Ko e Kote ne Molé
ʻOku nofo ʻa e tokotaha naʻá ne faʻú ʻi ʻAioua, USA.
“Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” (Tokāteline mo e Ngaahi Fuakava 64:10).
“Mami, ʻoku pulia hoku koté!” Ko Pālati ia. Kuo taimi ke mau foki ki ʻapi, ka naʻe ʻikai lava ke maʻu ʻe Pālati hono koté ʻi he tautauʻanga koté.
“ʻOkú ke fakapapauʻi naʻá ke tautau ai?” Ko e fehuʻi ange ia ʻa e fineʻeikí.
“ʻIo. Naʻe ʻi heni pē.” Naʻe lanu pulu mo kulokula maama e kote ʻo Pālatí. Naʻe faingataʻa ke taʻe-ʻiloʻi.
“Mahalo naʻe ʻave ia ki ha feituʻu ʻe taha. Tau fakasio holo pē ʻi he loto falé,” ko e tangataʻeikí ange ia.
Naʻe māvahevahe ʻa e fineʻeikí, tangataʻeikí mo Pālati ke fakasio ʻi ha ngaahi loki kehekehe. Ne nau fakasio he puha mole-pea toe-maʻu ʻi he ʻapisiasí, loto lokiako Lautohi Faka-Sāpate ʻa Pālatí, ʻi he loki Palaimelí, pea mo e tautauʻanga kote kotoa pē. Ne aʻu ʻenau fakasió ki he pāfulumú, ka ne ʻikai ke nau maʻu ʻa e koté.
“Mahalo naʻe moʻu toʻoa atu ia ʻe ha taha. ʻOku ou tui pē te nau fakafoki mai ia ʻi he uike kahaʻú ʻi heʻenau ʻilo pē ʻoku ʻikai ʻanautolú,” ko e tangataʻeikí ange ia.
“Ka ʻi he taimi ní, te ke lava pē ʻo tui ho kote motuʻá,” ko e fineʻeikí ange ia.
Naʻe fakafulofula ʻa Pālati. Naʻe ʻikai ke saiʻia hono kote motuʻá. Naʻe manifi, mole hono lanú, pea fuʻu siʻisiʻi kiate ia. Naʻá ne saiʻia hono ʻai ia ʻe hono kote lanu kulokula mo pulū foʻoú ke hangē ha fuʻu heló.
Naʻe fakakaukauloto ʻa Pālati, “Mahalo naʻe sio ha taha ia ki he fakaʻofoʻofa hoku koté peá ne kaihaʻasi ʻe ia.” ʻOku hoko fēfē ia ʻi he falelotú? Naʻe totonu ke faitotonu e tokotaha kotoa pē ai. Naʻe ʻikai tukunoaʻi ʻe Pālati e tokotaha kaihaʻa ko iá ke hao mo ia. Naʻe ʻi ai haʻane palani. ʻI he Sāpate hokó, te ne fakasio fakalelei ke sio ko hai ʻokú ne tui hono koté. Pea te ne faʻao fakafoki mai leva ia mo kaila, “Taʻofi, tokotaha kaihaʻa” Te nau toe fakaʻiseʻisa ʻi heʻenau ʻave iá.
Naʻe ʻikai faʻa tatali ʻa Pālati ki he Sāpaté ke fakahoko ʻene palaní. Ka naʻe fuʻu māfana e Sāpate hono hokó ia ke tui kote ai ha taha, kae pehē ki he Sāpate hono hokó.
ʻI he Sāpate hili iá, naʻe sio takai fakalelei ʻa Pālati he Palaimelí he kotoa ʻo e tamaiki tangatá, mo fifili pe ko hai naʻá ne kaihaʻasi hono koté. Ko e tamasiʻi lōloa ko ʻeé? Ka ʻikai mahalo ko ha taʻahine ia. Naʻá ne ongoʻi ʻoku ʻikai ke ne falala ki ha taha. Naʻe ʻikai saiʻia ʻa Pālati he ongo ko iá.
Hili e lotú naʻe fakavave takai holo ʻa Pālati he loto falé, ʻo fakasio hono tui ʻe he ngaahi fāmilí honau ʻū koté. Ka naʻe ʻikai ke ne fakatokangaʻi hono koté ʻi ha feituʻu. Naʻá ne toe vakaiʻi foki ʻa e puha mole-pea toe-maʻú … ka naʻe ʻikai ʻi ai ha kote. ʻOku ʻi fē nai?
ʻI heʻenau foki ki ʻapí, ne fakakaukau ʻa Pālati ki ha palani foʻou. Te ne lotu. Naʻá ne ʻilo ʻe lava ke maʻu ʻe he Tamai Hēvaní ʻa e ngaahi meʻa ʻoku molé. Naʻe lotu ʻa Pālati he pō ko iá ʻo pehē, “Tamai Hēvani, kātaki ʻo fakahā mai pe ko hai naʻá ne ʻave hoku koté. ʻOku ou fie maʻu ia.”
Naʻe tatali ʻa Pālati ke haʻu ki heʻene fakakaukaú e hingoa pe fofonga ʻo e tokotaha kaihaʻá. Ka naʻe kamata ke fakakaukau ki hono kaungāmeʻa ko Kaʻalá. Naʻe faʻa tangutu ʻa Pālati ʻi he tafaʻaki ʻo Kaʻalá ʻi he Palaimelí. Ne na faʻa fakakata mo kakata fakataha. Ka kuo fuoloa ʻeni mo e teʻeki toe ʻalu ange ʻa Kaʻala ki he lotú. Naʻe ʻofa ki ai ʻa Pālati.
Fēfē kapau ko Kaʻala naʻá ne toʻo hono koté? Mahalo naʻe ilifia ʻa Kaʻala ke toe haʻu ki he lotú koeʻuhí naʻá ne pehē he ʻikai toe hoko ʻa Pālati ko hano kaungāmeʻa. Naʻe fie maʻu ʻe Pālati ke toe haʻu pē ʻa Kāʻala ki he lotú. Kapau naʻe ʻave ʻa Kaʻala hono koté, naʻe pehē ʻe Pālati he ʻikai te ne kaikailaʻi ia. Te ne fakamolemoleʻi ia.
Naʻe kaka ʻa Pālati ki hono mohengá, kuó ne ongoʻi sai ange.
ʻI he Sāpate hokó he Palaimelí, naʻe ʻikai ʻi ai ʻa Kāʻala, ka ne ʻi ai ha tamasiʻi foʻou. Naʻá ne tui ha hēkesi matohitohi lanu kulokula mo lanu pulū.
Naʻe pehē ange ʻe Pālati ʻi heʻene tangutu he tafaʻaki ʻo e tamasiʻi foʻoú, “hēkesi fakaʻofoʻofa.” “ʻOkú ne ʻai koe ke ke hangē ha fuʻu heló.”
Naʻe malimali ʻa e kiʻi tamasiʻí.
Naʻe malimali foki mo Pālati. Naʻe ʻikai ke ne toe fakasio ha kau kaihaʻa. Ka naʻá ne fakasio hano ngaahi kaungāmeʻa.