E Dua Na iTukutuku ni Vakanuinui Vei Ira Era Vesu Tu

Mai vei Douglas G. Richens

Manidia ni Lotu ki na Veiqaravi ena Valeniveivesu

Na rarama ni Kalou sa rawa ni tiki ni nomu veisiga ni mataka.

man in prison cell with light shining through window

Ena vica na yabaki sa oti, au a sikova tiko e dua na valeniveivesu niu sotava e dua na Turaga na yacana o Eric. A vesu tu ena loma ni 17 na yabaki. Ena loma ni gauna oqori, e a vakavudua sara me calata o Eric na Lotu. E dau masu vakawasoma kei ira na tamata ka vukea e vuqa na tamata me ra vulica na ivolanikalou. Niu sotavi Eric, e a sotava tiko na bibi bolebole ni mate vauca tiko na nona bula. Au a rawa ni laki sikovi koya ena nona rumu ni valenibula ni valeniveivesu.

Ni keirau veitalanoa tiko, a tukuna vei au o Eric na nona vakavinavinaka vei ira e vuqa na lewe ni Lotu era a tokoni koya ena veiyabaki. A wasea na nona ivakadinadina kei na vakabauti Jisu Karisito. Ka, ena dua na domo vakasolokakana, kaya o koya ni se dau vuqa tikoga na siga nona dau vakila kina ni sa guilecavi ka galili. Keirau a veitalanoa vakalailai tale, masu vata, ka mai veitalatala yani vaka itokani. Ni oti e vica na auwa, au rogoca ni sa takali yani o Eric.

Na ilakolako ni bula nei Eric e a voravora. Ia yaco e muri o koya me kilai ka lomani na Tamada Vakalomalagi, o Jisu Karisito, kei koya vakai koya. Ka sa ikoya oya na ka e bibi. Ena veigauna tawamudu, au sega ni nanuma ni na bibi na vanua se sala cava eda a mai kilai Jisu kina. Na ka ena bibi sa ikoya na cava eda a cakava yadua ena noda bula ni oti na noda kunei Koya.

Na ituvaki kei na digidigi eso ka a muataki iko ki na nomu tiko vakavesu sega ni gadrevi me vakamacalataka na nomu bula. O rairai cakava beka eso na cala, lelevu ka lalai. O rairai vakayacora beka e dua na basulawa ena dua se vuqa na gauna. Oqo e tiki ni nomu bula e liu, ia na nomu gauna sa oti e sega ni lewa na nomu veisiga ni mataka. E tu vei iko na kaukauwa mo cakava na digidigi ka na sureta na marau, ena gauna sara mada ga ni dredre.

Nomu Kilai Dina

O Sister Joy D. Jones, na Peresitedi Raraba ni Lalai, e sa dau veisikovi vakawasoma e valeniveivesu. A tukuna vei au ena dua na gauna na italanoa oqo.

“Au nanuma lesu na imatai ni gauna au a sikova kina na valeniveivesu volekata na vanua au tiko kina. Niu veivosaki tiko kei na dua na ilawalawa kaivesu, e vaka niu a tiko ena dua na vanua tabu, baleta niu kila ni ra vinakata dina sara me ra veisau ka lako mai vei Karisito. Keimami a veivosakitaka na keda ivakatakilakila vakalou vaka ni da sa luve ni Kalou.

“Ena dua na gauna oqori, au a tukuna vei ira me baleta na makubuqu yalewa yabaki rua ka a lako mai vei au ena dua na siga ena, matadredredre. A kacivaka mai o koya ena yalomarau, ‘Bubu, o au e dua na luve ni Kalou!’ Qai kaya vakamalua mai e dua vei ira, ‘ Au vakataroga mada se na vakacava tu beka na noqu bula nikua kevaka e dua me ae tukuna vei au ni ’u a se gone ni ‘u sa dua na luve ni Kalou.’

