Ira na Marama kei na Kaukauwa ni Veiyalayalati
Mai vei Jean B. Bingham
Peresitedi Raraba ni iSoqosoqo ni Veivukei
E rawa ni da rekitaka na dodonu kei na kaukauwa sa tu vei keda mai na matabete.
iYaloyalo mai vei Amber Eldredge
A vakatavulica o Peresitedi Russell M. Nelson e ni sa tadola tu ko lomalagi vei ira na yalewa sa vakaedaumeni ka drodrovi ira tu na kaukauwa mana ni Kalou mai na nodra veiyalayalati vakamatabete me vaka saraga vei ira na tagane sa tiko vei ira na matabete.
“Au masuta me na vakoti ki yalomuni yadua na dina oya baleta au vakabauta ni na veisautaka nomu bula,” a kaya o koya. “Au vinakata meu laiva vei kemuni e dua na veivakalougatataki, me rawa ni o ni kila na mana ni matabete ko ni sa vakaedaumeni kina, ia ko ni na vakacerecerea na mana oqori ena nomuni cakacakataka nomuni vakabauta na mana oqori.”
A sureti ira na marama lewe ni Lotu o Peresitedi Nelson me ra “vulica ena masumasu” me baleta na kaukauwa ni matabete ka “raica na ka ena vakavulica na Yalo Tabu” vei keda. Au taleitaka ni noda parofita bula e sureti keda yadua, me da vulica ka ciqoma na ivakatakila ka me vinaka cake na noda “kila deivaki, ka vakayagataka na mana [eda] sa vakaedaumeni kina.”
E vakavuqa ena noqu bula taucoko, au sa dau sotava na veivakalougatataki yalataki e yaco mai ena kena vakamuri na nodra ivakasala na parofita. E sega ni duidui kina na veisureti oqo. Ena noqu vakasamataka tiko na veisureti nei Peresitedi Nelson, a vuki totolo sara na noqu vakasama ki na valetabu—na vanua au a vakaedaumeni kina ena kaukauwa ni matabete—kei na isolisoli ni sa dau tu na kaukauwa oya ena noqu bula taucoko. E taura na veiyabaki vei au me‘u kila kina na sala e dau vakaraitaki kina ena noqu bula na kaukauwa oya.
Na kaukauwa ni matabete, me vaka saraga na isolisoli ni Yalo Tabu, e lako mai vua na Tamada mai Lomalagi dauloloma kei na noda ivalavala dodonu yadudua. Ni da maroroya na noda veiyalayalati kei na Turaga, sa noda kina na madigi meda ciqoma na ivakatakila me baleta na noda bula, me baleta na noda matavuvale, cakacaka, vuli—na veika kece eda vakasaqara kina na veidusimaki. E sega ni dua na ka e bibi vei keda me sega ni bibi vua na Turaga. Kei na gauna eda sureta kina na Yalotabu me tiko vata kei keda, e rawa ni yaco me da kilamatata vakavinaka cake kina na kaukauwa ni matabete mai na veidusimaki ni Yalo Tabu.
Na levu ga ni noqu vulica na kaukauwa ni matabete mai na vuli yadua kei na veika au sotava, na levu ni noqu kilamatata kina na kena yaga ki na ituvaki kecega ni noda bula. Na kaukauwa ni matabete e vukei keda meda ciqoma na ivakatakila me baleta na noda bolebole e veisiga.
Ena noqu veikacivi, baleta niu veiqaravi tiko kei na lewa ni matabete e soli vei au mai vua e dua e tu vua na idola, e vuqa sara na gauna e sa dau soli kina vei au na vei vakanananu kei na vosa eso me baleta saraga na ka e gadreva tiko e dua na goneyalewa se lewe ni iSoqosoqo ni Veivukei se dua na gone ena Lalai me rogoca. Au kila ni veivosa oqori e lako mai baleta na lewa ni matabete a soli vei au ena noqu a vakatikori ki na veikacivi o ya.
Ena bula vakawati, me vaka ga ena dua na veimaliwai, eda dau lakova na tamata na veiwasewase kei na veituvaki eso ni vuli kei na tubucake. Au sa vulica ni gauna au dau nanuma kina o cei na watiqu, o cei o au, kei na cava e dodonu me keirau cakava vata tiko vaka luve ni Kalou, sa veisautaka sara ga na yaloqu. Na neirau vauci vata ena lewa ni matabete sa vaqaqacotaki ka vakauqeti keirau me keirau duavata vakalevu cake. Ena nona a kaya na iVakabula, “Kevaka dou sa sega ni duavata, dou sa sega ni noqu” (Vunau kei na Veiyalayalati 38:27), e sega walega ni vakaibalebaletaka o Koya ena dua na vanua ni Lotu. E vakaibalebaletaka talega o Koya ena noda veimaliwai vakamatavuvale.
