Faitotonu Fakafiefiá
ʻOku nofo ʻa e tokotaha naʻá ne faʻú ʻi Kololato, USA.
“Fai ʻe kimoutolu ʻa ia ʻoku angatonú” (2 Kolinitō 13:7).
Naʻe pehē mai ʻeku fineʻeikí, “ʻOku ou fie maʻu ke ke tokangaʻi ho tokouá.” “Te u ʻalu mo hoʻo tangataʻeikí ʻo tokoni ki ha tokotaha ʻoku puke.”
Ne u hanga hake mei hono tafi e faliki homau kiʻi fale siʻisiʻí mo kamo hoku ʻulú. Ko ʻeku fineʻeikí naʻe palesiteni Fineʻofá, pea naʻá ne faʻa ʻalu ʻo ʻaʻahi ki he kau fineʻofa homau uōtí.
Naʻe pehē mai ʻeku fineʻeikí mo ʻuma ʻi hoku laʻé, “Mālō ʻĀlini.” “ʻOku mohe ʻa Sione. Pea ʻoku tupu e ongo foʻi tou maá ʻi he funga kānitá. Kātaki ʻoua ʻe ala ki aí.”
Ne u sio atu pē mei he hūʻanga ʻo e matapaá ki heʻena heka atu mo ʻeku tangataʻeikí he salioté ʻi homau kiʻi hala efuá. Ne u ongoʻi fiefia ʻi he falala mai ʻeku fineʻeikí.
ʻI heʻeku tafi e peitó, ne u tuʻu ʻo sio ki he foʻi tou maá. Naʻe ʻikai ke u faʻa tatali ke fai mo taʻo ia ʻe he fineʻeikí he pooni. ʻOku mau faʻa kai e mā foʻoú ʻaki ha siamu ʻoku ngaahi pē ʻi ʻapi. Ka kuo ʻosi ʻeni ʻemau siamú ha māhina ʻe tolu.
Siamu! Ne tupu mei heʻeku fakakaukaú ʻeku fie kai ha meʻa melie. Ne u sio hake ki he hina suká, ʻi ʻolunga he funga kōpaté. Ne u ʻilo ne tuku ia ʻe he fineʻeiki ke ngaohi ʻaki ha siamu.
Ka ko e lahi ange ʻeku fakakaukau ki he suká, ko e lahi ange ia ʻeku fiekaiá. Naʻe faifai peá u toʻo mai ha sea ki he veʻe kānitá ʻo kakapa hake ki ʻolunga. Naʻe mālō pē e aʻu hoku nimá ki he hina suká. Ne u pae mai ia ke ofi mai ki he ngataʻanga ʻo e kōpaté. …
Pea naʻe tō e hiná mei he funga kōpaté! Ne u feinga ke hapo ia, ka naʻe patō leʻolahi ia ʻi he funga tou maá. Naʻe mahua e suká he funga maá mo e kānitá pea mo e falikí.
“ʻOiauē!” Ko ʻeku kaikailá ia. Naʻe ʻā ai hoku kiʻi tokoua siʻisiʻí. Naʻe kamata ke ne tangi. Ne u loto ke u tangi. Ko e hā ha fakakaukau ʻa e fineʻeikí ki he ngāue kovi ko ʻení?
Hili ʻeku fakafiemālieʻi ʻa Sioné, ne u fai hoku lelei tahá ke fakamaʻa hake e suká. Ne u fusi hake e hiná mei he foʻi toú ʻo fufulu ia. Ne u holo e suká mei he funga kānitá pea mo e falikí. Ka ne ʻikai ha meʻa te u lava ʻo fai ke toʻo e suká mei he foʻi toú.
Ne u fakakaukau ke fakafoki e foʻi ngeʻesi hiná ki he funga kōpaté. Mahalo he ʻikai fakatokangaʻi ia ʻe he fineʻeikí ʻoku maha. Ka ne u ʻilo ʻoku ʻikai totonu ia. Ko ia ne u tuku e foʻi hiná ʻi he funga tēpilé peá u tatali ki he fineʻeikí mo e tangataʻeikí ke na foki mai ki ʻapi.
ʻI heʻena foki maí, ne fakatokangaʻi ʻe he fineʻeikí e foʻi hina suká he taimi pē ko iá.
Ne u fakatau ʻeku mānavá. “Ne u fie kai pē ha kiʻi mei suka siʻisiʻi. Ka ne u tau he foʻi hina suká ʻo tō mei he funga kōpaté. Ne u feinga ke fakamaʻa ia, ka naʻe ʻikai ke u lava ʻe au ʻo toʻo mei he foʻi toú.” Ne u lea vave pē mo punou ʻo hanga ki lalo ki he falikí.
Naʻe fakalongolongo e fineʻeikí ʻi ha kiʻi taimi siʻi.
Ne u fanafana ange, “Kātaki fakamolemole.”
Naʻe kiʻi mānava leʻolahi e fineʻeikí. Naʻá ne pehē mai, “Sai, ʻoku ou tui pē ʻe toe kiʻi melie ange ʻa e maá he pooni.” Ne u sio hake. Naʻá ne malimali hifo. “Fakamālō atu hoʻo talamai e meʻa ne hokó.”
ʻI heʻemau kai e mā melié he pō ko iá, ne u talanoa mo ʻeku ongomātuʻá fekauʻaki mo e faitotonú.
Naʻe talamai ʻe he tangataʻeikí, “ʻOku tau fakahoko kotoa pē ha ngaahi fehalaaki lahi ʻi he moʻuí.” “Ka ʻi he taimi ʻoku tau faitotonu mo feinga ai ke fakatomalá, ʻoku fiefia ʻa e Tamai Hēvaní mo Sīsū. ʻE tāpuekina maʻu pē kitautolu ʻi heʻetau faitotonú—neongo kapau ʻoku ngali faingataʻa ʻi he kamataʻangá.”
Ne u kei lotomamahi pē ʻi heʻeku huaʻi ʻa e suká. Ne u ʻilo mahalo he ʻikai lahi ʻemau siamú he taʻú ni koeʻuhí ko ʻeku fehalākí. Ka ne u fiefia ʻi heʻeku tala ʻa e moʻoní. Ko ha ongo fakafiefia ia he ʻikai lava ke fetongi ʻaki ha faʻahinga lahi pē ʻo e suká.