“Na itukutuku vinaka sa ikoya ni da sa luvena kece na Kalou,” a tomana o Sisita Jones, “se da vulica mai ni da se dua na gonelailai se ena noda bula e muri. E sega vakadua ni se rui bera sara. Ko sa sega ni guilecavi. E kilai iko na Kalou. Sa lomani iko o Koya. Na Luvena, o Jisu Karisito, e noda iVakabula. E a sorovaki Koya ena vuku da yadua kece sara. Ena vuku ni ka oqo, sa kila vakavinaka sara kina o Jisu na noda bula, ka sa rawa meda vosoti vakataucoko sara ena noda ivalavala ca. A kaya o koya, ‘Io, era na guilecava beka, ia, koi au, kau na sega ni guilecavi iko. … Raica, ka’u sa ceuti iko ena qeteqete ni ligaqu; na nomu bai sa tikotiko ga e mataqu’ (1 Nifai 21:15–16).”

Veivuke na nomu vakabauta ni o iko, kei ira kece o kila, sa luve ni Kalou e rawa me ivurevure ni kaukauwa e loma. Ni ko sa ciqoma na dina oqo ka vakalaiva me dusimaka na nomu bula, ko na kunea na vakacegu levu cake ka yaco mo ivakaraitaki ni veika vinaka vei ira na tani.

Taracake Tale ni Veivakabauti

hand sending out a dove from window of prison cell

Ena bula taucoko e rawa ni dredre meda kila o cei me da vakabauta, ia e rawa ni o vakabauta tikoga na Tamamu Vakalomalagi. E vakavulica na ivolanikalou ni kilai iko vakavinaka sara na Kalou. E lomani iko o Koya ka sega ni rawa ni daulasu.¹ Kevaka e dredre vei iko—mo nuitaki ira na tani—oka kina na Kalou, ia masulaka. Taroga na Tamamu Vakalomalagi, “Ko lomani au beka? Au rawa beka ni vakabauti Iko? ” Qai vakarogoca na kena isau. Ena rawa ni yaco mai me vaka e dua na vakanananu veivakacegui se vakasama malumu. Ena taura toka na gauna. Ia na Kalou ena sauma na nomu masu.

Me ikuri ni nomu kila o cei o rawa ni vakabauta, sa ka bibi mo yaco me dua e rawa ni vakabauti. Ena sega beka ni veiganiti mo veitaratara kei ira o sa vakamavoataka. Ia, e se rawa tikoga ni o vakasamataka na veika sa yaco oti mai na nodra irairai, vakatorocaketaka na nomu lomani ira, ka masulaki ira. E rawa ni o tamata nuitaki ena veiwekani vovou o tauyavutaka.

Ena rawa ni dua na sala balavu. Au vakavinavinakataka na veivakayaloqaqataki oqo mai vei Elder Jeffrey R. Holland ena Kuoramu ni iApositolo Le Tinikarua: “Mo lomania tikoga. Mo sasaga tikoga. Mo Vakabauta tikoga. Mo Vakadinata tikoga. Mo Tubu tikoga. Ena vakayaloqaqataki iko tiko mai o lomalagi nikua, ni mataka, ka tawamudu.”²

Veisusugi ni Vesu Tu

O na temaki beka mo nanuma ni, sega ni rawa mo dua na itubutubu ena tiko vakavesu sara. Vorata vakanananu oqo. E via tautauvata talega, eda vakalougatataki ni da vukei ira ena noda tabanalevu kei na iteki ni da vakayacora vakakina.Ena veigauna ga e rawa kina, vakaraica na sala moe tokona kina na nomu matavuvale kei ira na gone.

O ira na lewenilotu era tiko volekata na valetabu era ciqoma talega na veivakalougatataki vata oqo ni ra vakaitavi ena cakacaka ni tuva kawa, ni kumuni mai na yacadra na nodra qase eliu me vakayacori na cakacaka vakalotu ni valetabu. Tarogi iko mada, “Me’u na vukea vakacava beka na noqu matavuvale me ciqoma na veivakalougatataki ni kosipeli?” Oqo e va vakasama:

E rawa ni o dau masulaka na nomu matavuvale. Na masu e dua na ivakaraitaki qaqa ni cakacaka vakayalo ka sega ni yalani ena lalaga se na kena yawa.
Kevaka e vakatarai mo veitaratara kei ira na luvemu, vakaraica na sala veiganiti eso mo vakaraitaka kina na nomu loloma. Vakavulica vei ira me baleta na lesoni vakayalo eso o sa vulica tiko.
Sasaga mo semalesu kei ira na itokani nuitaki. Tara cake na veimaliwai vata kei ira era na veivakauqeti vinaka ki na nomu matavuvale.
Veisau mo vinaka cake. Na sasaga kece o cakava me vakavinakataki iko ka mo taura kina na itavi me baleta na nomu digidigi ena vukei iko mo dua na tama se tina vinaka cake.

