Ngaahi Fehuʻí & Talí
“ʻE founga fēfē hano tokoniʻi au ʻe hoku tāpuaki fakapēteliaké ke fakahoko ʻa ʻeku ngaahi filí?”
Ko ʻEtau Liahona Fakatāutahá
ʻOku hoko e ngaahi tāpuaki fakapēteliaké ko ha founga ʻoku tokoniʻi ai kitautolu ʻe he Tamai Hēvaní ke tau ʻilo hotau tuʻunga kimuʻa he moʻui fakamatelié, fakamatelié, mo e taʻengatá. ʻI heʻetau ʻilo e ngaahi moʻoni makehe ʻe tolu ko ʻeni fekauʻaki mo kitautolú, ʻoku tokoni ia ke tau muimui ai he palani ʻa e ʻOtuá maʻatautolú. ʻOku tau ʻilo ai ko hai kitautolu, ʻuhinga ʻoku tau ʻi heni aí, mo e tuʻunga te tau lava ʻo aʻusiá. ʻI he taimi naʻe ngāue ai e Liahoná ʻo fakatatau mo e tui mo faivelenga ʻa Nīfai mo hono fāmilí ʻi heʻenau muimui ki heʻene ngaahi fakahinohinó (vakai, 1 Nīfai 16:28), te tau lava foki mo kitautolu ʻo faivelenga mo fakamātoato he muimui ʻi heʻetau Liahoná mo e fakahinohino aí, ʻa ia te ne tataki kitautolu ke tau aʻusia hotau tuʻunga malava fakalangí.
ʻEletā ʻUtai, taʻu 20, Misiona Argentina, Salta
Ko ha Fakakaukau Taʻengata
ʻI he taimi kotoa pē ʻoku ou ongoʻi taʻemaaʻusia ai hono fakahoko ha ngaahi filí, ʻoku ou tafoki ki heʻeku tāpuaki fakapēteliake mo fakalaulauloto ki he fakahā fakalangi aí. Pea ʻoku faingofua leva ke u fai ha fili. ʻOku ʻikai ngata pē ʻi heʻene tokoniʻi au ke u kātakiʻi ʻeku moʻui he māmaní mo maʻu e ngaahi tāpuaki kuo talaʻofa maí, ka ʻokú ne fakamanatuʻi mai foki kiate au ʻeku teuteuʻi au ke u moʻui feʻunga ke hū ki he puleʻanga ʻo e ʻEikí ʻi ha ʻaho. ʻOku hokohoko atu ʻene tokoniʻi au ke u tupulaki ʻi he tuí, falala ki he finangalo ʻo e ʻEikí, mo moʻui fakatatau mo ha fakakaukau ʻoku taʻengatá.
ʻApikeili F., taʻu 18, Teleʻa Kakaianí, Filipaini
Faleʻi Fakalangi
ʻOku ʻomi ʻe heʻeku tāpuaki fakapēteliaké kiate au ha faleʻi mei heʻeku Tamai Hēvaní. Kapau te u muimui he faleʻi ko iá, ʻoku ou ʻilo te u maʻu ha fakahā fekauʻaki mo e ngaahi fili ʻoku fie maʻu ke u fakahokó. ʻOkú Ne tali ha niʻihi ʻo ʻeku ngaahi fehuʻí kimuʻa ʻoku teʻeki keu ʻeke kinautolú.
Kami H., taʻu 16, ʻIutā, USA
Fakafanongo ki he Laumālié
Kapau ʻokú ke fekumi ki ha fakafiemālie mo ha fakahinohino pe ki ha tali ki ha fehuʻi vivili, te ke lava ʻo lotu fakamātoato ki ai mo lau ho tāpuaki fakapēteliaké ʻi ha loto hangamālie moʻoni, lolotonga hoʻo fakafanongo ki he Laumālié. ʻOku tokoni foki ʻa e fekumi ʻi he folofolá. ʻOku ou tui kapau te ke fai ʻeni ʻi he tui moʻoni, ʻe fakahoko atu ʻe he ʻEikí ha tali kiate koe, ʻi Heʻene taimí, ʻi he founga lelei tahá.
Kēsia B., taʻu 15, Hauaiʻi, USA
Ngaahi Tāpuaki kuo Talaʻofa Maí
ʻOku ʻomi ʻe he tāpuaki fakapēteliaké ʻa e ngaahi meʻa ʻoku finangalo ʻa e ʻOtuá ke tāpuakiʻi ʻaki kitautolú. ʻOkú Ne ʻomi ha ngaahi fakatokanga mo folofola mai e founga ʻe lava ke tau hangē ai ko Iá. ʻI he taimi ʻoku tau ʻilo ai ʻa e meʻa kuo teuteu ʻe he Tamai Hēvaní maʻatautolu mo e founga ke maʻu ai iá, te tau fili leva mo ngāue ke tau maʻu ia.
Hanitā H., taʻu 18, ʻIutā, USA