ʻOku Tataki Nai Au ʻe he ʻOtuá?

ʻĪmisi

young adult standing by train

ʻOku fonu ʻetau moʻuí he ngaahi fili mahuʻingá: ko e hā e ngāue maʻuʻanga moʻui ke kumiá, ko hai te u mali mo iá, feituʻu ke ʻalu ʻo ako aí, mo e alā meʻa pehē. ʻOku fonu foki ʻetau moʻuí he ngaahi hohaʻa fakaeʻahó: fili e meʻa ke fakaʻaongaʻi lelei ki ai e taimí, feinga ke mahino e tokāteliné, mo e fekumi ki ha nonga ʻi he uhouhonga ʻo e ngaahi faingataʻá. Ko hono fakalukufuá, ʻoku tau fie maʻu ha fakahā fakataautaha. Ka ʻoku ʻi ai ha taimi ʻe niʻihi ʻe ala faingataʻa ai ke ʻilo pe ʻe maʻu fēfē ia, pea mo e founga ke ʻiloʻi ai ʻetau aʻusia iá. ʻI he taimi ʻoku ʻikai ke tau maʻu pe ʻilo ai e ngaahi talí, ʻe lava ke tau fifili, “Ko e Laumālié ia pe ko haʻaku fakakaukau pē ia ʻaʻaku?” “Ko e hā naʻe ueʻi ai au ke u fai ia pea ʻikai ola leleí?” “Ko e hā ʻoku ou ongoʻi ai hangē ʻoku ʻikai tali ʻe he ʻOtuá ʻeku ngaahi lotú?”

Meʻamālié, ʻoku vahevahe ʻe ʻĒlini ʻi he “Ko Hono Fakahoko ʻo e Ngaahi Filí: Tauʻatāina ke Filí vs. Fakahā” (peesi 44), ʻa ʻene talanoa fekauʻaki mo e fakahā fakatāutahá ʻi he taimi naʻe pau ai ke ne fakahoko ha fili te ne liliu ʻene moʻuí. Neongo ʻoku finangalo ʻa e ʻOtuá ke tataki kitautolu, ʻokú Ne finangalo foki ke tokoniʻi kitautolu ke tau fakafalala ki heʻetau tauʻatāina ke filí ke fakahoko ha ngaahi fili lelei.

ʻOku hoko hono ako e founga ʻoku fetuʻutaki atu ai e Laumālié kiate koe fakatāutahá ko ha konga mahuʻinga hono maʻu mo ʻilo ʻo e fakahaá. ʻE malava ke kehekehe pē ia kiate kitautolu hono kotoa. ʻI he peesi 48, ʻoku tokolahi ha kakai lalahi kei talavou ʻoku nau vahevahe e founga ʻoku nau maʻu ai ha fakahaá.

ʻI ha fakamatala ʻoku maʻu pē he komipiutá, ʻoku fakamatalaʻi ai ʻe ʻEsipeni ʻoku fie maʻu ʻi he fakahā fakatāutahá ke “Fakamālohia Hotau Ngaahi Uoua Fakalaumālié.”

ʻE ala fakatupu lōmekina, naʻa mo fakamanavahē ʻa e fakakaukau ki he kahaʻú. Tautautefito ki heʻetau hoko ko ha kakai lalahi kei talavoú. Ka ʻi heʻeku manatuʻi e founga kuo tataki ai ʻe he ʻOtuá ʻeku moʻuí he kuohilí, ʻokú ne ʻomi ʻa e lototoʻa ke u laka atu ki muʻa pea mo ngāue, ʻo falala ʻe hokohoko atu ʻEne ʻomi ʻa e fakahinohino ʻoku ou fie maʻu ʻi heʻeku fonongá.

Fakaʻapaʻapa atu,

Katie Sue Embley

Faleʻi Lelei Tahá …

ʻOku vahevahe ʻe he kakai lalahi kei talavoú ʻa e ngaahi faleʻi lelei taha kuo nau ʻosi maʻu fekauʻaki mo hono maʻu ha fakahā fakatāutahá:

“Naʻe tuʻotaha hano talamai ʻe heʻeku ʻetivaisa EFY, ‘Fakatupulaki ho vā fetuʻutaki mo e ʻOtuá ko hoʻo Tamai fakalaumālie moʻoní. Ko e mālohi ange ho vā fetuʻutaki mo Iá, ko e lahi ange ia ʻa e mahino mo e tākiekina te ke maʻú.’ Kuó ne liliu lahi e founga ʻeku lotú.”

—Grant Goolsby, California, USA

“ʻOku fie maʻu ʻe he pēteliake homau sitekí ke ako maʻuloto ʻe he tokotaha kotoa e kupuʻi lea ʻe taha ko ʻení: ‘ke maʻu fakahaá, lau e fakahaá.’ Kuó ne tokonia lahi au ʻi heʻeku lau e folofolá.”

—Shellby Tippetts, Missouri, USA

“Fakaʻaongaʻi ha taimi ke ke fakalaulauloto ai. Naʻe fakalaulauloto ʻa Siosefa Sāmita ki he Sēmisi 1:5 kimuʻa peá ne toki fai ha ngāué. ʻOku ʻi ai ha ngaahi taimi ʻe niʻihi ʻoku finangalo ʻa e Tamai Hēvaní ke tau fakahoko ʻa e lotú mo e akó kimuʻa peá Ne toki ʻomi ha ngaahi talí. ʻOku lahi ange ʻetau ako he founga ko iá.”

—Natasha Herbst, Utah, USA

“Fanongo ʻaki homou lotó, kae ʻikai ko homou telingá.”

—Sai Tua, American Samoa

Ko e hā ʻa e faleʻi lelei taha kuó ke maʻu fekauʻaki mo e fakatomalá? ʻOmi hoʻomou talí ki he liahona.lds.org kimuʻa he ʻaho 30 ʻo ʻEpeleli, 2019.