuni e ngaahi falekoloá. Ne mate e ʻuhilá; pea faingataʻa ke maʻu ha vai, meʻakai, mo ha ngaahi fie maʻu kehe pē. Ne maumau e meʻa kotoa pē ne ma ʻosi palani ke fakaʻaongaʻi hono talitali ʻema malí. Naʻe pau ai ke ma kaniseli e talitali ki heʻema malí, pea ne ngali hangē ʻe fie maʻu ke kaniseli mo ʻema malí. Naʻe fakangatangata e fefolauʻaki mei Pueto Likó, pea ʻikai ʻilo ʻe ha taha hono fuoloá. Ne kamata ke u ongoʻi loto siʻi, pea ne u fonu ʻi he veiveiua mo e puputuʻu.
Ne ma talanoa ʻi ha pō ʻe taha mo hoku ʻofaʻangá fekauʻaki mo homa tūkungá. Naʻe taʻepau e folaú, pea he ʻikai ʻi ai ha talitali ʻi heʻema malí pe ko ha vala mali, ka naʻe fakapapauʻi mai ʻe he Laumālié ʻoku fie maʻu ke ma falala ki he ʻEikí. Ko e meʻa mahuʻinga tahá ke ma sila ʻi he temipalé. Ne ma lotua ha tokoni mei he Tamai Hēvaní.
ʻI he lava pē ke fai ha folau kituʻa mei Pueto Likó, ne pau leva ke ma fokotuʻutuʻu ha ngaahi palani folau foʻou mo toe fokotuʻutuʻu homa ʻaho silá. Ne ʻikai ha ma founga fetuʻutaki ʻi ha ngaahi uike lahi hili e matangí, ka naʻe kei ngāue ha telefoni toʻotoʻo hoku kaungāmeʻá. Naʻá ne fakaʻatā ke ma ngāue ʻaki ia ke fetuʻutaki ki he temipalé. Ne ma lava ai ʻo toe fokotuʻutuʻu e meʻa kotoa koeʻuhí ke kei lava pē ʻo silaʻi kimaua! ʻI he ngaahi uike kimuʻa heʻema folaú, ne foaki ʻofa mai ʻe ha kau mēmipa ʻo e fāmilí mo e kaungāmeʻá ha ʻū sū mo ha vala mo tokoniʻi kimaua ke kumi ha ngaahi meʻa lahi ki heʻema malí.
ʻI he faifai peá ma hū ki he temipalé, ne ma siʻaki e ngaahi meʻa kotoa pē ne ma hohaʻa ki aí. Ne ma fepīkinima atu ke kamataʻi homa kahaʻu fakatahá. Te u lava pē ʻo pehē moʻoni ne u ongoʻi hono tataki mo fakapapauʻi mai ʻe he toʻukupu ʻo e ʻEikí kiate kimaua, ʻe sai pē ʻa e meʻa kotoa ʻi heʻema falala kiate Iá. ʻI he ʻahó ni, kuo faitāpuekina ʻaki kimaua ha foha fakaʻofoʻofa pea ko ha fāmili kimautolu kuo silaʻi ki he kotoa ʻo e taʻengatá.