Toso ki Liu

E a kaya na noda parofita nikua, o Peresitedi Russell M. Nelson, ni sa inaki ni bula oqo sa ikoya me da vakarau tu me da sotava na Kalou ena noda vakamuria na ivakaraitaki i Jisu Karisito. “Eda vakayacora oqori ena noda veivutuni e veisiga ka ciqoma na Nona veivakasavasavataki, veivakabulai, kei na veivakaukauwataki mana,” a vakatavulica o koya. “Sa na rawa kina ni da sotava na vakacegu kei na reki dina, ena gauna saraga ni veilecayaki.”³

Na veivutuni e sa dua na tiki bibi ni veivakabulai. E tekivu ena nomu masu ena yalodina vua na Kalou, ka tukuna Vua na cala cava o a cakava ka kerea na Nona veivosoti. O na tekivu vakila na vakacegu ni o vulica vakalevu cake me baleta na kosipeli ka muria na ivakaraitaki i Jisu Karisito. Na veika vakilai oqo, kei na nomu itovo sani veisau tiko, sa ivakadinadina ni ko sa tekivu tiko mo vakabulai.

Era sa tu qori na iliuliu ni Lotu me vukei iko mo yabeta lesu na salatu oqo vua na Kalou. Ena vukui Jisu Karisito, ena dau rawa tikoga kina me o lesu tale vua na Tamamu Vakalomalagi. E dina ni o na rairai vakila ni o sa vosoti oti mai vua na Kalou ni se bera sara ni o vosoti mai na matavuvale, itikotiko, se so sara mada ga na lewe ni Lotu. Tomana tiko na toso ki liu. E sega ni noda cakacaka me da veisautaka na tamata Vakabauta tiko na yalayala ni Kalou kei na nona Nona gauna.

Ena Vukei Iko na Kalou Mo Vakabulai

Nanuma tiko ni mataqali veivakabulai cava ga—oka kina mai na veivakatotogani, veivakacacani, se veivakamavoataki tale eso—e dau taura na gauna. E tukunia ena iVola Tabu na italanoa ni nona vakabula o Jisu e dua na mataboko ka a qai lesu tale mai na rai ni matana vakaitagede. A raica taumada o koya “na tamata era vaka na kau, ka ra sa lako voli.” Sa qai “tabaka tale na matana ko Jisu ena ligana,” o Jisu sa qai raica vakavinaka na veika kecega na tamata oya (Marika 8:24–25). Me vaka oqori, ena nona vakabula o Jisu e dua na marama a tauvi turidrabalavu, o ya ni oti na nona vosota tu mai na mate me 12 na yabaki (raica na Marika 5:25–34). Na italanoa eso oqo e vakananuma vei keda ni veivakabulai vakayago, vakayalo, kei na vakasama e vakavuqa dau taura toka e dua na gauna. Kevaka o vakila ni sega ni yaco vakatotolo tiko na nomu vakabulai ena kena totolo o vinakata, ia tovolea mo vakatakila mada eso na rawaka lalai. Masu ka veivosaki vata kei na Kalou me baleta na lomamu, oka kina na nomu vakavinavinakataki Koya ena toso cava ga o sa raica rawa.

Se o sa lewena rawa tiko Na Lotu i Jisu Karisito ni Yalododonu Edaidai, vulica vakalevu cake tiko na kosipeli, se lesu tale tiko mai vaka lewe ni Lotu, yalovinaka mo kila ni keimami kauwaitaki iko. Se vakacava na veika o sa cakava oti mai, se na balavu ni sala sa tu mai liu, ena rawa ni vakasinaiti ena rarama i Karisito na nomu veisiga ni mataka. Na salatu ni kosipeli e dau solia vei keda na kaukauwa. E dau kauta mai vei keda na vakacegu. E dau veimuataki ki na marau levu cake ena bula oqo kei na reki ena veigauna tawamudu.

Na Tamamu Vakalomalagi kei Jisu Karisito e rau sa kilai ka lomani iko vakavinaka sara. Erau na sega sara ni laivi iko. Era na sega sara ni vakacacani iko. Era na sega ni guilecavi iko.