Ka me vaka e dua na tina, au nanuma sara na noqu a leqataka tiko e dua na gone qase cake ka a cakava tiko na veika au kila ena sega ni rawa me na marau kina na gone oya. Keirau a sa vakadonuya me keirau veivosakitaka na kauwai oya ka vakarautaka e dua na gauna me keirau veitalanoa kina. Ni bera na gauna lokuci ni neirau veivosaki ena talevoni, sa vakarau rawa tu na noqu ivunau; au sa kila vakavinaka sara tu ga na veika me’u na kaya. Au a masulaka me tiko vata kei au na Yalotabu. Na veika a lutu mai na gusuqu mai na itekivu ni neirau veivosaki kei na gauna taucoko ni qiri e a duidui sara mai na veika au a navuca tu me’u tukuna. Ia a sa ikoya sara ga na ka a gadreva tiko na gone oya. Na isolisoli ni Yalo Tabu a rawa kina me vakamalumalumutaki na yalo ka laurai e dua na iwali vinaka cake. Oqori e dua na ivakaraitaki ni sala e dau cakacaka kina na kaukauwa ni matabete ena noda bula.
Dau vakavuqa, era dau vakatautauvatataki ira na marama kei ira na tani. Ia e sega ni dua vei keda e yalo vinaka ni da vakatauvatani keda kei ira na tani. Na marama yadua e tiko na nona veisole duatani ni rawa-ka kei na taledi, ka ra sa isolisoli va-Kalou kece sara. Baleta ga ni daru sa sega ni tautauvata o iko kei au—se ra sega ni tautauvata beka eso na iwiliwili ni marama—e sega ni cakava oya me da lailai sobu se sivia cake. Eda gadreva me da kunea na noda isolisoli ka vakatorocaketaka, ka nanuma tiko o cei a solia mai vei keda, ka qai vakayagataka me baleta na Nona inaki eso. Ni da wasea na noda isolisoli me vakalougatataki ira na tani, eda sa sotava tiko na kaukauwa ni matabete ena noda bula.
A sa noqu na madigi meu sota kei ira e vuqa na marama yalodina era dau vakaraitaka na vakabauta kei na kaukauwa ena nodra ivalavala. Era dau solia na marama na nodra taledi kei na veika era rawata ena veisala e veivakurabuitaki ka duidui eso. Era dau vakayaco veisau lelevu sara ki na nodra bula o ira kece era tiko voliti ira—ena nodra matavuvale, nodra vanua ni cakacaka, Lotu, koronivuli, se vanua cava ga era vakayagataka kina na nodra gauna.
E dua vei ira na veika au sa vulica me baleta na matabete sai koya ni da na cakava na veika vinaka duadua ni da cakacaka ena vakararavi vata vakai keda. Oqori na sala e a nakita kina na Turaga; oqori na ivakarau vakalou. E sega ni gadrevi meda veisisivi baleta ni isolisoli kei na taledi kei na rawa-ka duidui kece oqori era sa gadrevi—mai vei ira ruarua na tagane kei na yalewa. Sa liutaki keda malua tiko na Turaga ena salatu oya me rawa vei keda kece me da kila vakavinaka cake na sala me da cakacaka vata kina kei na sala me da vakamareqeta kina vakai keda na noda cau yadua. Sa ikoya dina sara na sala vinaka duadua me rawati kina na Nona cakacaka.
Era sega ni dau gadreva na marama me ra waraka e dua me tukuna vei ira na ka mera cakava ena nodra isolisoli, taledi, kei na kaukauwa. Sa tu vei keda na rawa-ka meda ciqoma kina na ivakatakila me baleti keda. E sega ni dodonu me da waraka me da vakaitavitaki; e gadrevi me tu vei keda na yaloqaqa me da cakacakataka na ivakatakila eda sa ciqoma. Na vakasaqarai kei na muri ni veidusimaki vakayalo e ivakadinadina ni da sa vakayagataka tiko na kaukauwa ni matabete e sa yalataki vei keda ni da sa maroroya na noda veiyalayalati kei na Kalou.
Me vaka a vakavulica o Peresitedi Nelson, “Na cava ena rawa ni taleitaki vakalevu cake mai na noda cakacaka kei na Yalotabu me da kila vakavinaka kina na kaukauwa ni kaukauwa ni Kalou—na matabete?” Sa yalataka o koya, “Ni sa torocake na nomu kila vinaka kei na nomu cakacakataka na nomu vakabauta na Turaga kei na Nona kaukauwa ni matabete, ena tubu cake na nomu rawa-ka mo tadolava na iyau talei vakayalo oqo sa vakarautaka tu na Turaga vei iko. Ka’u kila ni sa dina sara na yalayala eso oqo mai vua na noda parofita bula.